Read Roman Urdu Geo mattī 22 Bible Online

mattī 22 - Roman Urdu Geo bible

mattī 22

¹īsā ne ek bār phir tamsīloṅ meṅ un se bāt kī.

²“āsmān kī bādshāhī ek bādshāh se mutābiqat rakhtī hai jis ne apne beṭe kī shādī kī ziyāfat kī tayyāriyāṅ karwāīṅ.

³jab ziyāfat kā waqt ā gayā to us ne apne naukaroṅ ko mehmānoṅ ke pās yih ittilā dene ke lie bhejā ki wuh āeṅ, lekin wuh ānā nahīṅ chāhte the.

⁴phir us ne mazīd kuchh naukaroṅ ko bhej kar kahā, ‘mehmānoṅ ko batānā ki maiṅ ne apnā khānā tayyār kar rakhā hai. bailoṅ aur moṭe-tāze bachhṛoṅ ko zabah kiyā gayā hai,

⁵sab kuchh tayyār hai. āeṅ, ziyāfat meṅ sharīk ho jāeṅ.’ lekin mehmānoṅ ne parwā na kī balki apne muḳhtalif kāmoṅ meṅ lag gae. ek apne khet ko chalā gayā, dūsrā apne kārobār meṅ masrūf ho gayā.

⁶bāqiyoṅ ne bādshāh ke naukaroṅ ko pakaṛ liyā aur un se burā sulūk karke unheṅ qatl kiyā.

⁷bādshāh baṛe taish meṅ ā gayā. us ne apnī fauj ko bhej kar qātiloṅ ko tabāh kar diyā aur un kā shahr jalā diyā.

⁸phir us ne apne naukaroṅ se kahā, ‘shādī kī ziyāfat to tayyār hai, lekin jin mehmānoṅ ko maiṅ ne dāwat dī thī wuh āne ke lāiq nahīṅ the.

⁹ab wahāṅ jāo jahāṅ saṛakeṅ shahr se nikaltī haiṅ aur jis se bhī mulāqāt ho jāe use ziyāfat ke lie dāwat de denā.’

¹⁰chunāṅche naukar saṛakoṅ par nikle aur jis se bhī mulāqāt huī use lāe, ḳhwāh wuh achchhā thā yā burā. yūṅ shādī hāl mehmānoṅ se bhar gayā.

¹¹lekin jab bādshāh mehmānoṅ se milne ke lie andar āyā to use ek ādmī nazar āyā jis ne shādī ke lie munāsib kapṛe nahīṅ pahne the.

¹²bādshāh ne pūchhā, ‘dost, tum shādī kā libās pahne baġhair andar kis tarah āe?’ wuh ādmī koī jawāb na de sakā.

¹³phir bādshāh ne apne darbāriyoṅ ko hukm diyā, ‘is ke hāth aur pāoṅ bāndh kar ise bāhar tārīkī meṅ phaiṅk do, wahāṅ jahāṅ log rote aur dāṅt pīste raheṅge.’

¹⁴kyūṅki bulāe hue to bahut haiṅ, lekin chune hue kam.”

¹⁵phir farīsiyoṅ ne jā kar āpas meṅ mashwarā kiyā ki ham īsā ko kis tarah aisī bāt karne ke lie ubhāreṅ jis se use pakaṛā jā sake.

¹⁶is maqsad ke taht unhoṅ ne apne shāgirdoṅ ko herodes ke pairokāroṅ samet īsā ke pās bhejā. unhoṅ ne kahā, “ustād, ham jānte haiṅ ki āp sachche haiṅ aur diyānatdārī se allāh kī rāh kī tālīm dete haiṅ. āp kisī kī parwā nahīṅ karte kyūṅki āp ġhairjānibdār haiṅ.

¹⁷ab hameṅ apnī rāy batāeṅ. kyā romī shahanshāh ko ṭaiks denā jāiz hai yā nājāiz?”

¹⁸lekin īsā ne un kī burī nīyat pahchān lī. us ne kahā, “riyākāro, tum mujhe kyūṅ phaṅsānā chāhte ho?

¹⁹mujhe wuh sikkā dikhāo jo ṭaiks adā karne ke lie istemāl hotā hai.” wuh us ke pās chāṅdī kā ek romī sikkā le āe

²⁰to us ne pūchhā, “kis kī sūrat aur nām is par kandā hai?”

