Read Roman Urdu Geo habaqqūq 2 Bible Online

habaqqūq 2 - Roman Urdu Geo bible

habaqqūq 2

¹ab maiṅ pahrā dene ke lie apnī burjī par chaṛh jāūṅgā, qile kī ūṅchī jagah par khaṛā ho kar chāroṅ taraf deḳhtā rahūṅgā. kyūṅki maiṅ jānanā chāhtā hūṅ ki allāh mujhe kyā kuchh batāegā, ki wuh merī shikāyat kā kyā jawāb degā.

²rab ne mujhe jawāb diyā, “jo kuchh tū ne royā meṅ dekhā hai use taḳhtoṅ par yūṅ likh de ki har guzarne wālā use rawānī se paṛh sake.

³kyūṅki wuh fauran pūrī nahīṅ ho jāegī balki muqarrarā waqt par āḳhirkār zāhir hogī, wuh jhūṭī sābit nahīṅ hogī. go der bhī lage to bhī sabar kar. kyūṅki āne wālā pahuṅchegā, wuh der nahīṅ karegā.

⁴maġhrūr ādmī phūlā huā hai aur andar se sīdhī rāh par nahīṅ chaltā. lekin rāstbāz īmān hī se jītā rahegā.

⁵yaqīnan mai ek bewafā sāthī hai. maġhrūr shaḳhs jītā nahīṅ rahegā, go wuh apne muṅh ko pātāl kī tarah khulā rakhtā aur us kī bhūk maut kī tarah kabhī nahīṅ miṭtī, wuh tamām aqwām aur ummateṅ apne pās jamā kartā hai.

⁶lekin yih sab us kā mazāq uṛā kar use lān-tān kareṅgī. wuh kaheṅgī, ‘us par afsos jo dūsroṅ kī chīzeṅ chhīn kar apnī milkiyat meṅ izāfā kartā hai, jo qarzdāroṅ kī zamānat par qabzā karne se daulatmand ho gayā hai. yih kār-rawāī kab tak jārī rahegī?’

⁷kyūṅki achānak hī aise log uṭheṅge jo tujhe kāṭeṅge, aise log jāg uṭheṅge jin ke sāmne tū thartharāne lagegā. tab tū ḳhud un kā shikār ban jāegā.

⁸chūṅki tū ne dīgar muta'addid aqwām ko lūṭ liyā hai is lie ab bachī huī ummateṅ tujhe hī lūṭ leṅgī. kyūṅki tujh se qatl-o-ġhārat sarzad huī hai, tū ne dehāt aur shahr par un ke bāshindoṅ samet shadīd zulm kiyā hai.

⁹us par afsos jo nājāiz nafā kamā kar apne ghar par āfat lātā hai, hālāṅki wuh āfat se bachne ke lie apnā ghoṅslā bulandiyoṅ par banā letā hai.

¹⁰tere mansūboṅ se muta'addid qaumeṅ tabāh huī haiṅ, lekin yih tere hī gharāne ke lie sharm kā bāis ban gayā hai. is gunāh se tū apne āp par maut kī sazā lāyā hai.

¹¹yaqīnan dīwāroṅ ke patthar chīḳh kar iltijā kareṅge aur lakaṛī ke shahtīr jawāb meṅ āh-o-zārī kareṅge.

¹²us par afsos jo shahr ko qatl-o-ġhārat ke zarī'e tāmīr kartā, jo ābādī ko nāinsāfī kī bunyād par qāim kartā hai.

¹³rabb-ul-afwāj ne muqarrar kiyā hai ki jo kuchh qaumoṅ ne baṛī mehnat-mashaqqat se hāsil kiyā use nazar-e-ātish honā hai, jo kuchh pāne ke lie ummateṅ thak jātī haiṅ wuh bekār hī hai.

¹⁴kyūṅki jis tarah samundar pānī se bharā huā hai, usī tarah duniyā ek din rab ke jalāl ke irfān se bhar jāegī.

¹⁵us par afsos jo apnā pyālā zahrīlī sharāb se bhar kar use apne paṛosiyoṅ ko pilā detā hai tāki unheṅ nashe meṅ lā kar un kī barahnagī se lutfandoz ho jāe.

¹⁶lekin ab terī bārī bhī ā gaī hai! terī shān-o-shaukat ḳhatm ho jāegī, aur terā muṅh kālā ho jāegā. ab ḳhud pī le! nashe meṅ ā kar apne kapṛe utār le. ġhazab kā jo pyālā rab ke dahne hāth meṅ hai wuh tere pās bhī pahuṅchegā. tab terī itnī ruswāī ho jāegī ki terī shān kā nām-o-nishān tak nahīṅ rahegā.

¹⁷jo zulm tū ne lubnān par kiyā wuh tujh par hī ġhālib āegā, jin jānwaroṅ ko tū ne wahāṅ tabāh kiyā un kī dahshat tujh hī par tārī ho jāegī. kyūṅki tujh se qatl-o-ġhārat sarzad huī hai, tū ne dehāt aur shahroṅ par un ke bāshindoṅ samet shadīd zulm kiyā hai.

¹⁸but kā kyā fāidā? āḳhir kisī māhir kārīgar ne use tarāshā yā ḍhāl liyā hai, aur wuh jhūṭ hī jhūṭ kī hidāyāt detā hai. kārīgar apne hāthoṅ ke but par bharosā rakhtā hai, hālāṅki wuh bol bhī nahīṅ saktā!

¹⁹us par afsos jo lakaṛī se kahtā hai, ‘jāg uṭh.’ aur ḳhāmosh patthar se, ‘khaṛā ho jā!’ kyā yih chīzeṅ hidāyat de saktī haiṅ? hargiz nahīṅ! un meṅ jān hī nahīṅ, ḳhwāh un par sonā yā chāṅdī kyūṅ na chaṛhāī gaī ho.

²⁰lekin rab apne muqaddas ghar meṅ maujūd hai. us ke huzūr pūrī duniyā ḳhāmosh rahe.”