Read Roman Urdu Geo mattī 16 Bible Online

mattī 16 - Roman Urdu Geo bible

mattī 16

¹ek din farīsī aur sadūqī īsā ke pās āe. use parakhne ke lie unhoṅ ne mutālabā kiyā ki wuh unheṅ āsmān kī taraf se koī ilāhī nishān dikhāe tāki us kā iḳhtiyār sābit ho jāe.

²lekin us ne jawāb diyā, “shām ko tum kahte ho, ‘kal mausam sāf hogā kyūṅki āsmān surḳh nazar ātā hai.’

³aur subh ke waqt kahte ho, ‘āj tūfān hogā kyūṅki āsmān surḳh hai aur bādal chhāe hue haiṅ.’ ġharz tum āsmān kī hālat par ġhaur karke sahīh natījā nikāl lete ho, lekin zamānoṅ kī alāmatoṅ par ġhaur karke sahīh natīje tak pahuṅchnā tumhāre bas kī bāt nahīṅ hai.

⁴sirf sharīr aur zinākār nasl ilāhī nishān kā taqāzā kartī hai. lekin use koī bhī ilāhī nishān pesh nahīṅ kiyā jāegā siwāe yūnus nabī ke nishān ke.” yih kah kar īsā unheṅ chhoṛ kar chalā gayā.

⁵jhīl ko pār karte waqt shāgird apne sāth khānā lānā bhūl gae the.

⁶īsā ne un se kahā, “ḳhabardār, farīsiyoṅ aur sadūqiyoṅ ke ḳhamīr se hoshyār rahnā.”

⁷shāgird āpas meṅ bahs karne lage, “wuh is lie kah rahe hoṅge ki ham khānā sāth nahīṅ lāe.”

⁸īsā ko mālūm huā ki wuh kyā soch rahe haiṅ. us ne kahā, “tum āpas meṅ kyūṅ bahs kar rahe ho ki hamāre pās roṭī nahīṅ hai?

⁹kyā tum abhī tak nahīṅ samajhte? kyā tumheṅ yād nahīṅ ki maiṅ ne pāṅch roṭiyāṅ le kar 5,000 ādmiyoṅ ko khānā khilā diyā aur ki tum ne bache hue ṭukṛoṅ ke kitne ṭokre uṭhāe the?

¹⁰yā kyā tum bhūl gae ho ki maiṅ ne sāt roṭiyāṅ le kar 4,000 ādmiyoṅ ko khānā khilāyā aur ki tum ne bache hue ṭukṛoṅ ke kitne ṭokre uṭhāe the?

¹¹tum kyūṅ nahīṅ samajhte ki maiṅ tum se khāne kī bāt nahīṅ kar rahā? suno merī bāt! farīsiyoṅ aur sadūqiyoṅ ke ḳhamīr se hoshyār raho!”

¹²phir unheṅ samajh āī ki īsā unheṅ roṭī ke ḳhamīr se āgāh nahīṅ kar rahā thā balki farīsiyoṅ aur sadūqiyoṅ kī tālīm se.

¹³jab īsā qaisariyā-filippī ke ilāqe meṅ pahuṅchā to us ne shāgirdoṅ se pūchhā, “ibn-e-ādam logoṅ ke nazdīk kaun hai?”

¹⁴unhoṅ ne jawāb diyā, “kuchh kahte haiṅ yahyā baptismā dene wālā, kuchh yih ki āp ilyās nabī haiṅ. kuchh yih bhī kahte haiṅ ki yarmiyāh yā nabiyoṅ meṅ se ek.”

¹⁵us ne pūchhā, “lekin tumhāre nazdīk maiṅ kaun hūṅ?”

¹⁶patras ne jawāb diyā, “āp zindā ḳhudā ke farzand masīh haiṅ.”

¹⁷īsā ne kahā, “shamāūn bin yūnus, tū mubārak hai, kyūṅki kisī insān ne tujh par yih zāhir nahīṅ kiyā balki mere āsmānī bāp ne.

¹⁸maiṅ tujhe yih bhī batātā hūṅ ki tū patras yānī patthar hai, aur isī patthar par maiṅ apnī jamā'at ko tāmīr karūṅga, aisī jamā'at jis par pātāl ke darwāze bhī ġhālib nahīṅ āeṅge.

¹⁹maiṅ tujhe āsmān kī bādshāhī kī kunjiyāṅ de dūṅgā. jo kuchh tū zamīn par bāndhegā wuh āsmān par bhī bandhegā. aur jo kuchh tū zamīn par kholegā wuh āsmān par bhī khulegā.”

²⁰phir īsā ne apne shāgirdoṅ ko hukm diyā, “kisī ko bhī na batāo ki maiṅ masīh hūṅ.”

²¹us waqt se īsā apne shāgirdoṅ par wāzih karne lagā, “lāzim hai ki maiṅ yarūshalam jā kar qaum ke buzurgoṅ, rāhnumā imāmoṅ aur sharīat ke ulamā ke hāthoṅ bahut dukh uṭhāūṅ. mujhe qatl kiyā jāegā, lekin tīsre din maiṅ jī uṭhūṅgā.”

²²is par patras use ek taraf le jā kar samjhāne lagā. “ai ḳhudāwand, allāh na kare ki yih kabhī bhī āp ke sāth ho.”

²³īsā ne muṛ kar patras se kahā, “shaitān, mere sāmne se haṭ jā! tū mere lie ṭhokar kā bāis hai, kyūṅki tū allāh kī soch nahīṅ rakhtā balki insān kī.”

²⁴phir īsā ne apne shāgirdoṅ se kahā, “jo mere pīchhe ānā chāhe wuh apne āp kā inkār kare aur apnī salīb uṭhā kar mere pīchhe ho le.

²⁵kyūṅki jo apnī jān ko bachāe rakhnā chāhe wuh use kho degā. lekin jo merī ḳhātir apnī jān kho de wuhī use pā legā.

²⁶kyā fāidā hai agar kisī ko pūrī duniyā hāsil ho jāe, lekin wuh apnī jān se mahrūm ho jāe? insān apnī jān ke badle kyā de saktā hai?

²⁷kyūṅki ibn-e-ādam apne bāp ke jalāl meṅ apne farishtoṅ ke sāth āegā, aur us waqt wuh har ek ko us ke kām kā badlā degā.

²⁸maiṅ tumheṅ sach batātā hūṅ, yahāṅ kuchh aise log khaṛe haiṅ jo marne se pahle hī ibn-e-ādam ko us kī bādshāhī meṅ āte hue dekheṅge.”