Read Roman Urdu Geo zakariyāh 14 Bible Online

zakariyāh 14 - Roman Urdu Geo bible

zakariyāh 14

¹ai yarūshalam, rab kā wuh din āne wālā hai jab dushman terā māl lūṭ kar tere darmiyān hī use āpas meṅ taqsīm karegā.

²kyūṅki maiṅ tamām aqwām ko yarūshalam se laṛne ke lie jamā karūṅga. shahr dushman ke qabze meṅ āegā, gharoṅ ko lūṭ liyā jāegā aur auratoṅ kī ismatdarī kī jāegī. shahr ke ādhe bāshinde jilāwatan ho jāeṅge, lekin bāqī hissā us meṅ zindā chhoṛā jāegā.

³lekin phir rab ḳhud nikal kar in aqwām se yūṅ laṛegā jis tarah tab laṛtā hai jab kabhī maidān-e-jang meṅ ā jātā hai.

⁴us din us ke pāoṅ yarūshalam ke mashriq meṅ zaitūn ke pahāṛ par khaṛe hoṅge. tab pahāṛ phaṭ jāegā. us kā ek hissā shimāl kī taraf aur dūsrā junūb kī taraf khisak jāegā. bīch meṅ mashriq se maġhrib kī taraf ek baṛī wādī paidā ho jāegī.

⁵tum mere pahāṛoṅ kī is wādī meṅ bhāg kar panāh loge, kyūṅki yih āzal tak pahuṅchāegī. jis tarah tum yahūdāh ke bādshāh uzziyāh ke ayyām meṅ apne āp ko zalzale se bachāne ke lie yarūshalam se bhāg nikle the usī tarah tum mazkūrā wādī meṅ dauṛ āoge. tab rab merā ḳhudā āegā, aur tamām muqaddasīn us ke sāth hoṅge.

⁶us din na taptī garmī hogī, na sardī yā pālā.

⁷wuh ek munfarid din hogā jo rab hī ko mālūm hogā. na din hogā aur na rāt balki shām ko bhī raushnī hogī.

⁸us din yarūshalam se zindagī kā pānī bah niklegā. us kī ek shāḳh mashriq ke bahīrā-e-murdār kī taraf aur dūsrī shāḳh maġhrib ke samundar kī taraf bahegī. is pānī meṅ na garmiyoṅ meṅ, na sardiyoṅ meṅ kabhī kamī hogī.

⁹rab pūrī duniyā kā bādshāh hogā. us din rab wāhid ḳhudā hogā, log sirf usī ke nām kī parastish kareṅge.

¹⁰pūrā mulk shimālī shahr jibā se le kar yarūshalam ke junūb meṅ wāqe shahr rimmon tak khulā maidān ban jāegā. sirf yarūshalam apnī hī ūṅchī jagah par rahegā. us kī purānī hudūd bhī qāim raheṅgī yānī binyamīn ke darwāze se le kar purāne darwāze aur kone ke darwāze tak, phir hanan-el ke burj se le kar us jagah tak jahāṅ shāhī mai banāī jātī hai.

¹¹log us meṅ baseṅge, aur āindā use kabhī pūrī tabāhī ke lie maḳhsūs nahīṅ kiyā jāegā. yarūshalam mahfūz jagah rahegī.

¹²lekin jo qaumeṅ yarūshalam se laṛne nikleṅ un par rab ek haulnāk bīmārī lāegā. log abhī khaṛe ho sakeṅge ki un ke jism saṛ jāeṅge. āṅkheṅ apne ḳhānoṅ meṅ aur zabān muṅh meṅ gal jāegī.

¹³us din rab un meṅ baṛī abtarī paidā karegā. har ek apne sāthī kā hāth pakaṛ kar us par hamlā karegā.

¹⁴yahūdāh bhī yarūshalam se [11] laṛegā. tamām paṛosī aqwām kī daulat wahāṅ jamā ho jāegī yānī kasrat kā sonā, chāṅdī aur kapṛe.

¹⁵na sirf insān mohlak bīmārī kī zad meṅ āegā balki jānwar bhī. ghoṛe, ḳhachchar, ūṅṭ, gadhe aur bāqī jitne jānwar un lashkargāhoṅ meṅ hoṅge un sab par yihī āfat āegī.

¹⁶to bhī un tamām aqwām ke kuchh log bach jāeṅge jinhoṅ ne yarūshalam par hamlā kiyā thā. ab wuh sāl-ba-sāl yarūshalam āte raheṅge tāki hamāre bādshāh rabb-ul-afwāj kī parastish kareṅ aur jhoṅpṛiyoṅ kī īd manāeṅ.

¹⁷jab kabhī duniyā kī tamām aqwām meṅ se koī hamāre bādshāh rabb-ul-afwāj ko sijdā karne ke lie yarūshalam na āe to us kā mulk bārish se mahrūm rahegā.

¹⁸agar misrī qaum yarūshalam na āe aur hissā na le to wuh bārish se mahrūm rahegī. yūṅ rab un qaumoṅ ko sazā degā jo jhoṅpṛiyoṅ kī īd manāne ke lie yarūshalam nahīṅ āeṅgī.

¹⁹jitnī bhī qaumeṅ jhoṅpṛiyoṅ kī īd manāne ke lie yarūshalam na āeṅ unheṅ yihī sazā milegī, ḳhwāh misr ho yā koī aur qaum.

²⁰us din ghoṛoṅ kī ghanṭiyoṅ par likhā hogā, “rab ke lie maḳhsūs-o-muqaddas.” aur rab ke ghar kī degeṅ un muqaddas kaṭoroṅ ke barābar hoṅgī jo qurbāngāh ke sāmne istemāl hote haiṅ.

²¹hāṅ, yarūshalam aur yahūdāh meṅ maujūd har deg rabb-ul-afwāj ke lie maḳhsūs-o-muqaddas hogī. jo bhī qurbāniyāṅ pesh karne ke lie yarūshalam āe wuh unheṅ apnī qurbāniyāṅ pakāne ke lie istemāl karegā. us din se rabb-ul-afwāj ke ghar meṅ koī bhī saudāgar pāyā nahīṅ jāegā.