Read Roman Urdu Geo zakariyāh 9 Bible Online

zakariyāh 9 - Roman Urdu Geo bible

zakariyāh 9

¹rab kā kalām mulk-e-hadrāk ke ḳhilāf hai, aur wuh damishq par nāzil hogā. kyūṅki insān aur isrāīl ke tamām qabīloṅ kī āṅkheṅ rab kī taraf deḳhtī haiṅ.

²damishq kī sarhad par wāqe hamāt balki sūr aur saidā bhī is kalām se muta'assir ho jāeṅge, ḳhwāh wuh kitne dānishmand kyūṅ na hoṅ.

³beshak sūr ne apne lie mazbūt qilā banā liyā hai, beshak us ne sone-chāṅdī ke aise ḍher lagāe haiṅ jaise ām taur par galiyoṅ meṅ ret yā kachre ke ḍher lagā lie jāte haiṅ.

⁴lekin rab us par qabzā karke us kī fauj ko samundar meṅ phaiṅk degā. tab shahr nazar-e-ātish ho jāegā.

⁵yih dekh kar askqalūn ghabrā jāegā aur ġhazzā taṛap uṭhegā. aqrūn bhī laraz uṭhegā, kyūṅki us kī ummīd jātī rahegī. ġhazzā kā bādshāh halāk aur askqalūn ġhairābād ho jāegā.

⁶ashdūd meṅ do nasloṅ ke log baseṅge. rab farmātā hai, “jo kuchh filistiyoṅ ke lie faḳhr kā bāis hai use maiṅ miṭā dūṅgā.

⁷maiṅ un kī butparastī ḳhatm karūṅga. āindā wuh gosht ko ḳhūn ke sāth aur apnī ghinaunī qurbāniyāṅ nahīṅ khāeṅge. tab jo bach jāeṅge mere parastār hoṅge aur yahūdāh ke ḳhāndānoṅ meṅ shāmil ho jāeṅge. aqrūn ke filistī yūṅ merī qaum meṅ shāmil ho jāeṅge jis tarah qadīm zamāne meṅ yabūsī merī qaum meṅ shāmil ho gae.

⁸maiṅ ḳhud apne ghar kī pahrādārī karūṅga tāki āindā jo bhī āte yā jāte waqt wahāṅ se guzare us par hamlā na kare, koī bhī zālim merī qaum ko tang na kare. ab se maiṅ ḳhud us kī dekh-bhāl karūṅga.

⁹ai siyyūn beṭī, shādiyānā bajā! ai yarūshalam beṭī, shādmānī ke nāre lagā! dekh, terā bādshāh tere pās ā rahā hai. wuh rāstbāz aur fathmand hai, wuh halīm hai aur gadhe par, hāṅ gadhī ke bachche par sawār hai.

¹⁰maiṅ ifrāīm se rath aur yarūshalam se ghoṛe dūr kar dūṅgā. jang kī kamān ṭūṭ jāegī. mau'ūdā bādshāh [8] ke kahne par tamām aqwām meṅ salāmatī qāim ho jāegī. us kī hukūmat ek samundar se dūsre tak aur daryā-e-furāt se duniyā kī intihā tak mānī jāegī.

¹¹ai merī qaum, maiṅ ne tere sāth ek ahd bāndhā jis kī tasdīq qurbāniyoṅ ke ḳhūn se huī, is lie maiṅ tere qaidiyoṅ ko pānī se mahrūm gaṛhe se rihā karūṅga.

¹²ai purummīd qaidiyo, qile ke pās wāpas āo! kyūṅki āj hī maiṅ elān kartā hūṅ ki tumhārī har taqlīf ke iwaz maiṅ tumheṅ do barkateṅ baḳhsh dūṅgā.

¹³yahūdāh merī kamān hai aur isrāīl mere tīr jo maiṅ dushman ke ḳhilāf chalāūṅgā. ai siyyūn beṭī, maiṅ tere beṭoṅ ko yūnān ke faujiyoṅ se laṛne ke lie bhejūṅgā, maiṅ tujhe sūrme kī talwār kī mānind banā dūṅgā.”

¹⁴tab rab un par zāhir ho kar bijlī kī tarah apnā tīr chalāegā. rab qādir-e-mutlaq narsingā phūṅk kar junūbī āṅdhiyoṅ meṅ āegā.

¹⁵rabb-ul-afwāj ḳhud isrāīliyoṅ ko panāh degā. tab wuh dushman ko khā khā kar us ke phaiṅke hue pattharoṅ ko ḳhāk meṅ milā deṅge aur ḳhūn ko mai kī tarah pī pī kar shor machāeṅge. wuh qurbānī ke ḳhūn se bhare kaṭore kī tarah bhar jāeṅge, qurbāngāh ke konoṅ jaise ḳhūnālūdā ho jāeṅge.

¹⁶us din rab un kā ḳhudā unheṅ jo us kī qaum kā rewaṛ haiṅ chhuṭkārā degā. tab wuh us ke mulk meṅ tāj ke jawāhir kī mānind chamak uṭheṅge.

¹⁷wuh kitne dilkash aur ḳhūbsūrat lageṅge! anāj aur mai kī kasrat se kuṅwāre-kuṅwāriyāṅ phalne phūlne lageṅge.