Read Roman Urdu Geo mattī 11 Bible Online

mattī 11 - Roman Urdu Geo bible

mattī 11

¹apne shāgirdoṅ ko yih hidāyāt dene ke bād īsā un ke shahroṅ meṅ tālīm dene aur munādī karne ke lie rawānā huā.

²yahyā ne jo us waqt jel meṅ thā sunā ki īsā kyā kyā kar rahā hai. is par us ne apne shāgirdoṅ ko us ke pās bhej diyā

³tāki wuh us se pūchheṅ, “kyā āp wuhī haiṅ jise ānā hai yā ham kisī aur ke intizār meṅ raheṅ?”

⁴īsā ne jawāb diyā, “yahyā ke pās wāpas jā kar use sab kuchh batā denā jo tum ne dekhā aur sunā hai.

⁵‘andhe deḳhte, langaṛe chalte phirte haiṅ, koṛhiyoṅ ko pāk-sāf kiyā jātā hai, bahre sunte haiṅ, murdoṅ ko zindā kiyā jātā hai aur ġharīboṅ ko allāh kī ḳhushḳhabrī sunāī jātī hai.’

⁶mubārak hai wuh jo mere sabab se ṭhokar khā kar bargashtā nahīṅ hotā.”

⁷yahyā ke yih shāgird chale gae to īsā hujūm se yahyā ke bāre meṅ bāt karne lagā, “tum registān meṅ kyā deḳhne gae the? ek sarkanḍā jo hawā ke har jhoṅke se hiltā hai? beshak nahīṅ.

⁸yā kyā wahāṅ jā kar aise ādmī kī tawaqqo kar rahe the jo nafīs aur mulāim libās pahne hue hai? nahīṅ, jo shāndār kapṛe pahante haiṅ wuh shāhī mahaloṅ meṅ pāe jāte haiṅ.

⁹to phir tum kyā deḳhne gae the? ek nabī ko? bilkul sahīh, balki meṅ tum ko batātā hūṅ ki wuh nabī se bhī baṛā hai.

¹⁰usī ke bāre meṅ kalām-e-muqaddas meṅ likhā hai, ‘dekh, maiṅ apne paiġhambar ko tere āge āge bhej detā hūṅ jo tere sāmne rāstā tayyār karegā.’

¹¹maiṅ tum ko sach batātā hūṅ ki is duniyā meṅ paidā hone wālā koī bhī shaḳhs yahyā se baṛā nahīṅ hai. to bhī āsmān kī bādshāhī meṅ dāḳhil hone wālā sab se chhoṭā shaḳhs us se baṛā hai.

¹²yahyā baptismā dene wāle kī ḳhidmat se le kar āj tak āsmān kī bādshāhī par zabardastī kī jā rahī hai, aur zabardast use chhīn rahe haiṅ.

¹³kyūṅki tamām nabī aur tauret ne yahyā ke daur tak is ke bāre meṅ peshgoī kī hai.

¹⁴aur agar tum yih mānane ke lie tayyār ho to māno ki wuh ilyās nabī hai jise ānā thā.

¹⁵jo sun saktā hai wuh sun le!

¹⁶maiṅ is nasl ko kis se tashbīh dūṅ? wuh un bachchoṅ kī mānind haiṅ jo bāzār meṅ baiṭhe khel rahe haiṅ. un meṅ se kuchh ūṅchī āwāz se dūsre bachchoṅ se shikāyat kar rahe haiṅ,

¹⁷‘ham ne bāṅsrī bajāī to tum na nāche. phir ham ne nohā ke gīt gāe, lekin tum ne chhātī pīṭ kar mātam na kiyā.’

¹⁸dekho, yahyā āyā aur na khāyā, na piyā. yih dekh kar log kahte haiṅ ki us meṅ badrūh hai.

¹⁹phir ibn-e-ādam khātā aur pītā huā āyā. ab kahte haiṅ, ‘dekho yih kaisā peṭū aur sharābī hai. aur wuh ṭaiks lene wāloṅ aur gunāhgāroṅ kā dost bhī hai.’ lekin hikmat apne āmāl se hī sahīh sābit huī hai.”

²⁰phir īsā un shahroṅ ko ḍānṭne lagā jin meṅ us ne zyādā mojize kie the, kyūṅki unhoṅ ne taubā nahīṅ kī thī.

²¹“ai ḳhurāzīn, tujh par afsos! bait-saidā, tujh par afsos! agar sūr aur saidā meṅ wuh mojize kie gae hote jo tum meṅ hue to wahāṅ ke log kab ke ṭāṭ oṛh kar aur sar par rākh ḍāl kar taubā kar chuke hote.

²²jī hāṅ, adālat ke din tumhārī nisbat sūr aur saidā kā hāl zyādā qābil-e-bardāsht hogā.

²³aur ai kafarnahūm, kyā tujhe āsmān tak sarfarāz kiyā jāegā? hargiz nahīṅ, balki tū utartā utartā pātāl tak pahuṅchegā. agar sadūm meṅ wuh mojize kie gae hote jo tujh meṅ hue haiṅ to wuh āj tak qāim rahtā.

²⁴hāṅ, adālat ke din terī nisbat sadūm kā hāl zyādā qābil-e-bardāsht hogā.”

²⁵us waqt īsā ne kahā, “ai bāp, āsmān-o-zamīn ke mālik! maiṅ terī tamjīd kartā hūṅ ki tū ne yih bāteṅ dānāoṅ aur aqalmandoṅ se chhupā kar chhoṭe bachchoṅ par zāhir kar dī haiṅ.

²⁶hāṅ mere bāp, yihī tujhe pasand āyā.

²⁷mere bāp ne sab kuchh mere sapurd kar diyā hai. koī bhī farzand ko nahīṅ jāntā siwāe bāp ke. aur koī bāp ko nahīṅ jāntā siwāe farzand ke aur un logoṅ ke jin par farzand bāp ko zāhir karnā chāhtā hai.

²⁸ai thakemānde aur bojh tale dabe hue logo, sab mere pās āo! maiṅ tum ko ārām dūṅgā.

²⁹merā jūā apne ūpar uṭhā kar mujh se sīkho, kyūṅki maiṅ halīm aur narmdil hūṅ. yūṅ karne se tumhārī jāneṅ ārām pāeṅgī,

³⁰kyūṅki merā jūā mulāim aur merā bojh halkā hai.”