Read Roman Urdu Geo malākī 2 Bible Online

malākī 2 - Roman Urdu Geo bible

malākī 2

¹ai imāmo, ab mere faisle par dhyān do!”

²rabb-ul-afwāj farmātā hai, “merī suno, pūre dil se mere nām kā ehtirām karo, warnā maiṅ tum par lānat bhejūṅgā, maiṅ tumhārī barkatoṅ ko lānatoṅ meṅ tabdīl kar dūṅgā. balki maiṅ yih kar bhī chukā hūṅ, kyūṅki tum ne pūre dil se mere nām kā ehtirām nahīṅ kiyā.

³tumhāre chāl-chalan ke sabab se maiṅ tumhārī aulād ko ḍānṭūṅgā. maiṅ tumhārī īd kī qurbāniyoṅ kā gobar tumhāre muṅh par phaiṅk dūṅgā, aur tumheṅ us ke samet bāhar phaiṅkā jāegā.”

⁴rabb-ul-afwāj farmātā hai, “tab tum jān loge ki maiṅ ne tum par yih faislā kiyā hai tāki merā lāwī ke qabīle ke sāth ahd qāim rahe.

⁵kyūṅki maiṅ ne ahd bāndh kar lāwiyoṅ se zindagī aur salāmatī kā wādā kiyā thā, aur maiṅ ne wāde ko pūrā bhī kiyā. us waqt lāwī merā ḳhauf mānte balki mere nām se dahshat khāte the.

⁶wuh qābil-e-etimād tālīm dete the, aur un kī zabān par jhūṭ nahīṅ hotā thā. wuh salāmatī se aur sīdhī rāh par mere sāth chalte the, aur bahut se log un ke bāis gunāh se dūr ho gae.

⁷imāmoṅ kā farz hai ki wuh sahīh tālīm mahfūz rakheṅ, aur logoṅ ko un se hidāyat hāsil karnī chāhie. kyūṅki imām rabb-ul-afwāj kā paiġhambar hai.

⁸lekin tum sahīh rāh se haṭ gae ho. tumhārī tālīm bahutoṅ ke lie ṭhokar kā bāis ban gaī hai.” rabb-ul-afwāj farmātā hai, “tum ne lāwiyoṅ ke sāth mere ahd ko ḳhāk meṅ milā diyā hai.

⁹is lie maiṅ ne tumheṅ tamām qaum ke sāmne zalīl kar diyā hai, sab tumheṅ haqīr jānte haiṅ. kyūṅki tum merī rāhoṅ par nahīṅ rahte balki tālīm dete waqt jānibdārī dikhāte ho.”

¹⁰kyā ham sab kā ek hī bāp nahīṅ? ek hī ḳhudā ne hameṅ ḳhalaq kiyā hai. to phir ham ek dūsre se bewafāī karke apne bāpdādā ke ahd kī behurmatī kyūṅ kar rahe haiṅ?

¹¹yahūdāh bewafā ho gayā hai. isrāīl aur yarūshalam meṅ makrūh harkateṅ sarzad huī haiṅ, kyūṅki yahūdāh ke ādmiyoṅ ne rab ke ghar kī behurmatī kī hai, us maqdis kī jo rab ko pyārā hai. kis tarah? unhoṅ ne dīgar aqwām kī butparast auratoṅ se shādī kī hai. [1]

¹²lekin jis ne bhī aisā kiyā hai use rab jaṛ se yāqūb ke ḳhaimoṅ se nikāl phaiṅkegā, ḳhwāh wuh rabb-ul-afwāj ko kitnī qurbāniyāṅ pesh kyūṅ na kare.

¹³tum se ek aur ḳhatā bhī sarzad hotī hai. beshak rab kī qurbāngāh ko apne āṅsū'oṅ se tar karo, beshak rote aur karāhte raho ki rab na hamārī qurbāniyoṅ par tawajjuh detā, na unheṅ ḳhushī se hamāre hāth se qabūl kartā hai. lekin yih karne se koī farq nahīṅ paṛegā.

¹⁴tum pūchhte ho, “kyūṅ?” is lie ki shādī karte waqt rab ḳhud gawāh hotā hai. aur ab tū apnī bīwī se bewafā ho gayā hai, go wuh terī jīwansāthī hai jis se tū ne shādī kā ahd bāndhā thā.

¹⁵kyā rab ne shauhar aur bīwī ko ek nahīṅ banāyā, ek jism jis meṅ rūh hai? aur yih ek jism kyā chāhtā hai? allāh kī taraf se aulād. chunāṅche apnī rūh meṅ ḳhabardār raho! apnī bīwī se bewafā na ho jā!

¹⁶kyūṅki rabb-ul-afwāj jo isrāīl kā ḳhudā hai farmātā hai, “maiṅ talāq se nafrat kartā hūṅ aur us se mutanaffir hūṅ jo zulm se mulabbas hotā hai. chunāṅche apnī rūh meṅ ḳhabardār rah kar is tarah kā bewafā rawayyā iḳhtiyār na karo!”

¹⁷tumhārī bātoṅ ko sun sun kar rab thak gayā hai. tum pūchhte ho, “ham ne use kis tarah thakā diyā hai?” is meṅ ki tum dāwā karte ho, “badī karne wālā rab kī nazar meṅ ṭhīk hai, wuh aise logoṅ ko pasand kartā hai.” tum yih bhī kahte ho, “allāh kahāṅ hai? wuh insāf kyūṅ nahīṅ kartā?”