Read Roman Urdu Geo nāhūm 2 Bible Online

nāhūm 2 - Roman Urdu Geo bible

nāhūm 2

¹ai nīnwā, sab kuchh muntashir karne wālā tujh par hamlā karne ā rahā hai, chunāṅche qile kī pahrādārī kar! rāste par dhyān de, kamarbastā ho jā, jahāṅ tak mumkin hai difā kī tayyāriyāṅ kar!

²go yāqūb tabāh aur us ke angūroṅ ke bāġh nābūd ho gae haiṅ, lekin ab rab isrāīl kī shān-o-shaukat bahāl karegā.

³wuh dekho, nīnwā par hamlā karne wāle sūrmāoṅ kī ḍhāleṅ surḳh haiṅ, faujī qirmizī rang kī wardiyāṅ pahne hue haiṅ. dushman ne apne rathoṅ ko tayyār kar rakhā hai, aur wuh bhaṛaktī mash'aloṅ kī tarah chamak rahe haiṅ. sāth sāth sipāhī apne neze lahrā rahe haiṅ.

⁴ab rath galiyoṅ meṅ se andhā-dhund guzar rahe haiṅ. chaukoṅ meṅ wuh idhar udhar bhāg rahe haiṅ. yūṅ lag rahā hai ki bhaṛaktī mash'aleṅ yā bādal kī bijliyāṅ idhar udhar chamak rahī haiṅ.

⁵hukmrān apne chīdā afsaroṅ ko bulā letā hai, aur wuh ṭhokar khā khā kar āge baṛhte haiṅ. wuh dauṛ kar fasīl ke pās pahuṅch jāte, jaldī se hifāzatī ḍhāl khaṛī karte haiṅ.

⁶phir daryā ke darwāze khul jāte aur shāhī mahal laṛkhaṛāne lagtā hai.

⁷tab dushman malikā ke kapṛe utār kar use le jāte haiṅ. us kī launḍiyāṅ chhātī pīṭ pīṭ kar kabūtaroṅ kī tarah ġhūṅ ġhūṅ kartī haiṅ.

⁸nīnwā baṛī der se achchhe-ḳhāse tālāb kī mānind thā, lekin ab log us se bhāg rahe haiṅ. logoṅ ko kahā jātā hai, “ruk jāo, ruko to sahī!” lekin koī nahīṅ ruktā. sab sar par pāoṅ rakh kar shahr se bhāg rahe haiṅ, aur koī nahīṅ muṛtā.

⁹āo, nīnwā kī chāṅdī lūṭ lo, us kā sonā chhīn lo! kyūṅki zaḳhīre kī intihā nahīṅ, us ke ḳhazānoṅ kī daulat lā-mahdūd hai.

¹⁰lūṭne wāle kuchh nahīṅ chhoṛte. jald hī shahr ḳhālī aur wīrān-o-sunsān ho jātā hai. har dil hauslā hār jātā, har ghuṭnā kāṅp uṭhtā, har kamr thartharāne lagtī aur har chehre kā rang māṅd paṛ jātā hai.

¹¹ab nīnwā beṭī kī kyā haisiyat rahī? pahle wuh sherbabar kī mānd thī, aisī jagah jahāṅ jawān sheroṅ ko gosht khilāyā jātā, jahāṅ sher aur shernī apne bachchoṅ samet ṭahalte the. koī unheṅ ḍarā kar bhagā nahīṅ saktā thā.

¹²us waqt sher apne bachchoṅ ke lie bahut kuchh phāṛ letā aur apnī sherniyoṅ ke lie bhī galā ghūṅṭ kar mār ḍāltā thā. us kī māndeṅ aur chhupne kī jagheṅ phāṛe hue shikār se bharī rahtī thīṅ.

¹³rabb-ul-afwāj farmātā hai, “ai nīnwā, ab maiṅ tujh se nipaṭ letā hūṅ. maiṅ tere rathoṅ ko nazar-e-ātish kar dūṅgā, aur tere jawān sher talwār kī zad meṅ ā kar mar jāeṅge. maiṅ hone dūṅgā ki āindā tujhe zamīn par kuchh na mile jise phāṛ kar khā sake. āindā tere qāsidoṅ kī āwāz kabhī sunāī nahīṅ degī.”