Read Roman Urdu Geo mattī 17 Bible Online

mattī 17 - Roman Urdu Geo bible

mattī 17

¹chhih din ke bād īsā sirf patras, yāqūb aur yūhannā ko apne sāth le kar ūṅche pahāṛ par chaṛh gayā.

²wahāṅ us kī shakl-o-sūrat un ke sāmne badal gaī. us kā chehrā sūraj kī tarah chamakne lagā, aur us ke kapṛe nūr kī mānind safed ho gae.

³achānak ilyās aur mūsā zāhir hue aur īsā se bāteṅ karne lage.

⁴patras bol uṭhā, “ḳhudāwand, kitnī achchhī bāt hai ki ham yahāṅ haiṅ. agar āp chāheṅ to maiṅ tīn jhoṅpṛiyāṅ banāūṅgā, ek āp ke lie, ek mūsā ke lie aur ek ilyās ke lie.”

⁵wuh abhī bāt kar hī rahā thā ki ek chamakdār bādal ā kar un par chhā gayā aur bādal meṅ se ek āwāz sunāī dī, “yih merā pyārā farzand hai, jis se maiṅ ḳhush hūṅ. is kī suno.”

⁶yih sun kar shāgird dahshat khā kar aundhe muṅh gir gae.

⁷lekin īsā ne ā kar unheṅ chhuā. us ne kahā, “uṭho, mat ḍaro.”

⁸jab unhoṅ ne nazar uṭhāī to īsā ke siwā kisī ko na dekhā.

⁹wuh pahāṛ se utarne lage to īsā ne unheṅ hukm diyā, “jo kuchh tum ne dekhā hai use us waqt tak kisī ko na batānā jab tak ki ibn-e-ādam murdoṅ meṅ se jī na uṭhe.”

¹⁰shāgirdoṅ ne us se pūchhā, “sharīat ke ulamā kyūṅ kahte haiṅ ki masīh kī āmad se pahle ilyās kā ānā zarūrī hai?”

¹¹īsā ne jawāb diyā, “ilyās to zarūr sab kuchh bahāl karne ke lie āegā.

¹²lekin maiṅ tum ko batātā hūṅ ki ilyās to ā chukā hai aur unhoṅ ne use nahīṅ pahchānā balki us ke sāth jo chāhā kiyā. isī tarah ibn-e-ādam bhī un ke hāthoṅ dukh uṭhāegā.”

¹³phir shāgirdoṅ ko samajh āī ki wuh un ke sāth yahyā baptismā dene wāle kī bāt kar rahā thā.

¹⁴jab wuh nīche hujūm ke pās pahuṅche to ek ādmī ne īsā ke sāmne ā kar ghuṭne ṭeke

¹⁵aur kahā, “ḳhudāwand, mere beṭe par rahm kareṅ, use mirgī ke daure paṛte haiṅ aur use shadīd taqlīf uṭhānī paṛtī hai. kaī bār wuh āg yā pānī meṅ gir jātā hai.

¹⁶maiṅ use āp ke shāgirdoṅ ke pās lāyā thā, lekin wuh use shifā na de sake.”

¹⁷īsā ne jawāb diyā, “īmān se ḳhālī aur ṭeṛhī nasl! maiṅ kab tak tumhāre sāth rahūṅ, kab tak tumheṅ bardāsht karūṅ? laṛke ko mere pās le āo.”

¹⁸īsā ne badrūh ko ḍānṭā, to wuh laṛke meṅ se nikal gaī. usī lamhe use shifā mil gaī.

¹⁹bād meṅ shāgirdoṅ ne alāhidagī meṅ īsā ke pās ā kar pūchhā, “ham badrūh ko kyūṅ na nikāl sake?”

²⁰us ne jawāb diyā, “apne īmān kī kamī ke sabab se. maiṅ tumheṅ sach batātā hūṅ, agar tumhārā īmān rāī ke dāne ke barābar bhī ho to phir tum is pahāṛ ko kah sakoge, ‘idhar se udhar khisak jā,’ to wuh khisak jāegā. aur tumhāre lie kuchh bhī nāmumkin nahīṅ hogā.

²¹[lekin is qism kī badrūh duā aur roze ke baġhair nahīṅ nikaltī.]”

²²jab wuh galīl meṅ jamā hue to īsā ne unheṅ batāyā, “ibn-e-ādam ko ādmiyoṅ ke hawāle kar diyā jāegā.

²³wuh use qatl kareṅge, lekin tīn din ke bād wuh jī uṭhegā.” yih sun kar shāgird nihāyat ġhamgīn hue.

²⁴wuh kafarnahūm pahuṅche to bait-ul-muqaddas kā ṭaiks jamā karne wāle patras ke pās ā kar pūchhne lage, “kyā āp kā ustād bait-ul-muqaddas kā ṭaiks adā nahīṅ kartā?”

²⁵“jī, wuh kartā hai,” patras ne jawāb diyā. wuh ghar meṅ āyā to īsā pahle hī bolne lagā, “kyā ḳhayāl hai shamāūn, duniyā ke bādshāh kin se ḍyūṭī aur ṭaiks lete haiṅ, apne farzandoṅ se yā ajnabiyoṅ se?”

²⁶patras ne jawāb diyā, “ajnabiyoṅ se.” īsā bolā “to phir un ke farzand ṭaiks dene se barī hue.

²⁷lekin ham unheṅ nārāz nahīṅ karnā chāhte. is lie jhīl par jā kar us meṅ ḍorī ḍāl denā. jo machhlī tū pahle pakaṛegā us kā muṅh kholnā to us meṅ se chāṅdī kā sikkā niklegā. use le kar unheṅ mere aur apne lie adā kar de.”