Read Roman Urdu Geo mattī 5 Bible Online

mattī 5 - Roman Urdu Geo bible

mattī 5

¹bhīṛ ko dekh kar īsā pahāṛ par chaṛh kar baiṭh gayā. us ke shāgird us ke pās āe

²aur wuh unheṅ yih tālīm dene lagā:

³“mubārak haiṅ wuh jin kī rūh zarūratmand hai, kyūṅki āsmān kī bādshāhī un hī kī hai.

⁴mubārak haiṅ wuh jo mātam karte haiṅ, kyūṅki unheṅ tasallī dī jāegī.

⁵mubārak haiṅ wuh jo halīm haiṅ, kyūṅki wuh zamīn wirse meṅ pāeṅge.

⁶mubārak haiṅ wuh jinheṅ rāstbāzī kī bhūk aur pyās hai, kyūṅki wuh ser ho jāeṅge.

⁷mubārak haiṅ wuh jo rahm dil haiṅ, kyūṅki un par rahm kiyā jāegā.

⁸mubārak haiṅ wuh jo ḳhālis dil haiṅ, kyūṅki wuh allāh ko dekheṅge.

⁹mubārak haiṅ wuh jo sulah karāte haiṅ, kyūṅki wuh allāh ke farzand kahlāeṅge.

¹⁰mubārak haiṅ wuh jin ko rāstbāz hone ke sabab se satāyā jātā hai, kyūṅki unheṅ āsmān kī bādshāhī wirse meṅ milegī.

¹¹mubārak ho tum jab log merī wajah se tumheṅ lān-tān karte, tumheṅ satāte aur tumhāre bāre meṅ har qism kī burī aur jhūṭī bāt karte haiṅ.

¹²ḳhushī manāo aur bāġh bāġh ho jāo, tum ko āsmān par baṛā ajr milegā. kyūṅki isī tarah unhoṅ ne tum se pahle nabiyoṅ ko bhī īzā pahuṅchāī thī.

¹³tum duniyā kā namak ho. lekin agar namak kā zāiqā jātā rahe to phir use kyūṅkar dubārā namkīn kiyā jā saktā hai? wuh kisī bhī kām kā nahīṅ rahā balki bāhar phaiṅkā jāegā jahāṅ wuh logoṅ ke pāoṅ tale raundā jāegā.

¹⁴tum duniyā kī raushnī ho. pahāṛ par wāqe shahr kī tarah tum ko chhupāyā nahīṅ jā saktā.

¹⁵jab koī charāġh jalātā hai to wuh use bartan ke nīche nahīṅ rakhtā balki shamādān par rakh detā hai jahāṅ se wuh ghar ke tamām afrād ko raushnī detā hai.

¹⁶isī tarah tumhārī raushnī bhī logoṅ ke sāmne chamke tāki wuh tumhāre nek kām dekh kar tumhāre āsmānī bāp ko jalāl deṅ.

¹⁷yih na samjho ki maiṅ mūswī sharīat aur nabiyoṅ kī bātoṅ ko mansūḳh karne āyā hūṅ. mansūḳh karne nahīṅ balki un kī takmīl karne āyā hūṅ.

¹⁸maiṅ tum ko sach batātā hūṅ, jab tak āsmān-o-zamīn qāim raheṅge tab tak sharīat bhī qāim rahegī - na us kā koī harf, na us kā koī zer yā zabar mansūḳh hogā jab tak sab kuchh pūrā na ho jāe.

¹⁹jo in sab se chhoṭe ahkām meṅ se ek ko bhī mansūḳh kare aur logoṅ ko aisā karnā sikhāe use āsmān kī bādshāhī meṅ sab se chhoṭā qarār diyā jāegā. is ke muqābale meṅ jo in ahkām par amal karke inheṅ sikhātā hai use āsmān kī bādshāhī meṅ baṛā qarār diyā jāegā.

²⁰kyūṅki maiṅ tum ko batātā hūṅ ki agar tumhārī rāstbāzī sharīat ke ulamā aur farīsiyoṅ kī rāstbāzī se zyādā nahīṅ to tum āsmān kī bādshāhī meṅ dāḳhil hone ke lāiq nahīṅ.

²¹tum ne sunā hai ki bāpdādā ko farmāyā gayā, ‘qatl na karnā. aur jo qatl kare use adālat meṅ jawāb denā hogā.’

²²lekin maiṅ tum ko batātā hūṅ ki jo bhī apne bhāī par ġhussā kare use adālat meṅ jawāb denā hogā. isī tarah jo apne bhāī ko ‘ahmaq’ kahe use yahūdī adālat-e-āliyā meṅ jawāb denā hogā. aur jo us ko ‘bewuqūf!’ kahe wuh jahannum kī āg meṅ phaiṅke jāne ke lāiq ṭhahregā.

²³lihāzā agar tujhe bait-ul-muqaddas meṅ qurbānī pesh karte waqt yād āe ki tere bhāī ko tujh se koī shikāyat hai

²⁴to apnī qurbānī ko wahīṅ qurbāngāh ke sāmne hī chhoṛ kar apne bhāī ke pās chalā jā. pahle us se sulah kar aur phir wāpas ā kar allāh ko apnī qurbānī pesh kar.

