Read Roman Urdu Geo mīkāh 5 Bible Online

mīkāh 5 - Roman Urdu Geo bible

mīkāh 5

¹ai shahr jis par hamlā ho rahā hai, ab apne āp ko chhurī se zaḳhmī kar, kyūṅki hamārā muhāsarā ho rahā hai. dushman lāṭhī se isrāīl ke hukmrān ke gāl par māregā.

²lekin tū, ai bait-laham ifrātā, jo yahūdāh ke dīgar ḳhāndānoṅ kī nisbat chhoṭā hai, tujh meṅ se wuh niklegā jo isrāīl kā hukmrān hogā aur jo qadīm zamāne balki azal se sādir huā hai.

³lekin jab tak hāmilā aurat use janm na de, us waqt tak rab apnī qaum ko dushman ke hawāle chhoṛegā. lekin phir us ke bhāiyoṅ kā bachā huā hissā isrāīliyoṅ ke pās wāpas āegā.

⁴yih hukmrān khaṛe ho kar rab kī quwwat ke sāth apne rewaṛ kī gallābānī karegā. use rab apne ḳhudā ke nām kā azīm iḳhtiyār hāsil hogā. tab qaum salāmatī se basegī, kyūṅki us kī azmat duniyā kī intihā tak phailegī.

⁵wuhī salāmatī kā mambā hogā. jab asūr kī fauj hamāre mulk meṅ dāḳhil ho kar hamāre mahaloṅ meṅ ghus āe to ham us ke ḳhilāf sāt charwāhe aur āṭh raīs khaṛe kareṅge

⁶jo talwār se mulk-e-asūr kī gallābānī kareṅge, hāṅ talwār ko miyān se khaiṅch kar namrūd ke mulk par hukūmat kareṅge. yūṅ hukmrān hameṅ asūr se bachāegā jab yih hamāre mulk aur hamārī sarhad meṅ ghus āegā.

⁷tab yāqūb ke jitne log bach kar muta'addid aqwām ke bīch meṅ raheṅge wuh rab kī bhejī huī os yā hariyālī par paṛne wālī bārish kī mānind hoṅge yānī aisī chīzoṅ kī mānind jo na kisī insān ke intizār meṅ rahtī, na kisī insān ke hukm par paṛtī haiṅ.

⁸yāqūb ke jitne log bach kar muta'addid aqwām ke bīch meṅ raheṅge wuh janglī jānwaroṅ ke darmiyān sherbabar aur bheṛ-bakriyoṅ ke bīch meṅ jawān sher kī mānind hoṅge yānī aise jānwar kī mānind jo jahāṅ se bhī guzare jānwaroṅ ko raund kar phāṛ letā hai. us ke hāth se koī bachā nahīṅ saktā.

⁹terā hāth tere tamām muḳhālifoṅ par fath pāegā, tere tamām dushman nest-o-nābūd ho jāeṅge.

¹⁰rab farmātā hai, “us din maiṅ tere ghoṛoṅ ko nest aur tere rathoṅ ko nābūd karūṅga.

¹¹maiṅ tere mulk ke shahroṅ ko ḳhāk meṅ milā kar tere tamām qiloṅ ko girā dūṅgā.

¹²terī jādūgarī ko maiṅ miṭā ḍālūṅgā, qismat kā hāl batāne wāle tere bīch meṅ nahīṅ raheṅge.

¹³tere but aur tere maḳhsūs satūnoṅ ko maiṅ yūṅ tabāh karūṅga ki tū āindā apne hāth kī banāī huī chīzoṅ kī pūjā nahīṅ karegā.

¹⁴tere asīrat dewī ke khambe maiṅ ukhāṛ kar tere shahroṅ ko mismār karūṅga.

¹⁵us waqt maiṅ baṛe ġhusse se un qaumoṅ se intiqām lūṅgā jinhoṅ ne merī nahīṅ sunī.”