Read Roman Urdu Geo mattī 2 Bible Online

mattī 2 - Roman Urdu Geo bible

mattī 2

¹īsā herodes bādshāh ke zamāne meṅ sūbā yahūdiyā ke shahr bait-laham meṅ paidā huā. un dinoṅ meṅ kuchh majūsī ālim mashriq se ā kar yarūshalam pahuṅch gae.

²unhoṅ ne pūchhā, “yahūdiyoṅ kā wuh bādshāh kahāṅ hai jo hāl hī meṅ paidā huā hai? kyūṅki ham ne mashriq meṅ us kā sitārā dekhā hai aur ham use sijdā karne āe haiṅ.”

³yih sun kar herodes bādshāh pūre yarūshalam samet ghabrā gayā.

⁴tamām rāhnumā imāmoṅ aur sharīat ke ulamā ko jamā karke us ne un se daryāft kiyā ki masīh kahāṅ paidā hogā.

⁵unhoṅ ne jawāb diyā, “yahūdiyā ke shahr bait-laham meṅ, kyūṅki nabī kī mārifat yūṅ likhā hai,

⁶‘ai mulk-e-yahūdiyā meṅ wāqe bait-laham, tū yahūdiyā ke hukmrānoṅ meṅ hargiz sab se chhoṭā nahīṅ. kyūṅki tujh meṅ se ek hukmrān niklegā jo merī qaum isrāīl kī gallābānī karegā’.”

⁷is par herodes ne ḳhufiyā taur par majūsī ālimoṅ ko bulā kar tafsīl se pūchhā ki wuh sitārā kis waqt dikhāī diyā thā.

⁸phir us ne unheṅ batāyā, “bait-laham jāeṅ aur tafsīl se bachche kā patā lagāeṅ. jab āp use pā leṅ to mujhe ittilā deṅ tāki maiṅ bhī jā kar use sijdā karūṅ.”

⁹bādshāh ke in alfāz ke bād wuh chale gae. aur dekho jo sitārā unhoṅ ne mashriq meṅ dekhā thā wuh un ke āge āge chaltā gayā aur chalte chalte us maqām ke ūpar ṭhahar gayā jahāṅ bachchā thā.

¹⁰sitāre ko dekh kar wuh bahut ḳhush hue.

¹¹wuh ghar meṅ dāḳhil hue aur bachche ko māṅ ke sāth dekh kar unhoṅ ne aundhe muṅh gir kar use sijdā kiyā. phir apne ḍibbe khol kar use sone, lubān aur mur ke tohfe pesh kie.

¹²jab rawānagī kā waqt āyā to wuh yarūshalam se ho kar na gae balki ek aur rāste se apne mulk chale gae. kyūṅki unheṅ ḳhwāb meṅ āgāh kiyā gayā thā ki herodes ke pās wāpas na jāo.

¹³un ke chale jāne ke bād rab kā farishtā ḳhwāb meṅ yūsuf par zāhir huā aur kahā, “uṭh, bachche ko us kī māṅ samet le kar misr ko hijrat kar jā. jab tak maiṅ tujhe ittilā na dūṅ wahīṅ ṭhahrā rah, kyūṅki herodes bachche ko talāsh karegā tāki use qatl kare.”

¹⁴yūsuf uṭhā aur usī rāt bachche ko us kī māṅ samet le kar misr ke lie rawānā huā.

¹⁵wahāṅ wuh herodes ke intiqāl tak rahā. yūṅ wuh bāt pūrī huī jo rab ne nabī kī mārifat farmāī thī, “maiṅ ne apne farzand ko misr se bulāyā.”

¹⁶jab herodes ko mālūm huā ki majūsī ālimoṅ ne mujhe fareb diyā hai to use baṛā taish āyā. us ne apne faujiyoṅ ko bait-laham bhej kar unheṅ hukm diyā ki bait-laham aur irdgird ke ilāqe ke un tamām laṛkoṅ ko qatl kareṅ jin kī umr do sāl tak ho. kyūṅki us ne majūsiyoṅ se bachche kī umr ke bāre meṅ yih mālūm kar liyā thā.

¹⁷yūṅ yarmiyāh nabī kī peshgoī pūrī huī,

¹⁸“rāmā meṅ shor mach gayā hai, rone pīṭne aur shadīd mātam kī āwāzeṅ. rāḳhil apne bachchoṅ ke lie ro rahī hai aur tasallī qabūl nahīṅ kar rahī, kyūṅki wuh halāk ho gae haiṅ.”

¹⁹jab herodes intiqāl kar gayā to rab kā farishtā ḳhwāb meṅ yūsuf par zāhir huā jo abhī misr hī meṅ thā.

²⁰farishte ne use batāyā, “uṭh, bachche ko us kī māṅ samet le kar mulk-e-isrāīl wāpas chalā jā, kyūṅki jo bachche ko jān se mārne ke darpai the wuh mar gae haiṅ.”

²¹chunāṅche yūsuf uṭhā aur bachche aur us kī māṅ ko le kar mulk-e-isrāīl meṅ lauṭ āyā.

²²lekin jab us ne sunā ki arḳhilāus apne bāp herodes kī jagah yahūdiyā meṅ taḳhtnashīn ho gayā hai to wuh wahāṅ jāne se ḍar gayā. phir ḳhwāb meṅ hidāyat pā kar wuh galīl ke ilāqe ke lie rawānā huā.

²³wahāṅ wuh ek shahr meṅ jā basā jis kā nām nāsarat thā. yūṅ nabiyoṅ kī bāt pūrī huī ki ‘wuh nāsarī kahlāegā.’