Read Roman Urdu Geo gintī 6 Bible Online

gintī 6 - Roman Urdu Geo bible

gintī 6

¹rab ne mūsā se kahā,

²“isrāīliyoṅ ko hidāyat denā ki agar koī ādmī yā aurat mannat mān kar apne āp ko ek muqarrarā waqt ke lie rab ke lie maḳhsūs kare

³to wuh mai yā koī aur nashā-āwar chīz na pie. na wuh angūr yā kisī aur chīz kā sirkā pie, na angūr kā ras. wuh angūr yā kishmish na khāe.

⁴jab tak wuh maḳhsūs hai wuh angūr kī koī bhī paidāwār na khāe, yahāṅ tak ki angūr ke bīj yā chhilke bhī na khāe.

⁵jab tak wuh apnī mannat ke mutābiq maḳhsūs hai wuh apne bāl na kaṭwāe. jitnī der ke lie us ne apne āp ko rab ke lie maḳhsūs kiyā hai utnī der tak wuh muqaddas hai. is lie wuh apne bāl baṛhne de.

⁶jab tak wuh maḳhsūs hai wuh kisī lāsh ke qarīb na jāe,

⁷chāhe wuh us ke bāp, māṅ, bhāī yā bahan kī lāsh kyūṅ na ho. kyūṅki is se wuh nāpāk ho jāegā jabki abhī tak us kī maḳhsūsiyat lambe bāloṅ kī sūrat meṅ nazar ātī hai.

⁸wuh apnī maḳhsūsiyat ke daurān rab ke lie maḳhsūs-o-muqaddas hai.

⁹agar koī achānak mar jāe jab maḳhsūs shaḳhs us ke qarīb ho to us ke maḳhsūs bāl nāpāk ho jāeṅge. aisī sūrat meṅ lāzim hai ki wuh apne āp ko pāk-sāf karke sātweṅ din apne sar ko munḍwāe.

¹⁰āṭhweṅ din wuh do qumriyāṅ yā do jawān kabūtar le kar mulāqāt ke ḳhaime ke darwāze par āe aur imām ko de.

¹¹imām in meṅ se ek ko gunāh kī qurbānī ke taur par chaṛhāe aur dūsre ko bhasm hone wālī qurbānī ke taur par. yūṅ wuh us ke lie kaffārā degā jo lāsh ke qarīb hone se nāpāk ho gayā hai. usī din wuh apne sar ko dubārā maḳhsūs kare

¹²aur apne āp ko muqarrarā waqt ke lie dubārā rab ke lie maḳhsūs kare. wuh qusūr kī qurbānī ke taur par ek sāl kā bheṛ kā bachchā pesh kare. jitne din us ne pahle maḳhsūsiyat kī hālat meṅ guzāre haiṅ wuh shumār nahīṅ kie jā sakte kyūṅki wuh maḳhsūsiyat kī hālat meṅ nāpāk ho gayā thā. wuh dubārā pahle din se shurū kare.

¹³sharīat ke mutābiq jab maḳhsūs shaḳhs kā muqarrarā waqt guzar gayā ho to pahle use mulāqāt ke ḳhaime ke darwāze par lāyā jāe.

¹⁴wahāṅ wuh rab ko bhasm hone wālī qurbānī ke lie bheṛ kā ek beaib yaksālā nar bachchā, gunāh kī qurbānī ke lie ek beaib yaksālā bheṛ aur salāmatī kī qurbānī ke lie ek beaib menḍhā pesh kare.

¹⁵is ke ilāwā wuh ek ṭokrī meṅ beḳhamīrī roṭiyāṅ jin meṅ behtarīn maidā aur tel milāyā gayā ho aur beḳhamīrī roṭiyāṅ jin par tel lagāyā gayā ho mutālliqā ġhallā kī nazar aur mai kī nazar ke sāth

¹⁶rab ko pesh kare. pahle imām gunāh kī qurbānī aur bhasm hone wālī qurbānī rab ke huzūr chaṛhāe.

¹⁷phir wuh menḍhe ko beḳhamīrī roṭiyoṅ ke sāth salāmatī kī qurbānī ke taur par pesh kare. imām ġhallā kī nazar aur mai kī nazar bhī chaṛhāe.

¹⁸is daurān maḳhsūs shaḳhs mulāqāt ke ḳhaime par apne maḳhsūs kie gae sar ko munḍwā kar tamām bāl salāmatī kī qurbānī kī āg meṅ phaiṅke.

¹⁹phir imām menḍhe kā ek pakā huā shānā aur ṭokrī meṅ se donoṅ qismoṅ kī ek ek roṭī le kar maḳhsūs shaḳhs ke hāthoṅ par rakhe.

²⁰is ke bād wuh yih chīzeṅ wāpas le kar unheṅ hilāne kī qurbānī ke taur par rab ke sāmne hilāe. yih ek muqaddas qurbānī hai jo imām kā hissā hai. salāmatī kī qurbānī kā hilāyā huā sīnā aur uṭhāī huī rān bhī imām kā hissā haiṅ. qurbānī ke iḳhtitām par maḳhsūs kie hue shaḳhs ko mai pīne kī ijāzat hai.

²¹jo apne āp ko rab ke lie maḳhsūs kartā hai wuh aisā hī kare. lāzim hai ki wuh in hidāyāt ke mutābiq tamām qurbāniyāṅ pesh kare. agar gunjāish ho to wuh aur bhī pesh kar saktā hai. baharhāl lāzim hai ki wuh apnī mannat aur yih hidāyāt pūrī kare.”

²²rab ne mūsā se kahā,

²³“hārūn aur us ke beṭoṅ ko batā denā ki wuh isrāīliyoṅ ko yūṅ barkat deṅ,

²⁴‘rab tujhe barkat de aur terī hifāzat kare.

²⁵rab apne chehre kā mehrbān nūr tujh par chamkāe aur tujh par rahm kare.

²⁶rab kī nazar-e-karm tujh par ho, aur wuh tujhe salāmatī baḳhshe.’

²⁷yūṅ wuh merā nām le kar isrāīliyoṅ ko barkat deṅ. phir maiṅ unheṅ barkat dūṅgā.”