Read Roman Urdu Geo mattī 28 Bible Online

mattī 28 - Roman Urdu Geo bible

mattī 28

¹itwār ko subhsawere hī mariyam magdalīnī aur dūsrī mariyam qabr ko deḳhne ke lie niklīṅ. sūraj tulū ho rahā thā.

²achānak ek shadīd zalzalā āyā, kyūṅki rab kā ek farishtā āsmān se utar āyā aur qabr ke pās jā kar us par paṛe patthar ko ek taraf luṛhkā diyā. phir wuh us par baiṭh gayā.

³us kī shakl-o-sūrat bijlī kī tarah chamak rahī thī aur us kā libās barf kī mānind safed thā.

⁴pahredār itne ḍar gae ki wuh larazte larazte murdā se ho gae.

⁵farishte ne ḳhawātīn se kahā, “mat ḍaro. mujhe mālūm hai ki tum īsā ko ḍhūnḍ rahī ho jo maslūb huā thā.

⁶wuh yahāṅ nahīṅ hai. wuh jī uṭhā hai, jis tarah us ne farmāyā thā. āo, us jagah ko ḳhud dekh lo jahāṅ wuh paṛā thā.

⁷aur ab jaldī se jā kar us ke shāgirdoṅ ko batā do ki wuh jī uṭhā hai aur tumhāre āge āge galīl pahuṅch jāegā. wahīṅ tum use dekhoge. ab maiṅ ne tum ko is se āgāh kiyā hai.”

⁸ḳhawātīn jaldī se qabr se chalī gaīṅ. wuh sahmī huī lekin baṛī ḳhush thīṅ aur dauṛī dauṛī us ke shāgirdoṅ ko yih ḳhabar sunāne gaīṅ.

⁹achānak īsā un se milā. us ne kahā, “salām.” wuh us ke pās āīṅ, us ke pāoṅ pakaṛe aur use sijdā kiyā.

¹⁰īsā ne un se kahā, “mat ḍaro. jāo, mere bhāiyoṅ ko batā do ki wuh galīl ko chale jāeṅ. wahāṅ wuh mujhe dekheṅge.”

¹¹ḳhawātīn abhī rāste meṅ thīṅ ki pahredāroṅ meṅ se kuchh shahr meṅ gae aur rāhnumā imāmoṅ ko sab kuchh batā diyā.

¹²rāhnumā imāmoṅ ne qaum ke buzurgoṅ ke sāth ek mīṭing mun'aqid kī aur pahredāroṅ ko rishwat kī baṛī raqm dene kā faislā kiyā.

¹³unhoṅ ne unheṅ batāyā, “tum ko kahnā hai, ‘jab ham rāt ke waqt so rahe the to us ke shāgird āe aur use churā le gae.’

¹⁴agar yih ḳhabar gawarnar tak pahuṅche to ham use samjhā leṅge. tum ko fikr karne kī zarūrat nahīṅ.”

¹⁵chunāṅche pahredāroṅ ne rishwat le kar wuh kuchh kiyā jo unheṅ sikhāyā gayā thā. un kī yih kahānī yahūdiyoṅ ke darmiyān bahut phailāī gaī aur āj tak un meṅ rāij hai.

¹⁶phir gyārah shāgird galīl ke us pahāṛ ke pās pahuṅche jahāṅ īsā ne unheṅ jāne ko kahā thā.

¹⁷wahāṅ use dekh kar unhoṅ ne use sijdā kiyā. lekin kuchh shak meṅ paṛ gae.

¹⁸phir īsā ne un ke pās ā kar kahā, “āsmān aur zamīn kā kul iḳhtiyār mujhe de diyā gayā hai.

¹⁹is lie jāo, tamām qaumoṅ ko shāgird banā kar unheṅ bāp, farzand aur rūh-ul-quds ke nām se baptismā do.

²⁰aur unheṅ yih sikhāo ki wuh un tamām ahkām ke mutābiq zindagī guzāreṅ jo maiṅ ne tumheṅ die haiṅ. aur dekho, maiṅ duniyā ke iḳhtitām tak hameshā tumhāre sāth hūṅ.”