Read Roman Urdu Geo mattī 23 Bible Online

mattī 23 - Roman Urdu Geo bible

mattī 23

¹phir īsā hujūm aur apne shāgirdoṅ se muḳhātib huā,

²“sharīat ke ulamā aur farīsī mūsā kī kursī par baiṭhe haiṅ.

³chunāṅche jo kuchh wuh tum ko batāte haiṅ wuh karo aur us ke mutābiq zindagī guzāro. lekin jo kuchh wuh karte haiṅ wuh na karo, kyūṅki wuh ḳhud apnī tālīm ke mutābiq zindagī nahīṅ guzārte.

⁴wuh bhārī gaṭhaṛiyāṅ bāndh bāndh kar logoṅ ke kandhoṅ par rakh dete haiṅ, lekin ḳhud unheṅ uṭhāne ke lie ek unglī tak hilāne ko tayyār nahīṅ hote.

⁵jo bhī karte haiṅ dikhāwe ke lie karte haiṅ. jo tāwīz [7] wuh apne bāzū'oṅ aur peshāniyoṅ par bāndhte aur jo phundne apne libās se lagāte haiṅ wuh ḳhās baṛe hote haiṅ.

⁶un kī bas ek hī ḳhwāhish hotī hai ki ziyāfatoṅ aur ibādatḳhānoṅ meṅ izzat kī kursiyoṅ par baiṭh jāeṅ.

⁷jab log bāzāroṅ meṅ salām karke un kī izzat karte aur ‘ustād’ kah kar un se bāt karte haiṅ to phir wuh ḳhush ho jāte haiṅ.

⁸lekin tum ko ustād nahīṅ kahlānā chāhie, kyūṅki tumhārā sirf ek hī ustād hai jabki tum sab bhāī ho.

⁹aur duniyā meṅ kisī ko ‘bāp’ kah kar us se bāt na karo, kyūṅki tumhārā ek hī bāp hai aur wuh āsmān par hai.

¹⁰hādī na kahlānā kyūṅki tumhārā sirf ek hī hādī hai yānī al-masīh.

¹¹tum meṅ se sab se baṛā shaḳhs tumhārā ḳhādim hogā.

¹²kyūṅki jo bhī apne āp ko sarfarāz karegā use past kiyā jāegā aur jo apne āp ko past karegā use sarfarāz kiyā jāegā.

¹³sharīat ke ālimo aur farīsiyo, tum par afsos! riyākāro! tum logoṅ ke sāmne āsmān kī bādshāhī par tālā lagāte ho. na tum ḳhud dāḳhil hote ho, na unheṅ dāḳhil hone dete ho jo andar jānā chāhte haiṅ.

¹⁴[sharīat ke ālimo aur farīsiyo, tum par afsos! riyākāro! tum bewāoṅ ke gharoṅ par qabzā kar lete aur dikhāwe ke lie lambī lambī namāz paṛhte ho. is lie tumheṅ zyādā sazā milegī.]

¹⁵sharīat ke ālimo aur farīsiyo, tum par afsos! riyākāro! tum ek naumurīd banāne kī ḳhātir ḳhushkī aur tarī ke lambe safar karte ho. aur jab is meṅ kāmyāb ho jāte ho to tum us shaḳhs ko apnī nisbat jahannum kā dugnā sharīr farzand banā dete ho.

¹⁶andhe rāhnumāo, tum par afsos! tum kahte ho, ‘agar koī bait-ul-muqaddas kī qasam khāe to zarūrī nahīṅ ki wuh use pūrā kare. lekin agar wuh bait-ul-muqaddas ke sone kī qasam khāe to lāzim hai ki use pūrā kare.’

¹⁷andhe ahmaqo! zyādā aham kiyā hai, sonā yā bait-ul-muqaddas jo sone ko maḳhsūs-o-muqaddas banātā hai?

¹⁸tum yih bhī kahte ho, ‘agar koī qurbāngāh kī qasam khāe to zarūrī nahīṅ ki wuh use pūrā kare. lekin agar wuh qurbāngāh par paṛe hadie kī qasam khāe to lāzim hai ki wuh use pūrā kare.’

¹⁹andho! zyādā aham kiyā hai, hadiyā yā qurbāngāh jo hadie ko maḳhsūs-o-muqaddas banātī hai?

²⁰ġharz, jo qurbāngāh kī qasam khātā hai wuh un tamām chīzoṅ kī qasam bhī khātā hai jo us par paṛī haiṅ.

