Read Roman Urdu Geo mattī 14 Bible Online

mattī 14 - Roman Urdu Geo bible

mattī 14

¹us waqt galīl ke hukmrān herodes antipās ko īsā ke bāre meṅ ittilā milī.

²is par us ne apne darbāriyoṅ se kahā, “yih yahyā baptismā dene wālā hai jo murdoṅ meṅ se jī uṭhā hai, is lie us kī mojizānā tāqateṅ is meṅ nazar ātī haiṅ.”

³wajah yih thī ki herodes ne yahyā ko giriftār karke jel meṅ ḍālā thā. yih herodiyās kī ḳhātir huā thā jo pahle herodes ke bhāī filippus kī bīwī thī.

⁴yahyā ne herodes ko batāyā thā, “herodiyās se terī shādī nājāiz hai.”

⁵herodes yahyā ko qatl karnā chāhtā thā, lekin awām se ḍartā thā kyūṅki wuh use nabī samajhte the.

⁶herodes kī sālgirah ke mauqe par herodiyās kī beṭī un ke sāmne nāchī. herodes ko us kā nāchnā itnā pasand āyā

⁷ki us ne qasam khā kar us se wādā kiyā, “jo bhī tū māṅgegī maiṅ tujhe dūṅgā.”

⁸apnī māṅ ke sikhāne par beṭī ne kahā, “mujhe yahyā baptismā dene wāle kā sar ṭre meṅ mangwā deṅ.”

⁹yih sun kar bādshāh ko dukh huā. lekin apnī qasmoṅ aur mehmānoṅ kī maujūdagī kī wajah se us ne use dene kā hukm de diyā.

¹⁰chunāṅche yahyā kā sar qalam kar diyā gayā.

¹¹phir ṭre meṅ rakh kar andar lāyā gayā aur laṛkī ko de diyā gayā. laṛkī use apnī māṅ ke pās le gaī.

¹²bād meṅ yahyā ke shāgird āe aur us kī lāsh le kar use dafnāyā. phir wuh īsā ke pās gae aur use ittilā dī.

¹³yih ḳhabar sun kar īsā logoṅ se alag ho kar kashtī par sawār huā aur kisī wīrān jagah chalā gayā. lekin hujūm ko us kī ḳhabar milī. log paidal chal kar shahroṅ se nikal āe aur us ke pīchhe lag gae.

¹⁴jab īsā ne kashtī par se utar kar baṛe hujūm ko dekhā to use logoṅ par baṛā tars āyā. wahīṅ us ne un ke marīzoṅ ko shifā dī.

¹⁵jab din ḍhalne lagā to us ke shāgird us ke pās āe aur kahā, “yih jagah wīrān hai aur din ḍhalne lagā hai. in ko ruḳhsat kar deṅ tāki yih irdgird ke dehātoṅ meṅ jā kar khāne ke lie kuchh ḳharīd leṅ.”

¹⁶īsā ne jawāb diyā, “inheṅ jāne kī zarūrat nahīṅ, tum ḳhud inheṅ khāne ko do.”

¹⁷unhoṅ ne jawāb diyā, “hamāre pās sirf pāṅch roṭiyāṅ aur do machhliyāṅ haiṅ.”

¹⁸us ne kahā, “unheṅ yahāṅ mere pās le āo,”

¹⁹aur logoṅ ko ghās par baiṭhne kā hukm diyā. īsā ne un pāṅch roṭiyoṅ aur do machhliyoṅ ko le kar āsmān kī taraf dekhā aur shukrguzārī kī duā kī. phir us ne roṭiyoṅ ko toṛ toṛ kar shāgirdoṅ ko diyā, aur shāgirdoṅ ne yih roṭiyāṅ logoṅ meṅ taqsīm kar dīṅ.

²⁰sab ne jī bhar kar khāyā. jab shāgirdoṅ ne bache hue ṭukṛe jamā kie to bārah ṭokre bhar gae.

²¹ḳhawātīn aur bachchoṅ ke ilāwā khāne wāle taqrīban 5,000 mard the.

²²is ke ain bād īsā ne shāgirdoṅ ko majbūr kiyā ki wuh kashtī par sawār ho kar āge nikleṅ aur jhīl ke pār chale jāeṅ. itne meṅ wuh hujūm ko ruḳhsat karnā chāhtā thā.

²³unheṅ ḳhairbād kahne ke bād wuh duā karne ke lie akelā pahāṛ par chaṛh gayā. shām ke waqt wuh wahāṅ akelā thā

²⁴jabki kashtī kināre se kāfī dūr ho gaī thī. lahreṅ kashtī ko bahut tang kar rahī thīṅ kyūṅki hawā us ke ḳhilāf chal rahī thī.

²⁵taqrīban tīn baje rāt ke waqt īsā pānī par chalte hue un ke pās āyā.

²⁶jab shāgirdoṅ ne use jhīl kī satah par chalte hue dekhā to unhoṅ ne dahshat khāī. “yih koī bhūt hai,” unhoṅ ne kahā aur ḍar ke māre chīḳheṅ mārne lage.

²⁷lekin īsā fauran un se muḳhātib ho kar bolā, “hauslā rakho! maiṅ hī hūṅ. mat ghabrāo.”

²⁸is par patras bol uṭhā, “ḳhudāwand, agar āp hī haiṅ to mujhe pānī par apne pās āne kā hukm deṅ.”

²⁹īsā ne jawāb diyā, “ā.” patras kashtī par se utar kar pānī par chalte chalte īsā kī taraf baṛhne lagā.

³⁰lekin jab us ne tez hawā par ġhaur kiyā to wuh ghabrā gayā aur ḍūbne lagā. wuh chillā uṭhā, “ḳhudāwand, mujhe bachāeṅ!”

³¹īsā ne fauran apnā hāth baṛhā kar use pakaṛ liyā. us ne kahā, “ai kam'etiqād! tū shak meṅ kyūṅ paṛ gayā thā?”

³²donoṅ kashtī par sawār hue to hawā tham gaī.

³³phir kashtī meṅ maujūd shāgirdoṅ ne use sijdā karke kahā, “yaqīnan āp allāh ke farzand haiṅ!”

³⁴jhīl ko pār karke wuh gannesarat shahr ke pās pahuṅch gae.

³⁵jab us jagah ke logoṅ ne īsā ko pahchān liyā to unhoṅ ne irdgird ke pūre ilāqe meṅ is kī ḳhabar phailāī. unhoṅ ne apne tamām marīzoṅ ko us ke pās lā kar

³⁶us se minnat kī ki wuh unheṅ sirf apne libās ke dāman ko chhūne de. aur jis ne bhī use chhuā use shifā milī.