Read Roman Urdu Geo mattī 18 Bible Online

mattī 18 - Roman Urdu Geo bible

mattī 18

¹us waqt shāgird īsā ke pās ā kar pūchhne lage, “āsmān kī bādshāhī meṅ kaun sab se baṛā hai?”

²jawāb meṅ īsā ne ek chhoṭe bachche ko bulā kar un ke darmiyān khaṛā kiyā

³aur kahā, “maiṅ tum ko sach batātā hūṅ agar tum badal kar chhoṭe bachchoṅ kī mānind na bano to tum kabhī āsmān kī bādshāhī meṅ dāḳhil nahīṅ hoge.

⁴is lie jo bhī apne āp ko is bachche kī tarah chhoṭā banāegā wuh āsmān meṅ sab se baṛā hogā.

⁵aur jo bhī mere nām meṅ is jaise chhoṭe bachche ko qabūl kare wuh mujhe qabūl kartā hai.

⁶lekin jo koī in chhoṭoṅ meṅ se kisī ko gunāh karne par uksāe us ke lie behtar hai ki us ke gale meṅ baṛī chakkī kā pāṭ bāndh kar use samundar kī gahrāiyoṅ meṅ ḍubo diyā jāe.

⁷duniyā par un chīzoṅ kī wajah se afsos jo gunāh karne par uksātī haiṅ. lāzim hai ki aisī āzmāisheṅ āeṅ, lekin us shaḳhs par afsos jis kī mārifat wuh āeṅ.

⁸agar terā hāth yā pāoṅ tujhe gunāh karne par uksāe to use kāṭ kar phaiṅk denā. is se pahle ki tujhe do hāthoṅ yā do pāoṅ samet jahannum kī abadī āg meṅ phaiṅkā jāe, behtar yih hai ki ek hāth yā pāoṅ se mahrūm ho kar abadī zindagī meṅ dāḳhil ho.

⁹aur agar terī āṅkh tujhe gunāh karne par uksāe to use nikāl kar phaiṅk denā. is se pahle ki tujhe do āṅkhoṅ samet jahannum kī āg meṅ phaiṅkā jāe behtar yih hai ki ek āṅkh se mahrūm ho kar abadī zindagī meṅ dāḳhil ho.

¹⁰ḳhabardār! tum in chhoṭoṅ meṅ se kisī ko bhī haqīr na jānanā. kyūṅki maiṅ tum ko batātā hūṅ ki āsmān par in ke farishte har waqt mere bāp ke chehre ko deḳhte rahte haiṅ.

¹¹[kyūṅki ibn-e-ādam khoe huoṅ ko ḍhūṅḍne aur najāt dene āyā hai.]

¹²tumhārā kyā ḳhayāl hai? agar kisī ādmī kī 100 bheṛeṅ hoṅ aur ek bhaṭak kar gum ho jāe to wuh kyā karegā? kyā wuh bāqī 99 bheṛeṅ pahāṛī ilāqe meṅ chhoṛ kar bhaṭkī huī bheṛ ko ḍhūṅḍne nahīṅ jāegā?

¹³aur maiṅ tum ko sach batātā hūṅ ki bhaṭkī huī bheṛ ke milne par wuh us ke bāre meṅ un bāqī 99 bheṛoṅ kī nisbat kahīṅ zyādā ḳhushī manāegā jo bhaṭkī nahīṅ.

¹⁴bilkul isī tarah āsmān par tumhārā bāp nahīṅ chāhtā ki in chhoṭoṅ meṅ se ek bhī halāk ho jāe.

¹⁵agar tere bhāī ne terā gunāh kiyā ho to akele us ke pās jā kar us par us kā gunāh zāhir kar. agar wuh terī bāt māne to tū ne apne bhāī ko jīt liyā.

¹⁶lekin agar wuh na māne to ek yā do aur logoṅ ko apne sāth le jā tāki tumhārī har bāt kī do yā tīn gawāhoṅ se tasdīq ho jāe.

¹⁷agar wuh un kī bāt bhī na māne to jamā'at ko batā denā. aur agar wuh jamā'at kī bhī na māne to us ke sāth ġhairīmāndār yā ṭaiks lene wāle kā sā sulūk kar.

¹⁸maiṅ tum ko sach batātā hūṅ ki jo kuchh bhī tum zamīn par bāndhoge āsmān par bhī bandhegā, aur jo kuchh zamīn par khologe āsmān par bhī khulegā.

¹⁹maiṅ tum ko yih bhī batātā hūṅ ki agar tum meṅ se do shaḳhs kisī bāt ko māṅgne par muttafiq ho jāeṅ to merā āsmānī bāp tum ko baḳhshegā.

²⁰kyūṅki jahāṅ bhī do yā tīn afrād mere nām meṅ jamā ho jāeṅ wahāṅ maiṅ un ke darmiyān hūṅgā.”

²¹phir patras ne īsā ke pās ā kar pūchhā, “ḳhudāwand, jab merā bhāī merā gunāh kare to maiṅ kitnī bār use muāf karūṅ? sāt bār tak?”

²²īsā ne jawāb diyā, “maiṅ tujhe batātā hūṅ, sāt bār nahīṅ balki 77 bār.

²³is lie āsmān kī bādshāhī ek bādshāh kī mānind hai jo apne naukaroṅ ke karzoṅ kā hisāb-kitāb karnā chāhtā thā.

²⁴hisāb-kitāb shurū karte waqt ek ādmī us ke sāmne pesh kiyā gayā jo araboṅ ke hisāb se us kā qarzdār thā.

²⁵wuh yih raqm adā na kar sakā, is lie us ke mālik ne yih qarz wasūl karne ke lie hukm diyā ki use bāl-bachchoṅ aur tamām milkiyat samet faroḳht kar diyā jāe.

²⁶yih sun kar naukar muṅh ke bal girā aur minnat karne lagā, ‘mujhe muhlat deṅ, maiṅ pūrī raqm adā kar dūṅgā.’

²⁷bādshāh ko us par tars āyā. us ne us kā qarz muāf karke use jāne diyā.

²⁸lekin jab yihī naukar bāhar niklā to ek hamḳhidmat milā jo us kā chand hazār rūpoṅ kā qarzdār thā. use pakaṛ kar wuh us kā galā dabā kar kahne lagā, ‘apnā qarz adā kar!’

²⁹dūsrā naukar gir kar minnat karne lagā, ‘mujhe muhlat deṅ, maiṅ āp ko sārī raqm adā kar dūṅgā.’

³⁰lekin wuh is ke lie tayyār na huā, balki jā kar use us waqt tak jel meṅ ḍalwāyā jab tak wuh pūrī raqm adā na kar de.

³¹jab bāqī naukaroṅ ne yih dekhā to unheṅ shadīd dukh huā aur unhoṅ ne apne mālik ke pās jā kar sab kuchh batā diyā jo huā thā.

³²is par mālik ne us naukar ko apne pās bulā liyā aur kahā, ‘sharīr naukar! jab tū ne merī minnat kī to maiṅ ne terā pūrā qarz muāf kar diyā.

³³kyā lāzim na thā ki tū bhī apne sāthī naukar par utnā rahm kartā jitnā maiṅ ne tujh par kiyā thā?’

³⁴ġhusse meṅ mālik ne use jel ke afsaroṅ ke hawāle kar diyā tāki us par us waqt tak tashaddud kiyā jāe jab tak wuh qarz kī pūrī raqm adā na kar de.

³⁵merā āsmānī bāp tum meṅ se har ek ke sāth bhī aisā hī karegā agar tum ne apne bhāī ko pūre dil se muāf na kiyā.”