Read Roman Urdu Geo mattī 21 Bible Online

mattī 21 - Roman Urdu Geo bible

mattī 21

¹wuh yarūshalam ke qarīb bait-fage pahuṅche. yih gāoṅ zaitūn ke pahāṛ par wāqe thā. īsā ne do shāgirdoṅ ko bhejā

²aur kahā, “sāmne wāle gāoṅ meṅ jāo. wahāṅ tum ko fauran ek gadhī nazar āegī jo apne bachche ke sāth bandhī huī hogī. unheṅ khol kar yahāṅ le āo.

³agar koī yih dekh kar tum se kuchh kahe to use batā denā, ‘ḳhudāwand ko in kī zarūrat hai.’ yih sun kar wuh fauran inheṅ bhej degā.”

⁴yūṅ nabī kī yih peshgoī pūrī huī,

⁵‘siyyūn beṭī ko batā denā, dekh, terā bādshāh tere pās ā rahā hai. wuh halīm hai aur gadhe par, hāṅ gadhī ke bachche par sawār hai.’

⁶donoṅ shāgird chale gae. unhoṅ ne waisā hī kiyā jaisā īsā ne unheṅ batāyā thā.

⁷wuh gadhī ko bachche samet le āe aur apne kapṛe un par rakh die. phir īsā un par baiṭh gayā.

⁸jab wuh chal paṛā to bahut zyādā logoṅ ne us ke āge āge rāste meṅ apne kapṛe bichhā die. bāz ne shāḳheṅ bhī us ke āge āge rāste meṅ bichhā dīṅ jo unhoṅ ne daraḳhtoṅ se kāṭ lī thīṅ.

⁹log īsā ke āge aur pīchhe chal rahe the aur chillā kar yih nāre lagā rahe the, “ibn-e-dāūd ko hoshānā! [5] mubārak hai wuh jo rab ke nām se ātā hai. āsmān kī bulandiyoṅ par hoshānā.” [6]

¹⁰jab īsā yarūshalam meṅ dāḳhil huā to pūrā shahr hil gayā. sab ne pūchhā, “yih kaun hai?”

¹¹hujūm ne jawāb diyā, “yih īsā hai, wuh nabī jo galīl ke nāsarat se hai.”

¹²aur īsā bait-ul-muqaddas meṅ jā kar un sab ko nikālne lagā jo wahāṅ qurbāniyoṅ ke lie darkār chīzoṅ kī ḳharīd-o-faroḳht kar rahe the. us ne sikkoṅ kā tabādalā karne wāloṅ kī mezeṅ aur kabūtar bechne wāloṅ kī kursiyāṅ ulaṭ dīṅ

¹³aur un se kahā, “kalām-e-muqaddas meṅ likhā hai, ‘merā ghar duā kā ghar kahlāegā.’ lekin tum ne use ḍākuoṅ ke aḍḍe meṅ badal diyā hai.”

¹⁴andhe aur langaṛe bait-ul-muqaddas meṅ us ke pās āe aur us ne unheṅ shifā dī.

¹⁵lekin rāhnumā imām aur sharīat ke ulamā nārāz hue jab unhoṅ ne us ke hairatangez kām dekhe aur yih ki bachche bait-ul-muqaddas meṅ “ibn-e-dāūd ko hoshānā” chillā rahe haiṅ.

¹⁶unhoṅ ne us se pūchhā, “kyā āp sun rahe haiṅ ki yih bachche kyā kah rahe haiṅ?” “jī,” īsā ne jawāb diyā, “kyā tum ne kalām-e-muqaddas meṅ kabhī nahīṅ paṛhā ki ‘tū ne chhoṭe bachchoṅ aur shīrḳhwāroṅ kī zabān ko tayyār kiyā hai tāki wuh terī tamjīd kareṅ’?”

¹⁷phir wuh unheṅ chhoṛ kar shahr se niklā aur bait-aniyāh pahuṅchā jahāṅ us ne rāt guzārī.

¹⁸agle din subhsawere jab wuh yarūshalam lauṭ rahā thā to īsā ko bhūk lagī.

¹⁹rāste ke qarīb anjīr kā ek daraḳht dekh kar wuh us ke pās gayā. lekin jab wuh wahāṅ pahuṅchā to dekhā ki phal nahīṅ lagā balki sirf patte hī patte haiṅ. is par us ne daraḳht se kahā, “ab se kabhī bhī tujh meṅ phal na lage!” daraḳht fauran sūkh gayā.

²⁰yih dekh kar shāgird hairān hue aur kahā, “anjīr kā daraḳht itnī jaldī se kis tarah sūkh gayā?”

²¹īsā ne jawāb diyā, “maiṅ tum ko sach batātā hūṅ, agar tum shak na karo balki īmān rakho to phir tum na sirf aisā kām kar sakoge balki is se bhī baṛā. tum is pahāṛ se kahoge, ‘uṭh, apne āp ko samundar meṅ girā de’ to yih ho jāegā.

²²agar tum īmān rakho to jo kuchh bhī tum duā meṅ māṅgoge wuh tum ko mil jāegā.”

²³īsā bait-ul-muqaddas meṅ dāḳhil ho kar tālīm dene lagā. itne meṅ rāhnumā imām aur qaum ke buzurg us ke pās āe aur pūchhā, “āp yih sab kuchh kis iḳhtiyār se kar rahe haiṅ? kis ne āp ko yih iḳhtiyār diyā hai?”

