Read Roman Urdu Geo mattī 4 Bible Online

mattī 4 - Roman Urdu Geo bible

mattī 4

¹phir rūh-ul-quds īsā ko registān meṅ le gayā tāki use iblīs se āzmāyā jāe.

²chālīs din aur chālīs rāt rozā rakhne ke bād use āḳhirkār bhūk lagī.

³phir āzmāne wālā us ke pās ā kar kahne lagā, “agar tū allāh kā farzand hai to in pattharoṅ ko hukm de ki roṭī ban jāeṅ.”

⁴lekin īsā ne inkār karke kahā, “hargiz nahīṅ, kyūṅki kalām-e-muqaddas meṅ likhā hai ki insān kī zindagī sirf roṭī par munhasir nahīṅ hotī balki har us bāt par jo rab ke muṅh se nikaltī hai.”

⁵is par iblīs ne use muqaddas shahr yarūshalam le jā kar bait-ul-muqaddas kī sab se ūṅchī jagah par khaṛā kiyā aur kahā,

⁶“agar tū allāh kā farzand hai to yahāṅ se chhalāṅg lagā de. kyūṅki kalām-e-muqaddas meṅ likhā hai, ‘wuh terī ḳhātir apne farishtoṅ ko hukm degā, aur wuh tujhe apne hāthoṅ par uṭhā leṅge tāki tere pāoṅ ko patthar se ṭhes na lage’.”

⁷lekin īsā ne jawāb diyā, “kalām-e-muqaddas yih bhī farmātā hai, ‘rab apne ḳhudā ko na āzmānā’.”

⁸phir iblīs ne use ek nihāyat ūṅche pahāṛ par le jā kar use duniyā ke tamām mamālik aur un kī shān-o-shaukat dikhāī.

⁹wuh bolā, “yih sab kuchh maiṅ tujhe de dūṅgā, shart yih hai ki tū gir kar mujhe sijdā kare.”

¹⁰lekin īsā ne tīsrī bār inkār kiyā aur kahā, “iblīs, dafā ho jā! kyūṅki kalām-e-muqaddas meṅ yūṅ likhā hai, ‘rab apne ḳhudā ko sijdā kar aur sirf usī kī ibādat kar’.”

¹¹is par iblīs use chhoṛ kar chalā gayā aur farishte ā kar us kī ḳhidmat karne lage.

¹²jab īsā ko ḳhabar milī ki yahyā ko jel meṅ ḍāl diyā gayā hai to wuh wahāṅ se chalā gayā aur galīl meṅ āyā.

¹³nāsarat ko chhoṛ kar wuh jhīl ke kināre par wāqe shahr kafarnahūm meṅ rahne lagā, yānī zabūlūn aur naftālī ke ilāqe meṅ.

¹⁴yūṅ yasāyāh nabī kī peshgoī pūrī huī,

¹⁵“zabūlūn kā ilāqā, naftālī kā ilāqā, jhīl ke sāth kā rāstā, daryā-e-yardan ke pār, ġhairyahūdiyoṅ kā galīl:

¹⁶andhere meṅ baiṭhī qaum ne ek tez raushnī dekhī, maut ke sāy meṅ ḍūbe hue mulk ke bāshindoṅ par raushnī chamkī.”

¹⁷us waqt se īsā is paiġhām kī munādī karne lagā, “taubā karo, kyūṅki āsmān kī bādshāhī qarīb ā gaī hai.”

¹⁸ek din jab īsā galīl kī jhīl ke kināre kināre chal rahā thā to us ne do bhāiyoṅ ko dekhā - shamāūn jo patras bhī kahlātā thā aur andriyās ko. wuh pānī meṅ jāl ḍāl rahe the, kyūṅki wuh māhīgīr the.

¹⁹us ne kahā, “āo, mere pīchhe ho lo, maiṅ tum ko ādamgīr banāūṅgā.”

²⁰yih sunte hī wuh apne jāloṅ ko chhoṛ kar us ke pīchhe ho lie.

²¹āge jā kar īsā ne do aur bhāiyoṅ ko dekhā, yāqūb bin zabdī aur us ke bhāī yūhannā ko. wuh kashtī meṅ baiṭhe apne bāp zabdī ke sāth apne jāloṅ kī marammat kar rahe the. īsā ne unheṅ bulāyā

²²to wuh fauran kashtī aur apne bāp ko chhoṛ kar us ke pīchhe ho lie.

²³aur īsā galīl ke pūre ilāqe meṅ phirtā rahā. jahāṅ bhī wuh jātā wuh yahūdī ibādatḳhānoṅ meṅ tālīm detā, bādshāhī kī ḳhushḳhabrī sunātā aur har qism kī bīmārī aur alālat se shifā detā thā.

²⁴us kī ḳhabar mulk-e-shām ke kone kone tak pahuṅch gaī, aur log apne tamām marīzoṅ ko us ke pās lāne lage. qism qism kī bīmāriyoṅ tale dabe log, aise jo shadīd dard kā shikār the, badrūhoṅ kī girift meṅ mubtalā, mirgī wāle aur fālijzadā, ġharz jo bhī āyā īsā ne use shifā baḳhshī.

²⁵galīl, dikapulis, yarūshalam, yahūdiyā aur daryā-e-yardan ke pār ke ilāqe se baṛe baṛe hujūm us ke pīchhe chalte rahe.