Read Roman Urdu Geo zakariyāh 13 Bible Online

zakariyāh 13 - Roman Urdu Geo bible

zakariyāh 13

¹us din dāūd ke gharāne aur yarūshalam ke bāshindoṅ ke lie chashmā kholā jāegā jis ke zarī'e wuh apne gunāhoṅ aur nāpākī ko dūr kar sakeṅge.”

²rabb-ul-afwāj farmātā hai, “us din maiṅ tamām butoṅ ko mulk meṅ se miṭā dūṅgā. un kā nām-o-nishān tak nahīṅ rahegā, aur wuh kisī ko yād nahīṅ raheṅge. nabiyoṅ aur nāpākī kī rūh ko bhī maiṅ mulk se dūr karūṅga.

³is ke bād agar koī nabuwwat kare to us ke apne māṅ-bāp us se kaheṅge, ‘tū zindā nahīṅ rah saktā, kyūṅki tū ne rab kā nām le kar jhūṭ bolā hai.’ jab wuh peshgoiyāṅ sunāegā to us ke apne wālidain use chhed ḍāleṅge.

⁴us waqt har nabī ko apnī royā par sharm āegī jab nabuwwat karegā. wuh nabī kā bāloṅ se banā libās nahīṅ pahnegā tāki fareb de

⁵balki kahegā, ‘maiṅ nabī nahīṅ balki kāshtkār hūṅ. jawānī se hī merā peshā khetībāṛī rahā hai.’

⁶agar koī pūchhe, ‘to phir tere sīne par zaḳhmoṅ ke nishān kis tarah lage? to jawāb degā, maiṅ apne dostoṅ ke ghar meṅ zaḳhmī huā’.”

⁷rabb-ul-afwāj farmātā hai, “ai talwār, jāg uṭh. mere gallābān par hamlā kar, us par jo mere qarīb hai. gallābān ko mār ḍāl tāki bheṛ-bakriyāṅ titar-bitar ho jāeṅ. maiṅ ḳhud apne hāth ko chhoṭoṅ ke ḳhilāf uṭhāūṅgā.”

⁸rab farmātā hai, “pūre mulk meṅ logoṅ ke tīn hissoṅ meṅ se do hissoṅ ko miṭāyā jāegā. do hisse halāk ho jāeṅge aur sirf ek hī hissā bachā rahegā.

⁹is bache hue hisse ko maiṅ āg meṅ ḍāl kar chāṅdī yā sone kī tarah pāk-sāf karūṅga. tab wuh merā nām pukāreṅge, aur maiṅ un kī sunūṅgā. maiṅ kahūṅgā, ‘yih merī qaum hai,’ aur wuh kaheṅge, ‘rab hamārā ḳhudā hai’.”