Read Roman Urdu Geo habaqqūq 1 Bible Online

habaqqūq 1 - Roman Urdu Geo bible

habaqqūq 1

¹zail meṅ wuh kalām qalamband hai jo habaqqūq nabī ko royā dekh kar milā.

²ai rab, maiṅ mazīd kab tak madad ke lie pukārūṅ? ab tak tū ne merī nahīṅ sunī. maiṅ mazīd kab tak chīḳheṅ mār mār kar kahūṅ ki fasād ho rahā hai? ab tak tū ne hameṅ chhuṭkārā nahīṅ diyā.

³tū kyūṅ hone detā hai ki mujhe itnī nāinsāfī deḳhnī paṛe? logoṅ ko itnā nuqsān pahuṅchāyā jā rahā hai, lekin tū ḳhāmoshī se sab kuchh deḳhtā rahtā hai. jahāṅ bhī maiṅ nazar ḍālūṅ, wahāṅ zulm-o-tashaddud hī nazar ātā hai, muqaddamābāzī aur jhagaṛe sar uṭhāte haiṅ.

⁴natīje meṅ sharīat beasar ho gaī hai, aur bā-insāf faisle kabhī jārī nahīṅ hote. bedīnoṅ ne rāstbāzoṅ ko gher liyā hai, is lie adālat meṅ behūdā faisle kie jāte haiṅ.

⁵“dīgar aqwām par nigāh ḍālo, hāṅ un par dhyān do to hakkā-bakkā rah jāoge. kyūṅki maiṅ tumhāre jīte jī ek aisā kām karūṅga jis kī jab ḳhabar sunoge to tumheṅ yaqīn nahīṅ āegā.

⁶maiṅ bābliyoṅ ko khaṛā karūṅga. yih zālim aur talḳhrū qaum pūrī duniyā ko ubūr karke dūsre mamālik par qabzā karegī.

⁷log us se saḳht dahshat khāeṅge, har taraf usī ke qawānīn aur azmat mānanī paṛegī.

⁸un ke ghoṛe chītoṅ se tez haiṅ, aur shām ke waqt shikār karne wāle bheṛī'e bhī un jaise phurtīle nahīṅ hote. wuh sarpā dauṛ kar dūr dūr se āte haiṅ. jis tarah uqāb lāsh par jhapaṭṭā mārtā hai usī tarah wuh apne shikār par hamlā karte haiṅ.

⁹sab isī maqsad se āte haiṅ ki zulm-o-tashaddud kareṅ. jahāṅ bhī jāeṅ wahāṅ āge baṛhte jāte haiṅ. ret jaise beshumār qaidī un ke hāth meṅ jamā hote haiṅ.

¹⁰wuh dīgar bādshāhoṅ kā mazāq uṛāte haiṅ, aur dūsroṅ ke buzurg un ke tamasḳhur kā nishānā ban jāte haiṅ. har qile ko dekh kar wuh haṅs uṭhte haiṅ. jald hī wuh un kī dīwāroṅ ke sāth miṭṭī ke ḍher lagā kar un par qabzā karte haiṅ.

¹¹phir wuh tez hawā kī tarah wahāṅ se guzar kar āge baṛh jāte haiṅ. lekin wuh qusūrwār ṭhahreṅge, kyūṅki un kī apnī tāqat un kā ḳhudā hai.”

¹²ai rab, kyā tū qadīm zamāne se hī merā ḳhudā, merā quddūs nahīṅ hai? ham nahīṅ mareṅge. ai rab, tū ne unheṅ sazā dene ke lie muqarrar kiyā hai. ai chaṭān, terī marzī hai ki wuh hamārī tarbiyat kareṅ.

¹³terī āṅkheṅ bilkul pāk haiṅ, is lie tū burā kām bardāsht nahīṅ kar saktā, tū ḳhāmoshī se zulm-o-tashaddud par nazar nahīṅ ḍāl saktā. to phir tū in bewafāoṅ kī harkatoṅ ko kis tarah bardāsht kartā hai? jab bedīn use haṛap kar letā jo us se kahīṅ zyādā rāstbāz hai to tū ḳhāmosh kyūṅ rahtā hai?

¹⁴tū ne hone diyā hai ki insān se machhliyoṅ kā sā sulūk kiyā jāe, ki use un samundarī jānwaroṅ kī tarah pakaṛā jāe, jin kā koī mālik nahīṅ.

¹⁵dushman un sab ko kāṅṭe ke zarī'e pānī se nikāl letā hai, apnā jāl ḍāl kar unheṅ pakaṛ letā hai. jab un kā baṛā ḍher jamā ho jātā hai to wuh ḳhush ho kar shādiyānā bajātā hai.

¹⁶tab wuh apne jāl ke sāmne baḳhūr jalā kar use jānwar qurbān kartā hai. kyūṅki usī ke wasīle se wuh aish-o-ishrat kī zindagī guzār saktā hai.

¹⁷kyā wuh musalsal apnā jāl ḍāltā aur qaumoṅ ko berahmī se maut ke ghāṭ utārtā rahe?