Read Roman Urdu Geo mīkāh 1 Bible Online

mīkāh 1 - Roman Urdu Geo bible

mīkāh 1

¹zail meṅ rab kā wuh kalām darj hai jo mīkāh morashtī par yahūdāh ke bādshāhoṅ yūtām, āḳhaz aur hizqiyāh ke daur-e-hukūmat meṅ nāzil huā. us ne sāmariyya aur yarūshalam ke bāre meṅ yih bāteṅ royā meṅ dekhīṅ.

²ai tamām aqwām, suno! ai zamīn aur jo kuchh us par hai, dhyān do! rab qādir-e-mutlaq tumhāre ḳhilāf gawāhī de, qādir-e-mutlaq apne muqaddas ghar kī taraf se gawāhī de.

³kyūṅki dekho, rab apnī sukūnatgāh se nikal rahā hai tāki utar kar zamīn kī bulandiyoṅ par chale.

⁴us ke pāoṅ tale pahāṛ pighal jāeṅge aur wādiyāṅ phaṭ jāeṅgī, wuh āg ke sāmne pighalne wāle mom yā ḍhalān par unḍele gae pānī kī mānind hoṅge.

⁵yih sab kuchh yāqūb ke jurm, isrāīlī qaum ke gunāhoṅ ke sabab se ho rahā hai. kaun yāqūb ke jurm kā zimmādār hai? sāmariyya! kis ne yahūdāh ko buland jaghoṅ par butparastī karne kī tahrīk dī? yarūshalam ne!

⁶is lie rab farmātā hai, “maiṅ sāmariyya ko khule maidān meṅ malbe kā ḍher banā dūṅgā, itnī ḳhālī jagah ki log wahāṅ angūr ke bāġh lagāeṅge. maiṅ us ke patthar wādī meṅ phaiṅk dūṅgā, use itne dhaṛām se girā dūṅgā ki us kī bunyādeṅ hī nazar āeṅgī.

⁷us ke tamām but ṭukṛe ṭukṛe ho jāeṅge, us kī ismatfaroshī kā pūrā ajr nazar-e-ātish ho jāegā. maiṅ us ke dewatāoṅ ke tamām mujassamoṅ ko tabāh kar dūṅgā. kyūṅki sāmariyya ne yih tamām chīzeṅ apnī ismatfaroshī se hāsil kī haiṅ, aur ab yih sab us se chhīn lī jāeṅgī aur dīgar ismatfaroshoṅ ko muāwaze ke taur par dī jāeṅgī.”

⁸is lie maiṅ āh-o-zārī karūṅga, nange pāoṅ aur barahnā phirūṅga, gīdaṛoṅ kī tarah wāwailā karūṅga, uqābī ullū kī tarah āheṅ bharūṅga.

⁹kyūṅki sāmariyya kā zaḳhm lā'ilāj hai, aur wuh mulk-e-yahūdāh meṅ bhī phail gayā hai, wuh merī qaum ke darwāze yānī yarūshalam tak pahuṅch gayā hai.

¹⁰filistī shahr jāt meṅ yih bāt na batāo, unheṅ apne āṅsū na dikhāo. bait-lāfrā [1] meṅ ḳhāk meṅ loṭ-poṭ ho jāo.

¹¹ai safīr [2] ke rahne wālo, barahnā aur sharmsār ho kar yahāṅ se guzar jāo. zānān [3] ke bāshinde nikleṅge nahīṅ. bait-ezal [4] mātam karegā jab tum se har sahārā chhīn liyā jāegā.

¹²mārot [5] ke basne wāle apne māl ke lie pech-o-tāb khā rahe haiṅ, kyūṅki rab kī taraf se āfat nāzil ho kar yarūshalam ke darwāze tak pahuṅch gaī hai.

¹³ai lakīs [6] ke bāshindo, ghoṛoṅ ko rath meṅ jot kar bhāg jāo. kyūṅki ibtidā meṅ tum hī siyyūn beṭī ke lie gunāh kā bāis ban gae. tum hī meṅ wuh jarāim maujūd the jo isrāīl se sarzad ho rahe haiṅ.

¹⁴is lie tumheṅ tohfe de kar morashat-jāt [7] ko ruḳhsat karnī paṛegī. akzīb [8] ke ghar isrāīl ke bādshāhoṅ ke lie farebdih sābit hoṅge.

¹⁵ai maresā [9] ke logo, maiṅ hone dūṅgā ki ek qabzā karne wālā tum par hamlā karegā. tab isrāīl kā jalāl adullām tak pahuṅchegā.

¹⁶ai siyyūn beṭī, apne bāl kaṭwā kar giddh jaisī ganjī ho jā. apne lāḍle bachchoṅ par mātam kar, kyūṅki wuh qaidī ban kar tujh se dūr ho jāeṅge.