Read Roman Urdu Geo mattī 13 Bible Online

mattī 13 - Roman Urdu Geo bible

mattī 13

¹usī din īsā ghar se nikal kar jhīl ke kināre baiṭh gayā.

²itnā baṛā hujūm us ke gird jamā ho gayā ki āḳhirkār wuh ek kashtī meṅ baiṭh gayā jabki log kināre par khaṛe rahe.

³phir us ne unheṅ bahut sī bāteṅ tamsīloṅ meṅ sunāīṅ. “ek kisān bīj bone ke lie niklā.

⁴jab bīj idhar udhar bikhar gayā to kuchh dāne rāste par gire aur parindoṅ ne ā kar unheṅ chug liyā.

⁵kuchh pathrīlī zamīn par gire jahāṅ miṭṭī kī kamī thī. wuh jald ug āe kyūṅki miṭṭī gahrī nahīṅ thī.

⁶lekin jab sūraj niklā to paude jhulas gae aur chūṅki wuh jaṛ na pakaṛ sake is lie sūkh gae.

⁷kuchh ḳhudrau kāṅṭedār paudoṅ ke darmiyān bhī gire. wahāṅ wuh ugne to lage, lekin ḳhudrau paudoṅ ne sāth sāth baṛh kar unheṅ phalne phūlne na diyā. chunāṅche wuh bhī ḳhatm ho gae.

⁸lekin aise dāne bhī the jo zarḳhez zamīn meṅ gire aur baṛhte baṛhte tīs gunā, sāṭh gunā balki sau gunā tak zyādā phal lāe.

⁹jo sun saktā hai wuh sun le!”

¹⁰shāgird us ke pās ā kar pūchhne lage, “āp logoṅ se tamsīloṅ meṅ bāt kyūṅ karte haiṅ?”

¹¹us ne jawāb diyā, “tum ko to āsmān kī bādshāhī ke bhed samajhne kī liyāqat dī gaī hai, lekin unheṅ yih liyāqat nahīṅ dī gaī.

¹²jis ke pās kuchh hai use aur diyā jāegā aur us ke pās kasrat kī chīzeṅ hoṅgī. lekin jis ke pās kuchh nahīṅ hai us se wuh bhī chhīn liyā jāegā jo us ke pās hai.

¹³is lie maiṅ tamsīloṅ meṅ un se bāt kartā hūṅ. kyūṅki wuh deḳhte hue kuchh nahīṅ deḳhte, wuh sunte hue kuchh nahīṅ sunte aur kuchh nahīṅ samajhte.

¹⁴un meṅ yasāyāh nabī kī yih peshgoī pūrī ho rahī hai: ‘tum apne kānoṅ se sunoge magar kuchh nahīṅ samjhoge, tum apnī āṅkhoṅ se dekhoge magar kuchh nahīṅ jānoge.

¹⁵kyūṅki is qaum kā dil behiss ho gayā hai. wuh mushkil se apne kānoṅ se sunte haiṅ, unhoṅ ne apnī āṅkhoṅ ko band kar rakhā hai, aisā na ho ki wuh apnī āṅkhoṅ se dekheṅ, apne kānoṅ se suneṅ, apne dil se samjheṅ, merī taraf rujū kareṅ aur maiṅ unheṅ shifā dūṅ.’

¹⁶lekin tumhārī āṅkheṅ mubārak haiṅ kyūṅki wuh dekh saktī haiṅ aur tumhāre kān mubārak haiṅ kyūṅki wuh sun sakte haiṅ.

¹⁷maiṅ tum ko sach batātā hūṅ ki jo kuchh tum dekh rahe ho bahut se nabī aur rāstbāz ise dekh na pāe agarche wuh is ke ārzūmand the. aur jo kuchh tum sun rahe ho ise wuh sunane na pāe, agarche wuh is ke ḳhwāhishmand the.

¹⁸ab suno ki bīj bone wāle kī tamsīl kā matlab kyā hai.

¹⁹rāste par gire hue dāne wuh log haiṅ jo bādshāhī kā kalām sunte to haiṅ, lekin use samajhte nahīṅ. phir iblīs ā kar wuh kalām chhīn letā hai jo un ke diloṅ meṅ boyā gayā hai.

