Read Roman Urdu Geo gintī 5 Bible Online

gintī 5 - Roman Urdu Geo bible

gintī 5

¹rab ne mūsā se kahā,

²“isrāīliyoṅ ko hukm de ki har us shaḳhs ko ḳhaimāgāh se bāhar kar do jis ko wabāī jildī bīmārī hai, jis ke zaḳhmoṅ se māe nikaltā rahtā hai yā jo kisī lāsh ko chhūne se nāpāk hai.

³ḳhwāh mard ho yā aurat, sab ko ḳhaimāgāh ke bāhar bhej denā tāki wuh ḳhaimāgāh ko nāpāk na kareṅ jahāṅ maiṅ tumhāre darmiyān sukūnat kartā hūṅ.”

⁴isrāīliyoṅ ne waisā hī kiyā jaisā rab ne mūsā ko kahā thā. unhoṅ ne rab ke hukm ke ain mutābiq is tarah ke tamām logoṅ ko ḳhaimāgāh se bāhar kar diyā.

⁵rab ne mūsā se kahā,

⁶“isrāīliyoṅ ko hidāyat denā ki jo bhī kisī se ġhalat sulūk kare wuh mere sāth bewafāī kartā hai aur qusūrwār hai, ḳhwāh mard ho yā aurat.

⁷lāzim hai ki wuh apnā gunāh taslīm kare aur us kā pūrā muāwazā de balki muta'assirā shaḳhs kā nuqsān pūrā karne ke ilāwā 20 fīsad zyādā de.

⁸lekin agar wuh shaḳhs jis kā qusūr kiyā gayā thā mar chukā ho aur us kā koī wāris na ho jo yih muāwazā wasūl kar sake to phir use rab ko denā hai. imām ko yih muāwazā us menḍhe ke ilāwā milegā jo qusūrwār apne kaffārā ke lie degā.

⁹nīz imām ko isrāīliyoṅ kī qurbāniyoṅ meṅ se wuh kuchh milnā hai jo uṭhāne wālī qurbānī ke taur par use diyā jātā hai. yih hissā sirf imāmoṅ ko hī milnā hai.”

¹¹rab ne mūsā se kahā,

¹²“isrāīliyoṅ ko batānā, ho saktā hai ki koī shādīshudā aurat bhaṭak kar apne shauhar se bewafā ho jāe aur

¹³kisī aur se hambistar ho kar nāpāk ho jāe. us ke shauhar ne use nahīṅ dekhā, kyūṅki yih poshīdagī meṅ huā hai aur na kisī ne use pakaṛā, na is kā koī gawāh hai.

¹⁴agar shauhar ko apnī bīwī kī wafādārī par shak ho aur wuh ġhairat khāne lage, lekin yaqīn se nahīṅ kah saktā ki merī bīwī qusūrwār hai ki nahīṅ

¹⁵to wuh apnī bīwī ko imām ke pās le āe. sāth sāth wuh apnī bīwī ke lie qurbānī ke taur par jau kā ḍeṛh kilogrām behtarīn maidā le āe. is par na tel unḍelā jāe, na baḳhūr ḍālā jāe, kyūṅki ġhallā kī yih nazar ġhairat kī nazar hai jis kā maqsad hai ki poshīdā qusūr zāhir ho jāe.

¹⁶imām aurat ko qarīb āne de aur rab ke sāmne khaṛā kare.

¹⁷wuh miṭṭī kā bartan muqaddas pānī se bhar kar us meṅ maqdis ke farsh kī kuchh ḳhāk ḍāle.

¹⁸phir wuh aurat ko rab ko pesh karke us ke bāl khulwāe aur us ke hāthoṅ par maide kī nazar rakhe. imām ke apne hāth meṅ kaṛwe pānī kā wuh bartan ho jo lānat kā bāis hai.

¹⁹phir wuh aurat ko qasam khilā kar kahe, ‘agar koī aur ādmī āp se hambistar nahīṅ huā hai aur āp nāpāk nahīṅ huī haiṅ to is kaṛwe pānī kī lānat kā āp par koī asar na ho.

²⁰lekin agar āp bhaṭak kar apne shauhar se bewafā ho gaī haiṅ aur kisī aur se hambistar ho kar nāpāk ho gaī haiṅ

²¹to rab āp ko āp kī qaum ke sāmne lānatī banāe. āp bāṅjh ho jāeṅ aur āp kā peṭ phūl jāe.

²²jab lānat kā yih pānī āp ke peṭ meṅ utre to āp bāṅjh ho jāeṅ aur āp kā peṭ phūl jāe.’ is par aurat kahe, ‘āmīn, aisā hī ho.’

²³phir imām yih lānat likh kar kāġhaz ko bartan ke pānī meṅ yūṅ dho de ki us par likhī huī bāteṅ pānī meṅ ghul jāeṅ.

²⁴bād meṅ wuh aurat ko yih pānī pilāe tāki wuh us ke jism meṅ jā kar use lānat pahuṅchāe.

²⁵lekin pahle imām us ke hāthoṅ meṅ se ġhairat kī qurbānī le kar use ġhallā kī nazar ke taur par rab ke sāmne hilāe aur phir qurbāngāh ke pās le āe.

²⁶us par wuh muṭṭhī bhar yādgārī kī qurbānī ke taur par jalāe. is ke bād wuh aurat ko pānī pilāe.

²⁷agar wuh apne shauhar se bewafā thī aur nāpāk ho gaī hai to wuh bāṅjh ho jāegī, us kā peṭ phūl jāegā aur wuh apnī qaum ke sāmne lānatī ṭhahregī.

²⁸lekin agar wuh pāk-sāf hai to use sazā nahīṅ dī jāegī aur wuh bachche janm dene ke qābil rahegī.

²⁹chunāṅche aisā hī karnā hai jab shauhar ġhairat khāe aur use apnī bīwī par zinā kā shak ho. bīwī ko qurbāngāh ke sāmne khaṛā kiyā jāe aur imām yih sab kuchh kare.

³¹is sūrat meṅ shauhar bequsūr ṭhahregā, lekin agar us kī bīwī ne wāqaī zinā kiyā ho to use apne gunāh ke natīje bardāsht karne paṛeṅge.”