Read Roman Urdu Geo zakariyāh 2 Bible Online

zakariyāh 2 - Roman Urdu Geo bible

zakariyāh 2

¹maiṅ ne apnī nazar dubārā uṭhāī to ek ādmī ko dekhā jis ke hāth meṅ fītā thā.

²maiṅ ne pūchhā, “āp kahāṅ jā rahe haiṅ?” us ne jawāb diyā, “yarūshalam kī paimāish karne jā rahā hūṅ. maiṅ mālūm karnā chāhtā hūṅ ki shahr kī lambāī aur chauṛāī kitnī honī chāhie.”

³tab wuh farishtā rawānā huā jo ab tak mujh se bāt kar rahā thā. lekin rāste meṅ ek aur farishtā us se milne āyā.

⁴is dūsre farishte ne kahā, “bhāg kar paimāish karne wāle naujawān ko batā de, ‘insān-o-haiwān kī itnī baṛī tādād hogī ki āindā yarūshalam kī fasīl nahīṅ hogī.

⁵rab farmātā hai ki us waqt maiṅ āg kī chārdīwārī ban kar us kī hifāzat karūṅga, maiṅ us ke darmiyān rah kar us kī izzat-o-jalāl kā bāis hūṅgā’.”

⁶rab farmātā hai, “uṭho, uṭho! shimālī mulk se bhāg āo. kyūṅki maiṅ ne ḳhud tumheṅ chāroṅ taraf muntashir kar diyā thā.

⁷lekin ab maiṅ farmātā hūṅ ki wahāṅ se nikal āo. siyyūn ke jitne log bābal [5] meṅ rahte haiṅ wahāṅ se bach nikleṅ!”

⁸kyūṅki rabb-ul-afwāj jis ne mujhe bhejā wuh un qaumoṅ ke bāre meṅ jinhoṅ ne tumheṅ lūṭ liyā farmātā hai, “jo tumheṅ chheṛe wuh merī āṅkh kī putlī ko chheṛegā.

⁹is lie yaqīn karo ki maiṅ apnā hāth un ke ḳhilāf uṭhāūṅgā. un ke apne ġhulām unheṅ lūṭ leṅge.” tab tum jān loge ki rabb-ul-afwāj ne mujhe bhejā hai.

¹⁰rab farmātā hai, “ai siyyūn beṭī, ḳhushī ke nāre lagā! kyūṅki maiṅ ā rahā hūṅ, maiṅ tere darmiyān sukūnat karūṅga.

¹¹us din bahut sī aqwām mere sāth paiwast ho kar merī qaum kā hissā ban jāeṅgī. maiṅ ḳhud tere darmiyān sukūnat karūṅga.” tab tū jān legī ki rabb-ul-afwāj ne mujhe tere pās bhejā hai.

¹²muqaddas mulk meṅ yahūdāh rab kī maurūsī zamīn banegā, aur wuh yarūshalam ko dubārā chun legā.

¹³tamām insān rab ke sāmne ḳhāmosh ho jāeṅ, kyūṅki wuh uṭh kar apnī muqaddas sukūnatgāh se nikal āyā hai.