²⁰pathrīlī zamīn par gire hue dāne wuh log haiṅ jo kalām sunte hī use ḳhushī se qabūl to kar lete haiṅ,

²¹lekin wuh jaṛ nahīṅ pakaṛte aur is lie zyādā der tak qāim nahīṅ rahte. jūṅ hī wuh kalām par īmān lāne ke bāis kisī musībat yā īzārasānī se dochār ho jāeṅ to wuh bargashtā ho jāte haiṅ.

²²ḳhudrau kāṅṭedār paudoṅ ke darmiyān gire hue dāne wuh log haiṅ jo kalām sunte to haiṅ, lekin phir rozmarrā kī pareshāniyāṅ aur daulat kā fareb kalām ko phalne phūlne nahīṅ detā. natīje meṅ wuh phal lāne tak nahīṅ pahuṅchtā.

²³is ke muqābale meṅ zarḳhez zamīn meṅ gire hue dāne wuh log haiṅ jo kalām ko sun kar use samajh lete aur baṛhte baṛhte tīs gunā, sāṭh gunā balki sau gunā tak phal lāte haiṅ.”

²⁴īsā ne unheṅ ek aur tamsīl sunāī. “āsmān kī bādshāhī us kisān se mutābiqat rakhtī hai jis ne apne khet meṅ achchhā bīj bo diyā.

²⁵lekin jab log so rahe the to us ke dushman ne ā kar anāj ke paudoṅ ke darmiyān ḳhudrau paudoṅ kā bīj bo diyā. phir wuh chalā gayā.

²⁶jab anāj phūṭ niklā aur fasal pakne lagī to ḳhudrau paude bhī nazar āe.

²⁷naukar mālik ke pās āe aur kahne lage, ‘janāb, kyā āp ne apne khet meṅ achchhā bīj nahīṅ boyā thā? to phir yih ḳhudrau paude kahāṅ se ā gae haiṅ?’

²⁸us ne jawāb diyā, ‘kisī dushman ne yih kar diyā hai.’ naukaroṅ ne pūchhā, ‘kyā ham jā kar unheṅ ukhāṛeṅ?’

²⁹‘nahīṅ,’ us ne kahā. ‘aisā na ho ki ḳhudrau paudoṅ ke sāth sāth tum anāj ke paude bhī ukhāṛ ḍālo.

³⁰unheṅ fasal kī kaṭāī tak mil kar baṛhne do. us waqt maiṅ fasal kī kaṭāī karne wāloṅ se kahūṅgā ki pahle ḳhudrau paudoṅ ko chun lo aur unheṅ jalāne ke lie gaṭhoṅ meṅ bāndh lo. phir hī anāj ko jamā karke godām meṅ lāo’.”

³¹īsā ne unheṅ ek aur tamsīl sunāī. “āsmān kī bādshāhī rāī ke dāne kī mānind hai jo kisī ne le kar apne khet meṅ bo diyā.

³²go yih bījoṅ meṅ sab se chhoṭā dānā hai, lekin baṛhte baṛhte yih sabziyoṅ meṅ sab se baṛā ho jātā hai. balki yih daraḳht sā ban jātā hai aur parinde ā kar us kī shāḳhoṅ meṅ ghoṅsle banā lete haiṅ.”

³³us ne unheṅ ek aur tamsīl bhī sunāī. “āsmān kī bādshāhī ḳhamīr kī mānind hai jo kisī aurat ne le kar taqrīban 27 kilogrām āṭe meṅ milā diyā. go wuh us meṅ chhup gayā to bhī hote hote pūre gundhe hue āṭe ko ḳhamīr banā diyā.”

³⁴īsā ne yih tamām bāteṅ hujūm ke sāmne tamsīloṅ kī sūrat meṅ kīṅ. tamsīl ke baġhair us ne un se bāt hī nahīṅ kī.

³⁵yūṅ nabī kī yih peshgoī pūrī huī ki “maiṅ tamsīloṅ meṅ bāt karūṅga, maiṅ duniyā kī taḳhlīq se le kar āj tak chhupī huī bāteṅ bayān karūṅga.”

³⁶phir īsā hujūm ko ruḳhsat karke ghar ke andar chalā gayā. us ke shāgird us ke pās ā kar kahne lage, “khet meṅ ḳhudrau paudoṅ kī tamsīl kā matlab hameṅ samjhāeṅ.”

³⁷us ne jawāb diyā, “achchhā bīj bone wālā ibn-e-ādam hai.