²⁴īsā ne jawāb diyā, “merā bhī tum se ek sawāl hai. is kā jawāb do to phir tum ko batā dūṅgā ki maiṅ yih kis iḳhtiyār se kar rahā hūṅ.

²⁵mujhe batāo ki yahyā kā baptismā kahāṅ se thā - kyā wuh āsmānī thā yā insānī?” wuh āpas meṅ bahs karne lage, “agar ham kaheṅ ‘āsmānī’ to wuh pūchhegā, ‘to phir tum us par īmān kyūṅ na lāe?’

²⁶lekin ham kaise kah sakte haiṅ ki wuh insānī thā? ham to ām logoṅ se ḍarte haiṅ, kyūṅki wuh sab mānte haiṅ ki yahyā nabī thā.”

²⁷chunāṅche unhoṅ ne jawāb diyā, “ham nahīṅ jānte.” īsā ne kahā, “phir maiṅ bhī tum ko nahīṅ batātā ki maiṅ yih sab kuchh kis iḳhtiyār se kar rahā hūṅ.

²⁸tumhārā kyā ḳhayāl hai? ek ādmī ke do beṭe the. bāp baṛe beṭe ke pās gayā aur kahā, ‘beṭā, āj angūr ke bāġh meṅ jā kar kām kar.’

²⁹beṭe ne jawāb diyā, ‘maiṅ jānā nahīṅ chāhtā,’ lekin bād meṅ us ne apnā ḳhayāl badal liyā aur bāġh meṅ chalā gayā.

³⁰itne meṅ bāp chhoṭe beṭe ke pās bhī gayā aur use bāġh meṅ jāne ko kahā. ‘jī janāb, maiṅ jāūṅgā,’ chhoṭe beṭe ne kahā. lekin wuh na gayā.

³¹ab mujhe batāo ki kis beṭe ne apne bāp kī marzī pūrī kī?” “pahle beṭe ne,” unhoṅ ne jawāb diyā. īsā ne kahā, “maiṅ tum ko sach batātā hūṅ ki ṭaiks lene wāle aur kasbiyāṅ tum se pahle allāh kī bādshāhī meṅ dāḳhil ho rahe haiṅ.

³²kyūṅki yahyā tum ko rāstbāzī kī rāh dikhāne āyā aur tum us par īmān na lāe. lekin ṭaiks lene wāle aur kasbiyāṅ us par īmān lāe. aur yih dekh kar bhī tum ne apnā ḳhayāl na badlā aur us par īmān na lāe.

³³ek aur tamsīl suno. ek zamīndār thā jis ne angūr kā bāġh lagāyā. us ne us kī chārdīwārī banāī, angūroṅ kā ras nikālne ke lie ek gaṛhe kī khudāī kī aur pahredāroṅ ke lie burj tāmīr kiyā. phir wuh use muzāreoṅ ke sapurd karke bairūn-e-mulk chalā gayā.

³⁴jab angūr ko toṛne kā waqt qarīb ā gayā to us ne apne naukaroṅ ko muzāreoṅ ke pās bhej diyā tāki wuh un se mālik kā hissā wasūl kareṅ.

³⁵lekin muzāreoṅ ne us ke naukaroṅ ko pakaṛ liyā. unhoṅ ne ek kī piṭāī kī, dūsre ko qatl kiyā aur tīsre ko sangsār kiyā.

³⁶phir mālik ne mazīd naukaroṅ ko un ke pās bhej diyā jo pahle kī nisbat zyādā the. lekin muzāreoṅ ne un ke sāth bhī wuhī sulūk kiyā.

³⁷āḳhirkār zamīndār ne apne beṭe ko un ke pās bhejā. us ne kahā, ‘āḳhir mere beṭe kā to lihāz kareṅge.’

³⁸lekin beṭe ko dekh kar muzāre ek dūsre se kahne lage, ‘yih zamīn kā wāris hai. āo, ham ise qatl karke us kī mīrās par qabzā kar leṅ.’

³⁹unhoṅ ne use pakaṛ kar bāġh se bāhar phaiṅk diyā aur qatl kiyā.”

⁴⁰īsā ne pūchhā, “ab batāo, bāġh kā mālik jab āegā to un muzāreoṅ ke sāth kyā karegā?”

⁴¹unhoṅ ne jawāb diyā, “wuh unheṅ burī tarah tabāh karegā aur bāġh ko dūsroṅ ke sapurd kar degā, aise muzāreoṅ ke sapurd jo waqt par use fasal kā us kā hissā deṅge.”

⁴²īsā ne un se kahā, “kyā tum ne kabhī kalām kā yih hawālā nahīṅ paṛhā, ‘jis patthar ko makān banāne wāloṅ ne radd kiyā, wuh kone kā bunyādī patthar ban gayā. yih rab ne kiyā aur deḳhne meṅ kitnā hairatangez hai’?

⁴³is lie maiṅ tumheṅ batātā hūṅ ki allāh kī bādshāhī tum se le lī jāegī aur ek aisī qaum ko dī jāegī jo is ke mutābiq phal lāegī.

⁴⁴jo is patthar par giregā wuh ṭukṛe ṭukṛe ho jāegā, jabki jis par wuh ḳhud giregā use wuh pīs ḍālegā.”

⁴⁵īsā kī tamsīleṅ sun kar rāhnumā imām aur farīsī samajh gae ki wuh hamāre bāre meṅ bāt kar rahā hai.

⁴⁶unhoṅ ne īsā ko giriftār karne kī koshish kī, lekin wuh awām se ḍarte the kyūṅki wuh samajhte the ki īsā nabī hai.