Read Roman Urdu Geo mattī 19 Bible Online

mattī 19 - Roman Urdu Geo bible

mattī 19

¹yih kahne ke bād īsā galīl ko chhoṛ kar yahūdiyā meṅ daryā-e-yardan ke pār chalā gayā.

²baṛā hujūm us ke pīchhe ho liyā aur us ne unheṅ wahāṅ shifā dī.

³kuchh farīsī āe aur use phaṅsāne kī ġharz se sawāl kiyā, “kyā jāiz hai ki mard apnī bīwī ko kisī bhī wajah se talāq de?”

⁴īsā ne jawāb diyā, “kyā tum ne kalām-e-muqaddas meṅ nahīṅ paṛhā ki ibtidā meṅ ḳhāliq ne unheṅ mard aur aurat banāyā?

⁵aur us ne farmāyā, ‘is lie mard apne māṅ-bāp ko chhoṛ kar apnī bīwī ke sāth paiwast ho jātā hai. wuh donoṅ ek ho jāte haiṅ.’

⁶yūṅ wuh kalām-e-muqaddas ke mutābiq do nahīṅ rahte balki ek ho jāte haiṅ. jise allāh ne joṛā hai use insān judā na kare.”

⁷unhoṅ ne etirāz kiyā, “to phir mūsā ne yih kyūṅ farmāyā ki ādmī talāqnāmā likh kar bīwī ko ruḳhsat kar de?”

⁸īsā ne jawāb diyā, “mūsā ne tumhārī saḳhtdilī kī wajah se tum ko apnī bīwī ko talāq dene kī ijāzat dī. lekin ibtidā meṅ aisā na thā.

⁹maiṅ tumheṅ batātā hūṅ, jo apnī bīwī ko jis ne zinā na kiyā ho talāq de aur kisī aur se shādī kare, wuh zinā kartā hai.”

¹⁰shāgirdoṅ ne us se kahā, “agar shauhar aur bīwī kā āpas kā tālluq aisā hai to shādī na karnā behtar hai.”

¹¹īsā ne jawāb diyā, “har koī yih bāt samajh nahīṅ saktā balki sirf wuh jise is qābil banā diyā gayā ho.

¹²kyūṅki kuchh paidāish hī se shādī karne ke qābil nahīṅ hote, bāz ko dūsroṅ ne yūṅ banāyā hai aur bāz ne āsmān kī bādshāhī kī ḳhātir shādī karne se inkār kiyā hai. lihāzā jo yih samajh sake wuh samajh le.”

¹³ek din chhoṭe bachchoṅ ko īsā ke pās lāyā gayā tāki wuh un par apne hāth rakh kar duā kare. lekin shāgirdoṅ ne lāne wāloṅ ko malāmat kī.

¹⁴yih dekh kar īsā ne kahā, “bachchoṅ ko mere pās āne do aur unheṅ na roko, kyūṅki āsmān kī bādshāhī in jaise logoṅ ko hāsil hai.”

¹⁵us ne un par apne hāth rakhe aur phir wahāṅ se chalā gayā.

¹⁶phir ek ādmī īsā ke pās āyā. us ne kahā, “ustād, meṅ kaun sā nek kām karūṅ tāki abadī zindagī mil jāe?”

¹⁷īsā ne jawāb diyā, “tū mujhe nekī ke bāre meṅ kyūṅ pūchh rahā hai? sirf ek hī nek hai. lekin agar tū abadī zindagī meṅ dāḳhil honā chāhtā hai to ahkām ke mutābiq zindagī guzār.”

¹⁸ādmī ne pūchhā, “kaun se ahkām?” īsā ne jawāb diyā, “qatl na karnā, zinā na karnā, chorī na karnā, jhūṭī gawāhī na denā,

¹⁹apne bāp aur apnī māṅ kī izzat karnā aur apne paṛosī se waisī muhabbat rakhnā jaisī tū apne āp se rakhtā hai.”

²⁰jawān ādmī ne jawāb diyā, “maiṅ ne in tamām ahkām kī pairawī kī hai, ab kyā rah gayā hai?”

²¹īsā ne use batāyā, “agar tū kāmil honā chāhtā hai to jā aur apnī pūrī jāydād faroḳht karke paise ġharīboṅ meṅ taqsīm kar de. phir tere lie āsmān par ḳhazānā jamā ho jāegā. is ke bād ā kar mere pīchhe ho le.”

²²yih sun kar naujawān māyūs ho kar chalā gayā, kyūṅki wuh nihāyat daulatmand thā.

²³is par īsā ne apne shāgirdoṅ se kahā, “maiṅ tum ko sach batātā hūṅ ki daulatmand ke lie āsmān kī bādshāhī meṅ dāḳhil honā mushkil hai.

²⁴maiṅ yih dubārā kahtā hūṅ, amīr ke āsmān kī bādshāhī meṅ dāḳhil hone kī nisbat zyādā āsān yih hai ki ūṅṭ sūī ke nāke meṅ se guzar jāe.”

²⁵yih sun kar shāgird nihāyat hairatzadā hue aur pūchhne lage, “phir kis ko najāt hāsil ho saktī hai?”

²⁶īsā ne ġhaur se un kī taraf dekh kar jawāb diyā, “yih insān ke lie to nāmumkin hai, lekin allāh ke lie sab kuchh mumkin hai.”

²⁷phir patras bol uṭhā, “ham to apnā sab kuchh chhoṛ kar āp ke pīchhe ho lie haiṅ. hameṅ kyā milegā?”

²⁸īsā ne un se kahā, “maiṅ tum ko sach batātā hūṅ, duniyā kī naī taḳhlīq par jab ibn-e-ādam apne jalālī taḳht par baiṭhegā to tum bhī jinhoṅ ne merī pairawī kī hai bārah taḳhtoṅ par baiṭh kar isrāīl ke bārah qabīloṅ kī adālat karoge.

²⁹aur jis ne bhī merī ḳhātir apne gharoṅ, bhāiyoṅ, bahnoṅ, bāp, māṅ, bachchoṅ yā khetoṅ ko chhoṛ diyā hai use sau gunā zyādā mil jāegā aur mīrās meṅ abadī zindagī pāegā.

³⁰lekin bahut se log jo ab awwal haiṅ us waqt āḳhir hoṅge aur jo ab āḳhir haiṅ wuh awwal hoṅge.