Read Roman Urdu Geo mattī 24 Bible Online

mattī 24 - Roman Urdu Geo bible

mattī 24

¹īsā bait-ul-muqaddas ko chhoṛ kar nikal rahā thā ki us ke shāgird us ke pās āe aur bait-ul-muqaddas kī muḳhtalif imāratoṅ kī taraf us kī tawajjuh dilāne lage.

²lekin īsā ne jawāb meṅ kahā, “kyā tum ko yih sab kuchh nazar ātā hai? maiṅ tum ko sach batātā hūṅ ki yahāṅ patthar par patthar nahīṅ rahegā balki sab kuchh ḍhā diyā jāegā.”

³bād meṅ īsā zaitūn ke pahāṛ par baiṭh gayā. shāgird akele us ke pās āe. unhoṅ ne kahā, “hameṅ zarā batāeṅ, yih kab hogā? kyā kyā nazar āegā jis se patā chalegā ki āp āne wāle haiṅ aur yih duniyā ḳhatm hone wālī hai?”

⁴īsā ne jawāb diyā, “ḳhabardār raho ki koī tumheṅ gumrāh na kar de.

⁵kyūṅki bahut se log merā nām le kar āeṅge aur kaheṅge, ‘maiṅ hī masīh hūṅ.’ yūṅ wuh bahutoṅ ko gumrāh kar deṅge.

⁶jangoṅ kī ḳhabreṅ aur afwāheṅ tum tak pahuṅcheṅgī, lekin muhtāt raho tāki tum ghabrā na jāo. kyūṅki lāzim hai ki yih sab kuchh pesh āe. to bhī abhī āḳhirat nahīṅ hogī.

⁷ek qaum dūsrī ke ḳhilāf uṭh khaṛī hogī, aur ek bādshāhī dūsrī ke ḳhilāf. kāl paṛeṅge aur jagah jagah zalzale āeṅge.

⁸lekin yih sirf dard-e-zah kī ibtidā hī hogī.

⁹phir wuh tum ko baṛī musībat meṅ ḍāl deṅge aur tum ko qatl kareṅge. tamām qaumeṅ tum se is lie nafrat kareṅgī ki tum mere pairokār ho.

¹⁰us waqt bahut se log īmān se bargashtā ho kar ek dūsre ko dushman ke hawāle kareṅge aur ek dūsre se nafrat kareṅge.

¹¹bahut se jhūṭe nabī khaṛe ho kar bahut se logoṅ ko gumrāh kar deṅge.

¹²bedīnī ke baṛh jāne kī wajah se beshtar logoṅ kī muhabbat ṭhanḍī paṛ jāegī.

¹³lekin jo āḳhir tak qāim rahegā use najāt milegī.

¹⁴aur bādshāhī kī is ḳhushḳhabrī ke paiġhām kā elān pūrī duniyā meṅ kiyā jāegā tāki tamām qaumoṅ ke sāmne us kī gawāhī dī jāe. phir hī āḳhirat āegī.

¹⁵ek din āegā jab tum muqaddas maqām meṅ wuh kuchh khaṛā dekhoge jis kā zikr dānyāl nabī ne kiyā aur jo behurmatī aur tabāhī kā bāis hai.” (qārī is par dhyān de!)

¹⁶“us waqt yahūdiyā ke rahne wāle bhāg kar pahāṛī ilāqe meṅ panāh leṅ.

¹⁷jo apne ghar kī chhat par ho wuh ghar meṅ se kuchh sāth le jāne ke lie na utre.

¹⁸jo khet meṅ ho wuh apnī chādar sāth le jāne ke lie wāpas na jāe.

¹⁹un ḳhawātīn par afsos jo un dinoṅ meṅ hāmilā hoṅ yā apne bachchoṅ ko dūdh pilātī hoṅ.

²⁰duā karo ki tum ko sardiyoṅ ke mausam meṅ yā sabat ke din hijrat na karnī paṛe.

²¹kyūṅki us waqt aisī shadīd musībat hogī ki duniyā kī taḳhlīq se āj tak deḳhne meṅ na āī hogī. is qism kī musībat bād meṅ bhī kabhī nahīṅ āegī.

²²aur agar is musībat kā daurāniyā muḳhtasar na kiyā jātā to koī na bachtā. lekin allāh ke chune huoṅ kī ḳhātir is kā daurāniyā muḳhtasar kar diyā jāegā.

²³us waqt agar koī tum ko batāe, ‘dekho, masīh yahāṅ hai’ yā ‘wuh wahāṅ hai’ to us kī bāt na mānanā.

²⁴kyūṅki jhūṭe masīh aur jhūṭe nabī uṭh khaṛe hoṅge jo baṛe ajīb-o-ġharīb nishān aur mojize dikhāeṅge tāki allāh ke chune hue logoṅ ko bhī ġhalat rāste par ḍāl deṅ - agar yih mumkin hotā.

²⁵dekho, maiṅ ne tumheṅ pahle se is se āgāh kar diyā hai.