²¹unhoṅ ne jawāb diyā, “shahanshāh kā.” us ne kahā, “to jo shahanshāh kā hai shahanshāh ko do aur jo allāh kā hai allāh ko.”

²²us kā yih jawāb sun kar wuh hakkā-bakkā rah gae aur use chhoṛ kar chale gae.

²³us din sadūqī īsā ke pās āe. sadūqī nahīṅ mānte ki roz-e-qiyāmat murde jī uṭheṅge. unhoṅ ne īsā se ek sawāl kiyā.

²⁴“ustād, mūsā ne hameṅ hukm diyā ki agar koī shādīshudā ādmī beaulād mar jāe aur us kā bhāī ho to bhāī kā farz hai ki wuh bewā se shādī karke apne bhāī ke lie aulād paidā kare.

²⁵ab farz kareṅ ki hamāre darmiyān sāt bhāī the. pahle ne shādī kī, lekin beaulād faut huā. is lie dūsre bhāī ne bewā se shādī kī.

²⁶lekin wuh bhī beaulād mar gayā. phir tīsre bhāī ne us se shādī kī. yih silsilā sātweṅ bhāī tak jārī rahā. yake bād dīgare har bhāī bewā se shādī karne ke bād mar gayā.

²⁷āḳhir meṅ bewā bhī faut ho gaī.

²⁸ab batāeṅ ki qiyāmat ke din wuh kis kī bīwī hogī? kyūṅki sāt ke sāt bhāiyoṅ ne us se shādī kī thī.”

²⁹īsā ne jawāb diyā, “tum is lie ġhaltī par ho ki na tum kalām-e-muqaddas se wāqif ho, na allāh kī qudrat se.

³⁰kyūṅki qiyāmat ke din log na shādī kareṅge na un kī shādī karāī jāegī balki wuh āsmān par farishtoṅ kī mānind hoṅge.

³¹rahī yih bāt ki murde jī uṭheṅge, kyā tum ne wuh bāt nahīṅ paṛhī jo allāh ne tum se kahī?

³²us ne farmāyā, ‘maiṅ ibrāhīm kā ḳhudā, is'hāq kā ḳhudā aur yāqūb kā ḳhudā hūṅ,’ hālāṅki us waqt tīnoṅ kāfī arse se mar chuke the. is kā matlab hai ki yih haqīqat meṅ zindā haiṅ. kyūṅki allāh murdoṅ kā nahīṅ balki zindoṅ kā ḳhudā hai.”

³³yih sun kar hujūm us kī tālīm ke bāis hairān rah gayā.

³⁴jab farīsiyoṅ ne sunā ki īsā ne sadūqiyoṅ ko lājawāb kar diyā hai to wuh jamā hue.

³⁵un meṅ se ek ne jo sharīat kā ālim thā use phaṅsāne ke lie sawāl kiyā,

³⁶“ustād, sharīat meṅ sab se baṛā hukm kaun sā hai?”

³⁷īsā ne jawāb diyā, “‘rab apne ḳhudā se apne pūre dil, apnī pūrī jān aur apne pūre zahan se pyār karnā.’

³⁸yih awwal aur sab se baṛā hukm hai.

³⁹aur dūsrā hukm is ke barābar yih hai, ‘apne paṛosī se waisī muhabbat rakhnā jaisī tū apne āp se rakhtā hai.’

⁴⁰tamām sharīat aur nabiyoṅ kī tālīmāt in do ahkām par mabnī haiṅ.”

⁴¹jab farīsī ikaṭṭhe the to īsā ne un se pūchhā,

⁴²“tumhārā masīh ke bāre meṅ kyā ḳhayāl hai? wuh kis kā farzand hai?” unhoṅ ne jawāb diyā, “wuh dāūd kā farzand hai.”

⁴³īsā ne kahā, “to phir dāūd rūh-ul-quds kī mārifat use kis tarah ‘rab’ kahtā hai? kyūṅki wuh farmātā hai,

⁴⁴‘rab ne mere rab se kahā, mere dahne hāth baiṭh, jab tak maiṅ tere dushmanoṅ ko tere pāoṅ ke nīche na kar dūṅ.’

⁴⁵dāūd to ḳhud masīh ko rab kahtā hai. to phir wuh kis tarah us kā farzand ho saktā hai?”

⁴⁶koī bhī jawāb na de sakā, aur us din se kisī ne bhī us se mazīd kuchh pūchhne kī jur'at na kī.