Read Roman Urdu Geo nāhūm 1 Bible Online

nāhūm 1 - Roman Urdu Geo bible

nāhūm 1

¹zail meṅ nīnwā ke bāre meṅ wuh kalām qalamband hai jo allāh ne royā meṅ nāhūm ilqūshī ko dikhāyā.

²rab ġhairatmand aur intiqām lene wālā ḳhudā hai. intiqām lete waqt rab apnā pūrā ġhussā utārtā hai. rab apne muḳhālifoṅ se badlā letā aur apne dushmanoṅ se nārāz rahtā hai.

³rab tahammul se bharpūr hai, aur us kī qudrat azīm hai. wuh qusūrwār ko kabhī bhī sazā die baġhair nahīṅ chhoṛtā. wuh āṅdhī aur tūfān se ghirā huā chaltā hai, aur bādal us ke pāoṅ tale kī gard hote haiṅ.

⁴wuh samundar ko ḍānṭtā to wuh sūkh jātā, us ke hukm par tamām daryā ḳhushk ho jāte haiṅ. tab basan aur karmil kī shādāb hariyālī murjhā jātī aur lubnān ke phūl kumlā jāte haiṅ.

⁵us ke sāmne pahāṛ laraz uṭhte, pahāṛiyāṅ pighal jātī haiṅ. us ke huzūr pūrī zamīn apne bāshindoṅ samet laraz uṭhtī hai.

⁶kaun us kī nārāzī aur us ke shadīd qahr kā sāmnā kar saktā hai? us kā ġhazab āg kī tarah bhaṛak kar zamīn par nāzil hotā hai, us ke āne par patthar phaṭ kar ṭukṛe ṭukṛe ho jāte haiṅ.

⁷rab mehrbān hai. musībat ke din wuh mazbūt qilā hai, aur jo us meṅ panāh lete haiṅ unheṅ wuh jāntā hai.

⁸lekin apne dushmanoṅ par wuh sailāb lāegā jo un ke maqām ko ġharq karegā. jahāṅ bhī dushman bhāg jāe wahāṅ us par tārīkī chhā jāne degā.

⁹rab ke ḳhilāf mansūbā bāndhne kā kyā fāidā? wuh to tumheṅ ek dam tabāh kar degā, dūsrī bār tum par āfat lāne kī zarūrat hī nahīṅ hogī.

¹⁰kyūṅki go dushman ghanī aur ḳhārdār jhāṛiyoṅ aur nashe meṅ dhut sharābī kī mānind haiṅ, lekin wuh jald hī ḳhushk bhūse kī tarah bhasm ho jāeṅge.

¹¹ai nīnwā, tujh se wuh nikal āyā jis ne rab ke ḳhilāf bure mansūbe bāndhe, jis ne shaitānī mashware die.

¹²lekin apnī qaum se rab farmātā hai, “go dushman tāqatwar aur beshumār kyūṅ na hoṅ to bhī unheṅ miṭāyā jāegā aur wuh ġhāib ho jāeṅge. beshak maiṅ ne tujhe past kar diyā, lekin āindā aisā nahīṅ karūṅga.

¹³ab maiṅ wuh jūā toṛ ḍālūṅgā jo unhoṅ ne terī gardan par rakh diyā thā, maiṅ terī zanjīroṅ ko phāṛ ḍālūṅgā.”

¹⁴lekin nīnwā se rab farmātā hai, “āindā terī koī aulād qāim nahīṅ rahegī jo terā nām rakhe. jitne bhī but aur mujassame tere mandir meṅ paṛe haiṅ un sab ko maiṅ nest-o-nābūd kar dūṅgā. maiṅ terī qabr tayyār kar rahā hūṅ, kyūṅki tū kuchh bhī nahīṅ hai.”

¹⁵wuh dekho, pahāṛoṅ par us ke qadam chal rahe haiṅ jo amn-o-amān kī ḳhushḳhabrī sunātā hai. ai yahūdāh, ab apnī īdeṅ manā, apnī mannateṅ pūrī kar! kyūṅki āindā shaitānī ādmī tujh meṅ nahīṅ ghusegā, wuh sarāsar miṭ gayā hai.