Read Roman Urdu Geo mattī 12 Bible Online

mattī 12 - Roman Urdu Geo bible

mattī 12

¹un dinoṅ meṅ īsā anāj ke khetoṅ meṅ se guzar rahā thā. sabat kā din thā. chalte chalte us ke shāgirdoṅ ko bhūk lagī aur wuh anāj kī bāleṅ toṛ toṛ kar khāne lage.

²yih dekh kar farīsiyoṅ ne īsā se shikāyat kī, “dekho, āp ke shāgird aisā kām kar rahe haiṅ jo sabat ke din manā hai.”

³īsā ne jawāb diyā, “kyā tum ne nahīṅ paṛhā ki dāūd ne kyā kiyā jab use aur us ke sāthiyoṅ ko bhūk lagī?

⁴wuh allāh ke ghar meṅ dāḳhil huā aur apne sāthiyoṅ samet rab ke lie maḳhsūsshudā roṭiyāṅ khāīṅ, agarche unheṅ is kī ijāzat nahīṅ thī balki sirf imāmoṅ ko?

⁵yā kyā tum ne tauret meṅ nahīṅ paṛhā ki go imām sabat ke din bait-ul-muqaddas meṅ ḳhidmat karte hue ārām karne kā hukm toṛte haiṅ to bhī wuh be'ilzām ṭhaharte haiṅ?

⁶maiṅ tumheṅ batātā hūṅ ki yahāṅ wuh hai jo bait-ul-muqaddas se afzal hai.

⁷kalām-e-muqaddas meṅ likhā hai, ‘maiṅ qurbānī nahīṅ balki rahm pasand kartā hūṅ.’ agar tum is kā matlab samajhte to bequsūroṅ ko mujrim na ṭhahrāte.

⁸kyūṅki ibn-e-ādam sabat kā mālik hai.”

⁹wahāṅ se chalte chalte wuh un ke ibādatḳhāne meṅ dāḳhil huā.

¹⁰us meṅ ek ādmī thā jis kā hāth sūkhā huā thā. log īsā par ilzām lagāne kā koī bahānā talāsh kar rahe the, is lie unhoṅ ne us se pūchhā, “kyā sharīat sabat ke din shifā dene kī ijāzat detī hai?”

¹¹īsā ne jawāb diyā, “agar tum meṅ se kisī kī bheṛ sabat ke din gaṛhe meṅ gir jāe to kyā use nahīṅ nikāloge?

¹²aur bheṛ kī nisbat insān kī kitnī zyādā qadar-o-qīmat hai! ġharz sharīat nek kām karne kī ijāzat detī hai.”

¹³phir us ne us ādmī se jis kā hāth sūkhā huā thā kahā, “apnā hāth āge baṛhā.” us ne aisā kiyā to us kā hāth dūsre hāth kī mānind tandurust ho gayā.

¹⁴is par farīsī nikal kar āpas meṅ īsā ko qatl karne kī sāzisheṅ karne lage.

¹⁵jab īsā ne yih jān liyā to wuh wahāṅ se chalā gayā. bahut se log us ke pīchhe chal rahe the. us ne un ke tamām marīzoṅ ko shifā de kar

¹⁶unheṅ tākīd kī, “kisī ko mere bāre meṅ na batāo.”

¹⁷yūṅ yasāyāh nabī kī yih peshgoī pūrī huī,

¹⁸‘dekho, merā ḳhādim jise maiṅ ne chun liyā hai, merā pyārā jo mujhe pasand hai. maiṅ apne rūh ko us par ḍālūṅgā, aur wuh aqwām meṅ insāf kā elān karegā.

¹⁹wuh na to jhagaṛegā, na chillāegā. galiyoṅ meṅ us kī āwāz sunāī nahīṅ degī.

²⁰na wuh kuchle hue sarkanḍe ko toṛegā, na bujhtī huī battī ko bujhāegā jab tak wuh insāf ko ġhalbā na baḳhshe.

²¹usī ke nām se qaumeṅ ummīd rakheṅgī.’

²²phir ek ādmī ko īsā ke pās lāyā gayā jo badrūh kī girift meṅ thā. wuh andhā aur gūṅgā thā. īsā ne use shifā dī to gūṅgā bolne aur deḳhne lagā.

²³hujūm ke tamām log hakkā-bakkā rah gae aur pūchhne lage, “kyā yih ibn-e-dāūd nahīṅ?”

²⁴lekin jab farīsiyoṅ ne yih sunā to unhoṅ ne kahā, “yih sirf badrūhoṅ ke sardār bāl-zabūl kī mārifat badrūhoṅ ko nikāltā hai.”

²⁵un ke yih ḳhayālāt jān kar īsā ne un se kahā, “jis bādshāhī meṅ phūṭ paṛ jāe wuh tabāh ho jāegī. aur jis shahr yā gharāne kī aisī hālat ho wuh bhī qāim nahīṅ rah saktā.

²⁶isī tarah agar iblīs apne āp ko nikāle to phir us meṅ phūṭ paṛ gaī hai. is sūrat meṅ us kī bādshāhī kis tarah qāim rah saktī hai?

²⁷aur agar maiṅ badrūhoṅ ko bāl-zabūl kī madad se nikāltā hūṅ to tumhāre beṭe unheṅ kis ke zarī'e nikālte haiṅ? chunāṅche wuhī is bāt meṅ tumhāre munsif hoṅge.