³⁸khet duniyā hai jabki achchhe bīj se murād bādshāhī ke farzand haiṅ. ḳhudrau paude iblīs ke farzand haiṅ

³⁹aur unheṅ bone wālā dushman iblīs hai. fasal kī kaṭāī kā matlab duniyā kā iḳhtitām hai jabki fasal kī kaṭāī karne wāle farishte haiṅ.

⁴⁰jis tarah tamsīl meṅ ḳhudrau paude ukhāṛe jāte aur āg meṅ jalāe jāte haiṅ usī tarah duniyā ke iḳhtitām par bhī kiyā jāegā.

⁴¹ibn-e-ādam apne farishtoṅ ko bhej degā, aur wuh us kī bādshāhī se bargashtagī kā har sabab aur sharīat kī ḳhilāfwarzī karne wāle har shaḳhs ko nikālte jāeṅge.

⁴²wuh unheṅ bhaṛaktī bhaṭṭī meṅ phaiṅk deṅge jahāṅ log rote aur dāṅt pīste raheṅge.

⁴³phir rāstbāz apne bāp kī bādshāhī meṅ sūraj kī tarah chamkeṅge. jo sun saktā hai wuh sun le!

⁴⁴āsmān kī bādshāhī khet meṅ chhupe ḳhazāne kī mānind hai. jab kisī ādmī ko us ke bāre meṅ mālūm huā to us ne use dubārā chhupā diyā. phir wuh ḳhushī ke māre chalā gayā, apnī tamām milkiyat faroḳht kar dī aur us khet ko ḳharīd liyā.

⁴⁵nīz, āsmān kī bādshāhī aise saudāgar kī mānind hai jo achchhe motiyoṅ kī talāsh meṅ thā.

⁴⁶jab use ek nihāyat qīmtī motī ke bāre meṅ mālūm huā to wuh chalā gayā, apnī tamām milkiyat faroḳht kar dī aur us motī ko ḳharīd liyā.

⁴⁷āsmān kī bādshāhī jāl kī mānind bhī hai. use jhīl meṅ ḍālā gayā to har qism kī machhliyāṅ pakaṛī gaīṅ.

⁴⁸jab wuh bhar gayā to machheroṅ ne use kināre par khaiṅch liyā. phir unhoṅ ne baiṭh kar qābil-e-istemāl machhliyāṅ chun kar ṭokriyoṅ meṅ ḍāl dīṅ aur nāqābil-e-istemāl machhliyāṅ phaiṅk dīṅ.

⁴⁹duniyā ke iḳhtitām par aisā hī hogā. farishte āeṅge aur bure logoṅ ko rāstbāzoṅ se alag karke

⁵⁰unheṅ bhaṛaktī bhaṭṭī meṅ phaiṅk deṅge jahāṅ log rote aur dāṅt pīste raheṅge.”

⁵¹īsā ne pūchhā, “kyā tum ko in tamām bātoṅ kī samajh ā gaī hai?” “jī,” shāgirdoṅ ne jawāb diyā.

⁵²us ne un se kahā, “is lie sharīat kā har ālim jo āsmān kī bādshāhī meṅ shāgird ban gayā hai aise mālik-e-makān kī mānind hai jo apne ḳhazāne se nae aur purāne jawāhir nikāltā hai.”

⁵³yih tamsīleṅ sunāne ke bād īsā wahāṅ se chalā gayā.

⁵⁴apne watanī shahr nāsarat pahuṅch kar wuh ibādatḳhāne meṅ logoṅ ko tālīm dene lagā. us kī bāteṅ sun kar wuh hairatzadā hue. unhoṅ ne pūchhā, “use yih hikmat aur mojize karne kī yih qudrat kahāṅ se hāsil huī hai?

⁵⁵kyā yih baṛhaī kā beṭā nahīṅ hai? kyā us kī māṅ kā nām mariyam nahīṅ hai, aur kyā us ke bhāī yāqūb, yūsuf, shamāūn aur yahūdā nahīṅ haiṅ?

⁵⁶kyā us kī bahneṅ hamāre sāth nahīṅ rahtīṅ? to phir use yih sab kuchh kahāṅ se mil gayā?”

⁵⁷yūṅ wuh us se ṭhokar khā kar use qabūl karne se qāsir rahe. īsā ne un se kahā, “nabī kī izzat har jagah kī jātī hai siwāe us ke watanī shahr aur us ke apne ḳhāndān ke.”

⁵⁸aur un ke īmān kī kamī ke bāis us ne wahāṅ zyādā mojize na kie