Read Roman Urdu Geo gintī 8 Bible Online

gintī 8 - Roman Urdu Geo bible

gintī 8

¹rab ne mūsā se kahā,

²“hārūn ko batānā, ‘tujhe sāt charāġhoṅ ko shamādān par yūṅ rakhnā hai ki wuh shamādān kā sāmne wālā hissā raushan kareṅ’.”

³hārūn ne aisā hī kiyā. jis tarah rab ne mūsā ko hukm diyā thā usī tarah us ne charāġhoṅ ko rakh diyā tāki wuh sāmne wālā hissā raushan kareṅ.

⁴shamādān pāe se le kar ūpar kī kaliyoṅ tak sone ke ek ghaṛe hue ṭukṛe kā banā huā thā. mūsā ne use us namūne ke ain mutābiq banwāyā jo rab ne use dikhāyā thā.

⁵rab ne mūsā se kahā,

⁶“lāwiyoṅ ko dīgar isrāīliyoṅ se alag karke pāk-sāf karnā.

⁷is ke lie gunāh se pāk karne wālā pānī un par chhiṛak kar unheṅ hukm denā ki apne jism ke pūre bāl munḍwāo aur apne kapṛe dho'o. yūṅ wuh pāk-sāf ho jāeṅge.

⁸phir wuh ek jawān bail chuneṅ aur sāth kī ġhallā kī nazar ke lie tel ke sāth milāyā gayā behtarīn maidā leṅ. tū ḳhud bhī ek jawān bail chun. wuh gunāh kī qurbānī ke lie hogā.

⁹is ke bād lāwiyoṅ ko mulāqāt ke ḳhaime ke sāmne khaṛā karke isrāīl kī pūrī jamā'at ko wahāṅ jamā karnā.

¹⁰jab lāwī rab ke sāmne khaṛe hoṅ to bāqī isrāīlī un ke saroṅ par apne hāth rakheṅ.

¹¹phir hārūn lāwiyoṅ ko rab ke sāmne pesh kare. unheṅ isrāīliyoṅ kī taraf se hilāī huī qurbānī kī haisiyat se pesh kiyā jāe tāki wuh rab kī ḳhidmat kar sakeṅ.

¹²phir lāwī apne hāth donoṅ bailoṅ ke saroṅ par rakheṅ. ek bail ko gunāh kī qurbānī ke taur par aur dūsre ko bhasm hone wālī qurbānī ke taur par chaṛhāo tāki lāwiyoṅ kā kaffārā diyā jāe.

¹³lāwiyoṅ ko is tarīqe se hārūn aur us ke beṭoṅ ke sāmne khaṛā karke rab ko hilāī huī qurbānī ke taur par pesh karnā hai.

¹⁴unheṅ bāqī isrāīliyoṅ se alag karne se wuh merā hissā baneṅge.

¹⁵is ke bād hī wuh mulāqāt ke ḳhaime meṅ ā kar ḳhidmat kareṅ, kyūṅki ab wuh ḳhidmat karne ke lāiq haiṅ. unheṅ pāk-sāf karke hilāī huī qurbānī ke taur par pesh karne kā sabab yih hai

¹⁶ki lāwī isrāīliyoṅ meṅ se wuh haiṅ jo mujhe pūre taur par die gae haiṅ. maiṅ ne unheṅ isrāīliyoṅ ke tamām pahlauṭhoṅ kī jagah le liyā hai.

¹⁷kyūṅki isrāīl meṅ har pahlauṭhā merā hai, ḳhwāh wuh insān kā ho yā haiwān kā. us din jab maiṅ ne misriyoṅ ke pahlauṭhoṅ ko mār diyā maiṅ ne isrāīl ke pahlauṭhoṅ ko apne lie maḳhsūs-o-muqaddas kiyā.

¹⁸is silsile meṅ maiṅ ne lāwiyoṅ ko isrāīliyoṅ ke tamām pahlauṭhoṅ kī jagah le kar

¹⁹unheṅ hārūn aur us ke beṭoṅ ko diyā hai. wuh mulāqāt ke ḳhaime meṅ isrāīliyoṅ kī ḳhidmat kareṅ aur un ke lie kaffārā kā intizām qāim rakheṅ tāki jab isrāīlī maqdis ke qarīb āeṅ to un ko wabā se mārā na jāe.”

²⁰mūsā, hārūn aur isrāīliyoṅ kī pūrī jamā'at ne ehtiyāt se rab kī lāwiyoṅ ke bāre meṅ hidāyāt par amal kiyā.

²¹lāwiyoṅ ne apne āp ko gunāhoṅ se pāk-sāf karke apne kapṛoṅ ko dhoyā. phir hārūn ne unheṅ rab ke sāmne hilāī huī qurbānī ke taur par pesh kiyā aur un kā kaffārā diyā tāki wuh pāk ho jāeṅ.

²²is ke bād lāwī mulāqāt ke ḳhaime meṅ āe tāki hārūn aur us ke beṭoṅ ke taht ḳhidmat kareṅ. yūṅ sab kuchh waisā hī kiyā gayā jaisā rab ne mūsā ko hukm diyā thā.

²³rab ne mūsā se yih bhī kahā,

²⁴“lāwī 25 sāl kī umr meṅ mulāqāt ke ḳhaime meṅ apnī ḳhidmat shurū kareṅ

²⁵aur 50 sāl kī umr meṅ riṭāyar ho jāeṅ.

²⁶is ke bād wuh mulāqāt ke ḳhaime meṅ apne bhāiyoṅ kī madad kar sakte haiṅ, lekin ḳhud ḳhidmat nahīṅ kar sakte. tujhe lāwiyoṅ ko in hidāyāt ke mutābiq un kī apnī apnī zimmādāriyāṅ denī haiṅ.”