Read Roman Urdu Geo mattī 15 Bible Online

mattī 15 - Roman Urdu Geo bible

mattī 15

¹phir kuchh farīsī aur sharīat ke ālim yarūshalam se ā kar īsā se pūchhne lage,

²“āp ke shāgird bāpdādā kī riwāyat kyūṅ toṛte haiṅ? kyūṅki wuh hāth dhoe baġhair roṭī khāte haiṅ.”

³īsā ne jawāb diyā, “aur tum apnī riwāyāt kī ḳhātir allāh kā hukm kyūṅ toṛte ho?

⁴kyūṅki allāh ne farmāyā, ‘apne bāp aur apnī māṅ kī izzat karnā’ aur ‘jo apne bāp yā māṅ par lānat kare use sazā-e-maut dī jāe.’

⁵lekin jab koī apne wālidain se kahe, ‘maiṅ āp kī madad nahīṅ kar saktā, kyūṅki maiṅ ne mannat mānī hai ki jo kuchh mujhe āp ko denā thā wuh allāh ke lie waqf hai’ to tum ise jāiz qarār dete ho.

⁶yūṅ tum kahte ho ki use apne māṅ-bāp kī izzat karne kī zarūrat nahīṅ hai. aur isī tarah tum allāh ke kalām ko apnī riwāyat kī ḳhātir mansūḳh kar lete ho.

⁷riyākāro! yasāyāh nabī ne tumhāre bāre meṅ kyā ḳhūb nabuwwat kī hai,

⁸‘yih qaum apne hoṅṭoṅ se to merā ehtirām kartī hai lekin us kā dil mujh se dūr hai.

⁹wuh merī parastish karte to haiṅ, lekin befāidā. kyūṅki wuh sirf insān hī ke ahkām sikhāte haiṅ’.”

¹⁰phir īsā ne hujūm ko apne pās bulā kar kahā, “sab merī bāt suno aur ise samajhne kī koshish karo.

¹¹koī aisī chīz hai nahīṅ jo insān ke muṅh meṅ dāḳhil ho kar use nāpāk kar sake, balki jo kuchh insān ke muṅh se nikaltā hai wuhī use nāpāk kar detā hai.”

¹²is par shāgirdoṅ ne us ke pās ā kar pūchhā, “kyā āp ko mālūm hai ki farīsī yih bāt sun kar nārāz hue haiṅ?”

¹³us ne jawāb diyā, “jo bhī paudā mere āsmānī bāp ne nahīṅ lagāyā use jaṛ se ukhāṛā jāegā.

¹⁴unheṅ chhoṛ do, wuh andhe rāh dikhāne wāle haiṅ. agar ek andhā dūsre andhe kī rāhnumāī kare to donoṅ gaṛhe meṅ gir jāeṅge.”

¹⁵patras bol uṭhā, “is tamsīl kā matlab hameṅ batāeṅ.”

¹⁶īsā ne kahā, “kyā tum abhī tak itne nāsamajh ho?

¹⁷kyā tum nahīṅ samajh sakte ki jo kuchh insān ke muṅh meṅ dāḳhil ho jātā hai wuh us ke mede meṅ jātā hai aur wahāṅ se nikal kar jā-e-zarūrat meṅ?

¹⁸lekin jo kuchh insān ke muṅh se nikaltā hai wuh dil se ātā hai. wuhī insān ko nāpāk kartā hai.

¹⁹dil hī se bure ḳhayālāt, qatl-o-ġhārat, zinākārī, harāmkārī, chorī, jhūṭī gawāhī aur buhtān nikalte haiṅ.

²⁰yihī kuchh insān ko nāpāk kar detā hai, lekin hāth dhoe baġhair khānā khāne se wuh nāpāk nahīṅ hotā.”

²¹phir īsā galīl se rawānā ho kar shimāl meṅ sūr aur saidā ke ilāqe meṅ āyā.

