Read Roman Urdu Geo malākī 4 Bible Online

malākī 4 - Roman Urdu Geo bible

malākī 4

¹rabb-ul-afwāj farmātā hai, “yaqīnan wuh din āne wālā hai jab merā ġhazab bhaṛaktī bhaṭṭī kī tarah nāzil ho kar har gustāḳh aur bedīn shaḳhs ko bhūse kī tarah bhasm kar degā. wuh jaṛ se le kar shāḳh tak miṭ jāeṅge.

²lekin tum par jo mere nām kā ḳhauf mānte ho rāstī kā sūraj tulū hogā, aur us ke paroṅ tale shifā hogī. tab tum bāhar nikal kar khule chhoṛe hue bachhṛoṅ kī tarah ḳhushī se kūdte phāṅdte phiroge.

³jis din maiṅ yih kuchh karūṅga us din tum bedīnoṅ ko yūṅ kuchal ḍāloge ki wuh pāoṅ tale kī ḳhāk ban jāeṅge.” yih rabb-ul-afwāj kā farmān hai.

⁴“mere ḳhādim mūsā kī sharīat ko yād rakho yānī wuh tamām ahkām aur hidāyāt jo maiṅ ne use horib yānī sīnā pahāṛ par isrāīlī qaum ke lie dī thīṅ.

⁵rab ke us azīm aur haulnāk din se pahle maiṅ tumhāre pās ilyās nabī ko bhejūṅgā.

⁶jab wuh āegā to bāp kā dil beṭe aur beṭe kā dil bāp kī taraf māil karegā tāki maiṅ ā kar mulk ko apne lie maḳhsūs karke nest-o-nābūd na karūṅ.”