Read Roman Urdu Geo mattī 3 Bible Online

mattī 3 - Roman Urdu Geo bible

mattī 3

¹un dinoṅ meṅ yahyā baptismā dene wālā āyā aur yahūdiyā ke registān meṅ elān karne lagā,

²“taubā karo, kyūṅki āsmān kī bādshāhī qarīb ā gaī hai.”

³yahyā wuhī hai jis ke bāre meṅ yasāyāh nabī ne farmāyā, ‘registān meṅ ek āwāz pukār rahī hai, rab kī rāh tayyār karo! us ke rāste sīdhe banāo.’

⁴yahyā ūṅṭoṅ ke bāloṅ kā libās pahne aur kamr par chamṛe kā paṭkā bāndhe rahtā thā. ḳhurāk ke taur par wuh ṭiḍḍiyāṅ aur janglī shahd khātā thā.

⁵log yarūshalam, pūre yahūdiyā aur daryā-e-yardan ke pūre ilāqe se nikal kar us ke pās āe.

⁶aur apne gunāhoṅ ko taslīm karke unhoṅ ne daryā-e-yardan meṅ yahyā se baptismā liyā.

⁷bahut se farīsī aur sadūqī bhī wahāṅ āe jahāṅ wuh baptismā de rahā thā. unheṅ dekh kar us ne kahā, “ai zahrīle sāṅp ke bachcho! kis ne tumheṅ āne wāle ġhazab se bachne kī hidāyat kī?

⁸apnī zindagī se zāhir karo ki tum ne wāqaī taubā kī hai.

⁹yih ḳhayāl mat karo ki ham to bach jāeṅge kyūṅki ibrāhīm hamārā bāp hai. maiṅ tum ko batātā hūṅ ki allāh in pattharoṅ se bhī ibrāhīm ke lie aulād paidā kar saktā hai.

¹⁰ab to adālat kī kulhāṛī daraḳhtoṅ kī jaṛoṅ par rakhī huī hai. har daraḳht jo achchhā phal na lāe kāṭā aur āg meṅ jhoṅkā jāegā.

¹¹maiṅ to tum taubā karne wāloṅ ko pānī se baptismā detā hūṅ, lekin ek āne wālā hai jo mujh se baṛā hai. maiṅ us ke jūtoṅ ko uṭhāne ke bhī lāiq nahīṅ. wuh tumheṅ rūh-ul-quds aur āg se baptismā degā.

¹²wuh hāth meṅ chhāj pakaṛe hue anāj ko bhūse se alag karne ke lie tayyār khaṛā hai. wuh gāhne kī jagah bilkul sāf karke anāj ko apne godām meṅ jamā karegā. lekin bhūse ko wuh aisī āg meṅ jhoṅkegā jo bujhne kī nahīṅ.”

¹³phir īsā galīl se daryā-e-yardan ke kināre āyā tāki yahyā se baptismā le.

¹⁴lekin yahyā ne use rokne kī koshish karke kahā, “mujhe to āp se baptismā lene kī zarūrat hai, to phir āp mere pās kyūṅ āe haiṅ?”

¹⁵īsā ne jawāb diyā, “ab hone hī de, kyūṅki munāsib hai ki ham yih karte hue allāh kī rāst marzī pūrī kareṅ.” [3] is par yahyā mān gayā.

¹⁶baptismā lene par īsā fauran pānī se niklā. usī lamhe āsmān khul gayā aur us ne allāh ke rūh ko dekhā jo kabūtar kī tarah utar kar us par ṭhahar gayā.

¹⁷sāth sāth āsmān se ek āwāz sunāī dī, “yih merā pyārā farzand hai, is se maiṅ ḳhush hūṅ.”