Read Roman Urdu Geo mīkāh 6 Bible Online

mīkāh 6 - Roman Urdu Geo bible

mīkāh 6

¹ai isrāīl, rab kā farmān sun, “adālat meṅ khaṛe ho kar apnā muāmalā bayān kar! pahāṛ aur pahāṛiyāṅ tere gawāh hoṅ, unheṅ apnī bāt sunā de.”

²ai pahāṛo, ab rab kā apnī qaum par ilzām suno! ai duniyā kī qadīm bunyādo, tawajjuh do! kyūṅki rab adālat meṅ apnī qaum par ilzām lagā rahā hai, wuh isrāīl se muqaddamā uṭhā rahā hai.

³wuh sawāl kartā hai, “ai merī qaum, maiṅ ne tere sāth kyā ġhalat sulūk kiyā? maiṅ ne kyā kiyā ki tū itnī thak gaī hai? batā to sahī!

⁴haqīqat to yih hai ki maiṅ tujhe mulk-e-misr se nikāl lāyā, maiṅ ne fidyā de kar tujhe ġhulāmī se rihā kar diyā. sāth sāth maiṅ ne mūsā, hārūn aur mariyam ko bhejā tāki tere āge chal kar terī rāhnumāī kareṅ.

⁵ai merī qaum, wuh waqt yād kar jab moāb ke bādshāh balaq ne bal'ām bin baor ko bulāyā tāki tujh par lānat bheje. lānat kī bajāe us ne tujhe barkat dī! wuh safar bhī yād kar jab tū shittīm se rawānā ho kar jiljāl pahuṅchī. agar tū in tamām bātoṅ par ġhaur kare to jān legī ki rab ne kitnī wafādārī aur insāf se tere sāth sulūk kiyā hai.”

⁶jab ham rab ke huzūr āte haiṅ tāki allāh t'ālā ko sijdā kareṅ to hameṅ apne sāth kyā lānā chāhie? kyā hameṅ yaksālā bachhṛe us ke huzūr lā kar bhasm karne chāhieṅ?

⁷kyā rab hazāroṅ menḍhoṅ yā tel kī beshumār nadiyoṅ se ḳhush ho jāegā? kyā mujhe apne pahlauṭhe ko apne jarāim ke iwaz chaṛhānā chāhie, apne jism ke phal ko apne gunāhoṅ ko miṭāne ke lie pesh karnā chāhie? hargiz nahīṅ!

⁸ai insān, us ne tujhe sāf batāyā hai ki kyā kuchh achchhā hai. rab tujh se chāhtā hai ki tū insāf qāim rakhe, mehrbānī karne meṅ lagā rahe aur farotanī se apne ḳhudā ke huzūr chaltā rahe.

⁹suno! rab yarūshalam ko āwāz de rahā hai. tawajjuh do, kyūṅki dānishmand us ke nām kā ḳhauf māntā hai. ai qabīle, dhyān do ki kis ne yih muqarrar kiyā hai,

¹⁰“ab tak nājāiz nafā kī daulat bedīn ādmī ke ghar meṅ jamā ho rahī hai, ab tak log gandum bechte waqt pūrā tol nahīṅ tolte, un kī ġhalat paimāish par lānat!

¹¹kyā maiṅ us ādmī ko barī qarār dūṅ jo ġhalat tarāzū istemāl kartā hai aur jis kī thailī meṅ halke bāṭ paṛe rahte haiṅ? hargiz nahīṅ!

¹²yarūshalam ke amīr baṛe zālim haiṅ, lekin bāqī bāshinde bhī jhūṭ bolte haiṅ, un kī har bāt dhokā hī dhokā hai!

¹³is lie maiṅ tujhe mār mār kar zaḳhmī karūṅga. maiṅ tujhe tere gunāhoṅ ke badle meṅ tabāh karūṅga.

¹⁴tū khānā khāegā lekin ser nahīṅ hogā balki peṭ ḳhālī rahegā. tū māl mahfūz rakhne kī koshish karegā, lekin kuchh nahīṅ bachegā. kyūṅki jo kuchh tū bachāne kī koshish karegā use maiṅ talwār ke hawāle karūṅga.

¹⁵tū bīj boegā lekin fasal nahīṅ kāṭegā, zaitūn kā tel nikālegā lekin use istemāl nahīṅ karegā, angūr kā ras nikālegā lekin use nahīṅ piegā.

¹⁶tū isrāīl ke bādshāhoṅ umrī aur aḳhiyab ke namūne par chal paṛā hai, āj tak un hī ke mansūboṅ kī pairawī kartā āyā hai. is lie maiṅ tujhe tabāhī ke hawāle kar dūṅgā, tere logoṅ ko mazāq kā nishānā banāūṅgā. tujhe dīgar aqwām kī lān-tān bardāsht karnī paṛegī.”