Read Roman Urdu Geo safaniyāh 1 Bible Online

safaniyāh 1 - Roman Urdu Geo bible

safaniyāh 1

¹zail meṅ rab kā wuh kalām qalamband hai jo safaniyāh bin kūshī bin jidaliyāh bin amariyāh bin hizqiyāh par nāzil huā. us waqt yūsiyāh bin amūn yahūdāh kā bādshāh thā.

²rab farmātā hai, “maiṅ rū-e-zamīn par se sab kuchh miṭā ḍālūṅgā,

³insān-o-haiwān, parindoṅ, machhliyoṅ, ṭhokar khilāne wālī chīzoṅ aur bedīnoṅ ko. tab zamīn par insān kā nām-o-nishān tak nahīṅ rahegā.” yih rab kā farmān hai.

⁴“yahūdāh aur yarūshalam ke tamām bāshindoṅ par merī sazā nāzil hogī. bāl dewatā kī jitnī bhī butparastī ab tak rah gaī hai use nest-o-nābūd kar dūṅgā. na butparast pujāriyoṅ kā nām-o-nishān rahegā,

⁵na un kā jo chhatoṅ par sūraj, chāṅd balki āsmān ke pūre lashkar ko sijdā karte haiṅ, jo rab kī qasam khāne ke sāth sāth milkūm dewatā kī bhī qasam khāte haiṅ.

⁶jo rab kī pairawī chhoṛ kar na use talāsh karte, na us kī marzī daryāft karte haiṅ wuh sab ke sab tabāh ho jāeṅge.

⁷ab rab qādir-e-mutlaq ke sāmne ḳhāmosh ho jāo, kyūṅki rab kā din qarīb hī hai. rab ne is ke lie zabah kī qurbānī tayyār karke apne mehmānoṅ ko maḳhsūs-o-muqaddas kar diyā hai.”

⁸rab farmātā hai, “jis din maiṅ yih qurbānī chaṛhāūṅgā us din buzurgoṅ, shahzādoṅ aur ajnabī libās pahnane wāloṅ ko sazā dūṅgā.

⁹us din maiṅ un par sazā nāzil karūṅga jo tawahhumparastī ke bāis dahlīz par qadam rakhne se gurez karte haiṅ, jo apne mālik ke ghar ko zulm aur fareb se bhar dete haiṅ.”

¹⁰rab farmātā hai, “us din machhlī ke darwāze se zor kī chīḳheṅ, nae shahr se āh-o-zārī aur pahāṛiyoṅ se kaṛaktī āwāzeṅ sunāī deṅgī.

¹¹ai maktīs muhalle ke bāshindo, wāwailā karo, kyūṅki tumhāre tamām tājir halāk ho jāeṅge. wahāṅ ke jitne bhī saudāgar chāṅdī tolte haiṅ wuh nest-o-nābūd ho jāeṅge.

¹²tab maiṅ charāġh le kar yarūshalam ke kone kone meṅ un kā khoj lagāūṅgā jo is waqt baṛe ārām se baiṭhe haiṅ, ḳhwāh hālāt kitne bure kyūṅ na hoṅ. maiṅ un se nipaṭ lūṅgā jo sochte haiṅ, ‘rab kuchh nahīṅ karegā, na achchhā kām aur na burā.’

¹³aise logoṅ kā māl lūṭ liyā jāegā, un ke ghar mismār ho jāeṅge. wuh nae makān tāmīr to kareṅge lekin un meṅ raheṅge nahīṅ, angūr ke bāġh lagāeṅge lekin un kī mai pieṅge nahīṅ.”

¹⁴rab kā azīm din qarīb hī hai, wuh baṛī tezī se ham par nāzil ho rahā hai. suno! wuh din talḳh hogā. hālāt aise hoṅge ki bahādur faujī bhī chīḳh kar madad ke lie pukāreṅge.

¹⁵rab kā pūrā ġhazab nāzil hogā, aur log pareshānī aur musībat meṅ mubtalā raheṅge. har taraf tabāhī-o-barbādī, har taraf andherā hī andherā, har taraf ghane bādal chhāe raheṅge.

¹⁶us din dushman narsingā phūṅk kar aur jang ke nāre lagā kar qilāband shahroṅ aur burjoṅ par ṭūṭ paṛegā.

¹⁷rab farmātā hai, “chūṅki logoṅ ne merā gunāh kiyā hai is lie maiṅ un ko baṛī musībat meṅ uljhā dūṅgā. wuh andhoṅ kī tarah ṭaṭol ṭaṭol kar idhar udhar phireṅge, un kā ḳhūn ḳhāk kī tarah girāyā jāegā aur un kī nāsheṅ gobar kī tarah zamīn par phaiṅkī jāeṅgī.”

¹⁸jab rab kā ġhazab nāzil hogā to na un kā sonā, na chāṅdī unheṅ bachā sakegī. us kī ġhairat pūre mulk ko āg kī tarah bhasm kar degī. wuh mulk ke tamām bāshindoṅ ko halāk karegā, hāṅ un kā anjām haulnāk hogā.