²⁸lekin agar maiṅ allāh ke rūh kī mārifat badrūhoṅ ko nikāl detā hūṅ to phir allāh kī bādshāhī tumhāre pās pahuṅch chukī hai.

²⁹kisī zor-āwar ādmī ke ghar meṅ ghus kar us kā māl-o-asbāb lūṭnā kis tarah mumkin hai jab tak ki use bāndhā na jāe? phir hī use lūṭā jā saktā hai.

³⁰jo mere sāth nahīṅ wuh mere ḳhilāf hai aur jo mere sāth jamā nahīṅ kartā wuh bikhertā hai.

³¹ġharz maiṅ tum ko batātā hūṅ ki insān kā har gunāh aur kufr muāf kiyā jā sakegā siwāe rūh-ul-quds ke ḳhilāf kufr bakne ke. ise muāf nahīṅ kiyā jāegā.

³²jo ibn-e-ādam ke ḳhilāf bāt kare use muāf kiyā jā sakegā, lekin jo rūh-ul-quds ke ḳhilāf bāt kare use na is jahān meṅ aur na āne wāle jahān meṅ muāf kiyā jāegā.

³³achchhe phal ke lie achchhe daraḳht kī zarūrat hotī hai. ḳharāb daraḳht se ḳharāb phal miltā hai. daraḳht us ke phal se hī pahchānā jātā hai.

³⁴ai sāṅp ke bachcho! tum jo bure ho kis tarah achchhī bāteṅ kar sakte ho? kyūṅki jis chīz se dil labrez hotā hai wuh chhalak kar zabān par ā jātī hai.

³⁵achchhā shaḳhs apne dil ke achchhe ḳhazāne se achchhī chīzeṅ nikāltā hai jabki burā shaḳhs apne bure ḳhazāne se burī chīzeṅ.

³⁶maiṅ tum ko batātā hūṅ ki qiyāmat ke din logoṅ ko beparwāī se kī gaī har bāt kā hisāb denā paṛegā.

³⁷tumhārī apnī bātoṅ kī binā par tum ko rāst yā nārāst ṭhahrāyā jāegā.”

³⁸phir sharīat ke kuchh ulamā aur farīsiyoṅ ne īsā se bāt kī, “ustād, ham āp kī taraf se ilāhī nishān deḳhnā chāhte haiṅ.”

³⁹us ne jawāb diyā, “sirf sharīr aur zinākār nasl ilāhī nishān kā taqāzā kartī hai. lekin use koī bhī ilāhī nishān pesh nahīṅ kiyā jāegā siwāe yūnus nabī ke nishān ke.

⁴⁰kyūṅki jis tarah yūnus tīn din aur tīn rāt machhlī ke peṭ meṅ rahā usī tarah ibn-e-ādam bhī tīn din aur tīn rāt zamīn kī god meṅ paṛā rahegā.

⁴¹qiyāmat ke din nīnwā ke bāshinde is nasl ke sāth khaṛe ho kar ise mujrim ṭhahrāeṅge. kyūṅki yūnus ke elān par unhoṅ ne taubā kī thī jabki yahāṅ wuh hai jo yūnus se bhī baṛā hai.

⁴²us din junūbī mulk sabā kī malikā bhī is nasl ke sāth khaṛī ho kar ise mujrim qarār degī. kyūṅki wuh dūrdarāz mulk se sulaimān kī hikmat sunane ke lie āī thī jabki yahāṅ wuh hai jo sulaimān se bhī baṛā hai.

⁴³jab koī badrūh kisī shaḳhs se nikaltī hai to wuh wīrān ilāqoṅ meṅ se guzartī huī ārām kī jagah talāsh kartī hai. lekin jab use koī aisā maqām nahīṅ miltā

⁴⁴to wuh kahtī hai, ‘maiṅ apne us ghar meṅ wāpas chalī jāūṅgī jis meṅ se niklī thī.’ wuh wāpas ā kar deḳhtī hai ki ghar ḳhālī hai aur kisī ne jhāṛū de kar sab kuchh salīqe se rakh diyā hai.

⁴⁵phir wuh jā kar sāt aur badrūheṅ ḍhūnḍ lātī hai jo us se badtar hotī haiṅ, aur wuh sab us shaḳhs meṅ ghus kar rahne lagtī haiṅ. chunāṅche ab us ādmī kī hālat pahle kī nisbat zyādā burī ho jātī hai. is sharīr nasl kā bhī yihī hāl hogā.”

⁴⁶īsā abhī hujūm se bāt kar hī rahā thā ki us kī māṅ aur bhāī bāhar khaṛe us se bāt karne kī koshish karne lage.

⁴⁷kisī ne īsā se kahā, “āp kī māṅ aur bhāī bāhar khaṛe haiṅ aur āp se bāt karnā chāhte haiṅ.”

⁴⁸īsā ne pūchhā, “kaun hai merī māṅ aur kaun haiṅ mere bhāī?”

⁴⁹phir apne hāth se shāgirdoṅ kī taraf ishārā karke us ne kahā, “dekho, yih merī māṅ aur mere bhāī haiṅ.

⁵⁰kyūṅki jo bhī mere āsmānī bāp kī marzī pūrī kartā hai wuh merā bhāī, merī bahan aur merī māṅ hai.”