²⁶chunāṅche agar koī tum ko batāe, ‘dekho, wuh registān meṅ hai’ to wahāṅ jāne ke lie na nikalnā. aur agar koī kahe, ‘dekho, wuh andarūnī kamroṅ meṅ hai’ to us kā yaqīn na karnā.

²⁷kyūṅki jis tarah bādal kī bijlī mashriq meṅ kaṛak kar maġhrib tak chamaktī hai usī tarah ibn-e-ādam kī āmad bhī hogī.

²⁸jahāṅ bhī lāsh paṛī ho wahāṅ giddh jamā ho jāeṅge.

²⁹musībat ke un dinoṅ ke ain bād sūraj tārīk ho jāegā aur chāṅd kī raushnī ḳhatm ho jāegī. sitāre āsmān par se gir paṛeṅge aur āsmān kī quwwateṅ hilāī jāeṅgī.

³⁰us waqt ibn-e-ādam kā nishān āsmān par nazar āegā. tab duniyā kī tamām qaumeṅ mātam kareṅgī. wuh ibn-e-ādam ko baṛī qudrat aur jalāl ke sāth āsmān ke bādaloṅ par āte hue dekheṅgī.

³¹aur wuh apne farishtoṅ ko bigul kī ūṅchī āwāz ke sāth bhej degā tāki us ke chune huoṅ ko chāroṅ taraf se jamā kareṅ, āsmān ke ek sire se dūsre sire tak ikaṭṭhā kareṅ.

³²anjīr ke daraḳht se sabaq sīkho. jūṅ hī us kī shāḳheṅ narm aur lachakdār ho jātī haiṅ aur un se koṅpleṅ phūṭ nikaltī haiṅ to tum ko mālūm ho jātā hai ki garmiyoṅ kā mausam qarīb ā gayā hai.

³³isī tarah jab tum yih wāqiāt dekhoge to jān loge ki ibn-e-ādam kī āmad qarīb balki darwāze par hai.

³⁴maiṅ tum ko sach batātā hūṅ ki is nasl ke ḳhatm hone se pahle pahle yih sab kuchh wāqe hogā.

³⁵āsmān-o-zamīn to jāte raheṅge, lekin merī bāteṅ hameshā tak qāim raheṅgī.

³⁶lekin kisī ko bhī ilm nahīṅ ki yih kis din yā kaun sī ghaṛī rūnumā hogā. āsmān ke farishtoṅ aur farzand ko bhī ilm nahīṅ balki sirf bāp ko.

³⁷jab ibn-e-ādam āegā to hālāt nūh ke dinoṅ jaise hoṅge.

³⁸kyūṅki sailāb se pahle ke dinoṅ meṅ log us waqt tak khāte-pīte aur shādiyāṅ karte karāte rahe jab tak nūh kashtī meṅ dāḳhil na ho gayā.

³⁹wuh us waqt tak āne wālī musībat ke bāre meṅ lā'ilm rahe jab tak sailāb ā kar un sab ko bahā na le gayā. jab ibn-e-ādam āegā to isī qism ke hālāt hoṅge.

⁴⁰us waqt do afrād khet meṅ hoṅge, ek ko sāth le liyā jāegā jabki dūsre ko pīchhe chhoṛ diyā jāegā.

⁴¹do ḳhawātīn chakkī par gandum pīs rahī hoṅgī, ek ko sāth le liyā jāegā jabki dūsrī ko pīchhe chhoṛ diyā jāegā.

⁴²is lie chaukas raho, kyūṅki tum nahīṅ jānte ki tumhārā ḳhudāwand kis din ā jāegā.

⁴³yaqīn jāno, agar kisī ghar ke mālik ko mālūm hotā ki chor kab āegā to wuh zarūr chaukas rahtā aur use apne ghar meṅ naqb lagāne na detā.

⁴⁴tum bhī tayyār raho, kyūṅki ibn-e-ādam aise waqt āegā jab tum us kī tawaqqo nahīṅ karoge.

⁴⁵chunāṅche kaun sā naukar wafādār aur samajhdār hai? farz karo ki ghar ke mālik ne kisī naukar ko bāqī naukaroṅ par muqarrar kiyā ho. us kī ek zimmādārī yih bhī hai ki unheṅ waqt par khānā khilāe.

⁴⁶wuh naukar mubārak hogā jo mālik kī wāpasī par yih sab kuchh kar rahā hogā.

⁴⁷maiṅ tum ko sach batātā hūṅ ki yih dekh kar mālik use apnī pūrī jāydād par muqarrar karegā.

⁴⁸lekin farz karo ki naukar apne dil meṅ soche, ‘mālik kī wāpasī meṅ abhī der hai.’

⁴⁹wuh apne sāthī naukaroṅ ko pīṭne aur sharābiyoṅ ke sāth khāne-pīne lage.

⁵⁰agar wuh aisā kare to mālik aise din aur waqt āegā jis kī tawaqqo naukar ko nahīṅ hogī.

⁵¹in hālāt ko dekh kar wuh naukar ko ṭukṛe ṭukṛe kar ḍālegā aur use riyākāroṅ meṅ shāmil karegā, wahāṅ jahāṅ log rote aur dāṅt pīste raheṅge.