Read Roman Urdu Geo mīkāh 4 Bible Online

mīkāh 4 - Roman Urdu Geo bible

mīkāh 4

¹āḳhirī ayyām meṅ rab ke ghar kā pahāṛ mazbūtī se qāim hogā. sab se baṛā yih pahāṛ dīgar tamām bulandiyoṅ se kahīṅ zyādā sarfarāz hogā. tab ummateṅ jauq-dar-jauq us ke pās pahuṅcheṅgī,

²aur beshumār qaumeṅ ā kar kaheṅgī, “āo, ham rab ke pahāṛ par chaṛh kar yāqūb ke ḳhudā ke ghar ke pās jāeṅ tāki wuh hameṅ apnī marzī kī tālīm de aur ham us kī rāhoṅ par chaleṅ.” kyūṅki siyyūn pahāṛ se rab kī hidāyat niklegī, aur yarūshalam se us kā kalām sādir hogā.

³rab bain-ul-aqwāmī jhagaṛoṅ ko nipṭāegā aur dūr tak kī zor-āwar qaumoṅ kā insāf karegā. tab wuh apnī talwāroṅ ko kūṭ kar phāle banāeṅgī aur apne nezoṅ ko kāṅṭ-chhāṅṭ ke auzār meṅ tabdīl kareṅgī. ab se na ek qaum dūsrī par hamlā karegī, na log jang karne kī tarbiyat hāsil kareṅge.

⁴har ek apnī angūr kī bel aur apne anjīr ke daraḳht ke sāy meṅ baiṭh kar ārām karegā. koī nahīṅ rahegā jo unheṅ achānak dahshatzadā kare. kyūṅki rabb-ul-afwāj ne yih kuchh farmāyā hai.

⁵har dūsrī qaum apne dewatā kā nām le kar phirtī hai, lekin ham hameshā tak rab apne ḳhudā kā nām le kar phireṅge.

⁶rab farmātā hai, “us din maiṅ langaṛoṅ ko jamā karūṅga aur unheṅ ikaṭṭhā karūṅga jinheṅ maiṅ ne muntashir karke dukh pahuṅchāyā thā.

⁷maiṅ langaṛoṅ ko qaum kā bachā huā hissā banā dūṅgā aur jo dūr tak bhaṭak gae the unheṅ tāqatwar ummat meṅ tabdīl karūṅga. tab rab un kā bādshāh ban kar abad tak siyyūn pahāṛ par un par hukūmat karegā.

⁸jahāṅ tak terā tālluq hai, ai rewaṛ ke burj, ai siyyūn beṭī ke pahāṛ, tujhe pahle kī sī saltanat hāsil hogī. yarūshalam beṭī ko dubārā bādshāhat milegī.”

⁹ai yarūshalam beṭī, is waqt tū itne zor se kyūṅ chīḳh rahī hai? kyā terā koī bādshāh nahīṅ? kyā tere mushīr sab ḳhatm ho gae haiṅ ki tū dard-e-zah meṅ mubtalā aurat kī tarah pech-o-tāb khā rahī hai?

¹⁰ai siyyūn beṭī, janm dene wālī aurat kī tarah taṛaptī aur chīḳhtī jā! kyūṅki ab tujhe shahr se nikal kar khule maidān meṅ rahnā paṛegā, āḳhir meṅ tū bābal tak pahuṅchegī. lekin wahāṅ rab tujhe bachāegā, wahāṅ wuh iwazānā de kar tujhe dushman ke hāth se chhuṛāegā.

¹¹is waqt to muta'addid qaumeṅ tere ḳhilāf jamā ho gaī haiṅ. āpas meṅ wuh kah rahī haiṅ, “āo, yarūshalam kī behurmatī ho jāe, ham siyyūn kī hālat dekh kar lutfandoz ho jāeṅ.”

¹²lekin wuh rab ke ḳhayālāt ko nahīṅ jānte, us kā mansūbā nahīṅ samajhte. unheṅ mālūm nahīṅ ki wuh unheṅ gandum ke pūloṅ kī tarah ikaṭṭhā kar rahā hai tāki unheṅ gāh le.

¹³“ai siyyūn beṭī, uṭh kar gāh le! kyūṅki maiṅ tujhe lohe ke sīṅgoṅ aur pītal ke khuroṅ se nawāzūṅgā tāki tū bahut sī qaumoṅ ko chūr chūr kar sake. tab maiṅ un kā lūṭā huā māl rab ke lie maḳhsūs karūṅga, un kī daulat pūrī duniyā ke mālik ke hawāle karūṅga.”