²¹aur jo bait-ul-muqaddas kī qasam khātā hai wuh us kī bhī qasam khātā hai jo us meṅ sukūnat kartā hai.

²²aur jo āsmān kī qasam khātā hai wuh allāh ke taḳht kī aur us par baiṭhne wāle kī qasam bhī khātā hai.

²³sharīat ke ālimo aur farīsiyo, tum par afsos! riyākāro! go tum baṛī ehtiyāt se paudīne, ajwāin aur zīre kā daswāṅ hissā hadie ke lie maḳhsūs karte ho, lekin tum ne sharīat kī zyādā aham bātoṅ ko nazarandāz kar diyā hai yānī insāf, rahm aur wafādārī ko. lāzim hai ki tum yih kām bhī karo aur pahlā bhī na chhoṛo.

²⁴andhe rāhnumāo! tum apne mashrūb chhānte ho tāki ġhaltī se machchhar na pī liyā jāe, lekin sāth sāth ūṅṭ ko nigal lete ho.

²⁵sharīat ke ālimo aur farīsiyo, tum par afsos! riyākāro! tum bāhar se har pyāle aur bartan kī safāī karte ho, lekin andar se wuh lūṭ-mār aur aishparastī se bhare hote haiṅ.

²⁶andhe farīsiyo, pahle andar se pyāle aur bartan kī safāī karo, aur phir wuh bāhar se bhī pāk-sāf ho jāeṅge.

²⁷sharīat ke ālimo aur farīsiyo, tum par afsos! riyākāro! tum aisī qabroṅ se mutābiqat rakhte ho jin par safedī kī gaī ho. go wuh bāhar se dilkash nazar ātī haiṅ, lekin andar se wuh murdoṅ kī haḍḍiyoṅ aur har qism kī nāpākī se bharī hotī haiṅ.

²⁸tum bhī bāhar se rāstbāz dikhāī dete ho jabki andar se tum riyākārī aur bedīnī se māmūr hote ho.

²⁹sharīat ke ālimo aur farīsiyo, tum par afsos! riyākāro! tum nabiyoṅ ke lie qabreṅ tāmīr karte aur rāstbāzoṅ ke mazār sajāte ho.

³⁰aur tum kahte ho, ‘agar ham apne bāpdādā ke zamāne meṅ zindā hote to nabiyoṅ ko qatl karne meṅ sharīk na hote.’

³¹lekin yih kahne se tum apne ḳhilāf gawāhī dete ho ki tum nabiyoṅ ke qātiloṅ kī aulād ho.

³²ab jāo, wuh kām mukammal karo jo tumhāre bāpdādā ne adhūrā chhoṛ diyā thā.

³³sāṅpo, zahrīle sāṅpoṅ ke bachcho! tum kis tarah jahannum kī sazā se bach pāoge?

³⁴is lie maiṅ nabiyoṅ, dānishmandoṅ aur sharīat ke ālimoṅ ko tumhāre pās bhej detā hūṅ. un meṅ se bāz ko tum qatl aur maslūb karoge aur bāz ko apne ibādatḳhānoṅ meṅ le jā kar koṛe lagwāoge aur shahr-ba-shahr un kā tāqqub karoge.

³⁵natīje meṅ tum tamām rāstbāzoṅ ke qatl ke zimmādār ṭhahroge - rāstbāz hābīl ke qatl se le kar zakariyāh bin barakiyāh ke qatl tak jise tum ne bait-ul-muqaddas ke darwāze aur us ke sahan meṅ maujūd qurbāngāh ke darmiyān mār ḍālā.

³⁶maiṅ tum ko sach batātā hūṅ ki yih sab kuchh isī nasl par āegā.

³⁷hāy yarūshalam, yarūshalam! tū jo nabiyoṅ ko qatl kartī aur apne pās bheje hue paiġhambaroṅ ko sangsār kartī hai. maiṅ ne kitnī hī bār terī aulād ko jamā karnā chāhā, bilkul usī tarah jis tarah murġhī apne bachchoṅ ko apne paroṅ tale jamā karke mahfūz kar letī hai. lekin tum ne na chāhā.

³⁸ab tumhāre ghar ko wīrān-o-sunsān chhoṛā jāegā.

³⁹kyūṅki maiṅ tum ko batātā hūṅ, tum mujhe us waqt tak dubārā nahīṅ dekhoge jab tak tum na kaho ki mubārak hai wuh jo rab ke nām se ātā hai.”