²⁵farz karo ki kisī ne tujh par muqaddamā chalāyā hai. agar aisā ho to kachahrī meṅ dāḳhil hone se pahle pahle jaldī se jhagaṛā ḳhatm kar. aisā na ho ki wuh tujhe jaj ke hawāle kare, jaj tujhe pulis afsar ke hawāle kare aur natīje meṅ tujh ko jel meṅ ḍālā jāe.

²⁶maiṅ tujhe sach batātā hūṅ, wahāṅ se tū us waqt tak nahīṅ nikal pāegā jab tak jurmāne kī pūrī pūrī raqm adā na kar de.

²⁷tum ne yih hukm sun liyā hai ki ‘zinā na karnā.’

²⁸lekin maiṅ tumheṅ batātā hūṅ, jo kisī aurat ko burī ḳhwāhish se deḳhtā hai wuh apne dil meṅ us ke sāth zinā kar chukā hai.

²⁹agar terī dāīṅ āṅkh tujhe gunāh karne par uksāe to use nikāl kar phaiṅk de. is se pahle ki tere pūre jism ko jahannum meṅ ḍālā jāe behtar yih hai ki terā ek hī azu jātā rahe.

³⁰aur agar terā dahnā hāth tujhe gunāh karne par uksāe to use kāṭ kar phaiṅk de. is se pahle ki terā pūrā jism jahannum meṅ jāe behtar yih hai ki terā ek hī azu jātā rahe.

³¹yih bhī farmāyā gayā hai, ‘jo bhī apnī bīwī ko talāq de wuh use talāqnāmā likh de.’

³²lekin maiṅ tum ko batātā hūṅ ki agar kisī kī bīwī ne zinā na kiyā ho to bhī shauhar use talāq de to wuh us se zinā karātā hai. aur jo talāqshudā aurat se shādī kare wuh zinā kartā hai.

³³tum ne yih bhī sunā hai ki bāpdādā ko farmāyā gayā, ‘jhūṭī qasam mat khānā balki jo wāde tū ne rab se qasam khā kar kie hoṅ unheṅ pūrā karnā.’

³⁴lekin maiṅ tumheṅ batātā hūṅ, qasam bilkul na khānā. na ‘āsmān kī qasam’ kyūṅki āsmān allāh kā taḳht hai,

³⁵na ‘zamīn kī’ kyūṅki zamīn us ke pāoṅ kī chaukī hai. ‘yarūshalam kī qasam’ bhī na khānā kyūṅki yarūshalam azīm bādshāh kā shahr hai.

³⁶yahāṅ tak ki apne sar kī qasam bhī na khānā, kyūṅki tū apnā ek bāl bhī kālā yā safed nahīṅ kar saktā.

³⁷sirf itnā hī kahnā, ‘jī hāṅ’ yā ‘jī nahīṅ.’ agar is se zyādā kaho to yih iblīs kī taraf se hai.

³⁸tum ne sunā hai ki yih farmāyā gayā hai, ‘āṅkh ke badle āṅkh, dāṅt ke badle dāṅt.’

³⁹lekin maiṅ tum ko batātā hūṅ ki badkār kā muqābalā mat karnā. agar koī tere dahne gāl par thappaṛ māre to use dūsrā gāl bhī pesh kar de.

⁴⁰agar koī terī qamīs lene ke lie tujh par muqaddamā karnā chāhe to use apnī chādar bhī de denā.

⁴¹agar koī tujh ko us kā sāmān uṭhā kar ek kilomīṭar jāne par majbūr kare to us ke sāth do kilomīṭar chalā jānā.

⁴²jo tujh se kuchh māṅge use de denā aur jo tujh se qarz lenā chāhe us se inkār na karnā.

⁴³tum ne sunā hai ki farmāyā gayā hai, ‘apne paṛosī se muhabbat rakhnā aur apne dushman se nafrat karnā.’

⁴⁴lekin maiṅ tum ko batātā hūṅ, apne dushmanoṅ se muhabbat rakho aur un ke lie duā karo jo tum ko satāte haiṅ.

⁴⁵phir tum apne āsmānī bāp ke farzand ṭhahroge, kyūṅki wuh apnā sūraj sab par tulū hone detā hai, ḳhwāh wuh achchhe hoṅ yā bure. aur wuh sab par bārish barasne detā hai, ḳhwāh wuh rāstbāz hoṅ yā nārāst.

⁴⁶agar tum sirf un hī se muhabbat karo jo tum se karte haiṅ to tum ko kyā ajr milegā? ṭaiks lene wāle bhī to aisā hī karte haiṅ.

⁴⁷aur agar tum sirf apne bhāiyoṅ ke lie salāmatī kī duā karo to kaun sī ḳhās bāt karte ho? ġhairyahūdī bhī to aisā hī karte haiṅ.

⁴⁸chunāṅche waise hī kāmil ho jaisā tumhārā āsmānī bāp kāmil hai.