Read Roman Urdu Geo zakariyāh 1 Bible Online

zakariyāh 1 - Roman Urdu Geo bible

zakariyāh 1

¹fāras ke bādshāh dārā kī hukūmat ke dūsre sāl aur āṭhweṅ mahīne [1] meṅ rab kā kalām nabī zakariyāh bin barakiyāh bin iddū par nāzil huā,

²“logoṅ se kah ki rab tumhāre bāpdādā se nihāyat hī nārāz thā. ab rabb-ul-afwāj farmātā hai ki mere pās wāpas āo to maiṅ bhī tumhāre pās wāpas āūṅgā.

⁴apne bāpdādā kī mānind na ho jinhoṅ ne na merī sunī, na merī taraf tawajjuh dī, go maiṅ ne us waqt ke nabiyoṅ kī mārifat unheṅ āgāh kiyā thā ki apnī burī rāhoṅ aur sharīr harkatoṅ se bāz āo.

⁵ab tumhāre bāpdādā kahāṅ haiṅ? aur kyā nabī abad tak zindā rahte haiṅ? donoṅ bahut der huī wafāt pā chuke haiṅ. [2]

⁶lekin tumhāre bāpdādā ke bāre meṅ jitnī bhī bāteṅ aur faisle maiṅ ne apne ḳhādimoṅ yānī nabiyoṅ kī mārifat farmāe wuh sab pūre hue. tab unhoṅ ne taubā karke iqrār kiyā, ‘rabb-ul-afwāj ne hamārī burī rāhoṅ aur harkatoṅ ke sabab se wuh kuchh kiyā hai jo us ne karne ko kahā thā’.”

⁷tīn māh ke bād rab ne nabī zakariyāh bin barakiyāh bin iddū par ek aur kalām nāzil kiyā. sabāt yānī 11weṅ mahīne kā 24wāṅ din [3] thā.

⁸us rāt maiṅ ne royā meṅ ek ādmī ko surḳh rang ke ghoṛe par sawār dekhā. wuh ghāṭī ke darmiyān ugne wālī mehndī kī jhāṛiyoṅ ke bīch meṅ rukā huā thā. us ke pīchhe surḳh, bhūre aur safed rang ke ghoṛe khaṛe the. un par bhī ādmī baiṭhe the. [4]

⁹jo farishtā mujh se bāt kar rahā thā us se maiṅ ne pūchhā, “mere āqā, in ghuṛsawāroṅ se kyā murād hai?” us ne jawāb diyā, “maiṅ tujhe un kā matlab dikhātā hūṅ.”

¹⁰tab mehndī kī jhāṛiyoṅ meṅ ruke hue ādmī ne jawāb diyā, “yih wuh haiṅ jinheṅ rab ne pūrī duniyā kī gasht karne ke lie bhejā hai.”

¹¹ab dīgar ghuṛsawār rab ke us farishte ke pās āe jo mehndī kī jhāṛiyoṅ ke darmiyān rukā huā thā. unhoṅ ne ittilā dī, “ham ne duniyā kī gasht lagāī to mālūm huā ki pūrī duniyā meṅ amn-o-amān hai.”

¹²tab rab kā farishtā bolā, “ai rabb-ul-afwāj, ab tū 70 sāloṅ se yarūshalam aur yahūdāh kī ābādiyoṅ se nārāz rahā hai. tū kab tak un par rahm na karegā?”

¹³jawāb meṅ rab ne mere sāth guftgū karne wāle farishte se narm aur tasallī dene wālī bāteṅ kīṅ.

¹⁴farishtā dubārā mujh se muḳhātib huā, “elān kar ki rabb-ul-afwāj farmātā hai, ‘maiṅ baṛī ġhairat se yarūshalam aur koh-e-siyyūn ke lie laṛūṅgā.

¹⁵maiṅ un dīgar aqwām se nihāyat nārāz hūṅ jo is waqt apne āp ko mahfūz samajhtī haiṅ. beshak maiṅ apnī qaum se kuchh nārāz thā, lekin in dīgar qaumoṅ ne use had se zyādā tabāh kar diyā hai. yih kabhī bhī merā maqsad nahīṅ thā.’

¹⁶rab farmātā hai, ‘ab maiṅ dubārā yarūshalam kī taraf māil ho kar us par rahm karūṅga. merā ghar nae sire se us meṅ tāmīr ho jāegā balki pūre shahr kī paimāish kī jāegī tāki use dubārā tāmīr kiyā jāe.’ yih rabb-ul-afwāj kā farmān hai.

¹⁷mazīd elān kar ki rabb-ul-afwāj farmātā hai, ‘mere shahroṅ meṅ dubārā kasrat kā māl pāyā jāegā. rab dubārā koh-e-siyyūn ko tasallī degā, dubārā yarūshalam ko chun legā’.”

¹⁸maiṅ ne apnī nigāh uṭhāī to kyā deḳhtā hūṅ ki chār sīṅg mere sāmne haiṅ.

¹⁹jo farishtā mujh se bāt kar rahā thā us se maiṅ ne pūchhā, “in kā kyā matlab hai?” us ne jawāb diyā, “yih wuh sīṅg haiṅ jinhoṅ ne yahūdāh aur isrāīl ko yarūshalam samet muntashir kar diyā thā.”

²⁰phir rab ne mujhe chār kārīgar dikhāe.

²¹maiṅ ne sawāl kiyā, “yih kyā karne ā rahe haiṅ?” us ne jawāb diyā, “mazkūrā sīṅgoṅ ne yahūdāh ko itne zor se muntashir kar diyā ki āḳhirkār ek bhī apnā sar nahīṅ uṭhā sakā. lekin ab yih kārīgar un meṅ dahshat phailāne āe haiṅ. yih un qaumoṅ ke sīṅgoṅ ko ḳhāk meṅ milā deṅge jinhoṅ ne un se yahūdāh ke bāshindoṅ ko muntashir kar diyā thā.”