²²is ilāqe kī ek kan'ānī ḳhātūn us ke pās ā kar chillāne lagī, “ḳhudāwand, ibn-e-dāūd, mujh par rahm kareṅ. ek badrūh merī beṭī ko bahut satātī hai.”

²³lekin īsā ne jawāb meṅ ek lafz bhī na kahā. is par us ke shāgird us ke pās ā kar us se guzārish karne lage, “use fāriġh kar deṅ, kyūṅki wuh hamāre pīchhe pīchhe chīḳhtī chillātī hai.”

²⁴īsā ne jawāb diyā, “mujhe sirf isrāīl kī khoī huī bheṛoṅ ke pās bhejā gayā hai.”

²⁵aurat us ke pās ā kar muṅh ke bal jhuk gaī aur kahā, “ḳhudāwand, merī madad kareṅ!”

²⁶us ne use batāyā, “yih munāsib nahīṅ ki bachchoṅ se khānā le kar kuttoṅ ke sāmne phaiṅk diyā jāe.”

²⁷us ne jawāb diyā, “jī ḳhudāwand, lekin kutte bhī wuh ṭukṛe khāte haiṅ jo un ke mālik kī mez par se farsh par gir jāte haiṅ.”

²⁸īsā ne kahā, “ai aurat, terā īmān baṛā hai. terī darḳhwāst pūrī ho jāe.” usī lamhe aurat kī beṭī ko shifā mil gaī.

²⁹phir īsā wahāṅ se rawānā ho kar galīl kī jhīl ke kināre pahuṅch gayā. wahāṅ wuh pahāṛ par chaṛh kar baiṭh gayā.

³⁰logoṅ kī baṛī tādād us ke pās āī. wuh apne langaṛe, andhe, maflūj, gūṅge aur kaī aur qism ke marīz bhī sāth le āe. unhoṅ ne unheṅ īsā ke sāmne rakhā to us ne unheṅ shifā dī.

³¹hujūm hairatzadā ho gayā. kyūṅki gūṅge bol rahe the, apāhajoṅ ke āzā bahāl ho gae. langaṛe chalne aur andhe deḳhne lage the. yih dekh kar bhīṛ ne isrāīl ke ḳhudā kī tamjīd kī.

³²phir īsā ne apne shāgirdoṅ ko bulā kar un se kahā, “mujhe in logoṅ par tars ātā hai. inheṅ mere sāth ṭhahre tīn din ho chuke haiṅ aur in ke pās khāne kī koī chīz nahīṅ hai. lekin maiṅ inheṅ is bhūkī hālat meṅ ruḳhsat nahīṅ karnā chāhtā. aisā na ho ki wuh rāste meṅ thak kar chūr ho jāeṅ.”

³³us ke shāgirdoṅ ne jawāb diyā, “is wīrān ilāqe meṅ kahāṅ se itnā khānā mil sakegā ki yih log khā kar ser ho jāeṅ?”

³⁴īsā ne pūchhā, “tumhāre pās kitnī roṭiyāṅ haiṅ?” unhoṅ ne jawāb diyā, “sāt, aur chand ek chhoṭī machhliyāṅ.”

³⁵īsā ne hujūm ko zamīn par baiṭhne ko kahā.

³⁶phir sāt roṭiyoṅ aur machhliyoṅ ko le kar us ne shukrguzārī kī duā kī aur unheṅ toṛ toṛ kar apne shāgirdoṅ ko taqsīm karne ke lie de diyā.

³⁷sab ne jī bhar kar khāyā. bād meṅ jab khāne ke bache hue ṭukṛe jamā kie gae to sāt baṛe ṭokre bhar gae.

³⁸ḳhawātīn aur bachchoṅ ke ilāwā khāne wāle 4,000 mard the.

³⁹phir īsā logoṅ ko ruḳhsat karke kashtī par sawār huā aur magadan ke ilāqe meṅ chalā gayā.