Read Roman Urdu Geo mattī 6 Bible Online

mattī 6 - Roman Urdu Geo bible

mattī 6

¹ḳhabardār! apne nek kām logoṅ ke sāmne dikhāwe ke lie na karo, warnā tum ko apne āsmānī bāp se koī ajr nahīṅ milegā.

²chunāṅche ḳhairāt dete waqt riyākāroṅ kī tarah na kar jo ibādatḳhānoṅ aur galiyoṅ meṅ bigul bajā kar is kā elān karte haiṅ tāki log un kī izzat kareṅ. maiṅ tum ko sach batātā hūṅ, jitnā ajr unheṅ milnā thā unheṅ mil chukā hai.

³is ke bajāe jab tū ḳhairāt de to tere dāeṅ hāth ko patā na chale ki bāyāṅ hāth kyā kar rahā hai.

⁴terī ḳhairāt yūṅ poshīdagī meṅ dī jāe to terā bāp jo poshīdā bāteṅ deḳhtā hai tujhe is kā muāwazā degā.

⁵duā karte waqt riyākāroṅ kī tarah na karnā jo ibādatḳhānoṅ aur chaukoṅ meṅ jā kar duā karnā pasand karte haiṅ, jahāṅ sab unheṅ dekh sakeṅ. maiṅ tum ko sach batātā hūṅ, jitnā ajr unheṅ milnā thā unheṅ mil chukā hai.

⁶is ke bajāe jab tū duā kartā hai to andar ke kamre meṅ jā kar darwāzā band kar aur phir apne bāp se duā kar jo poshīdagī meṅ hai. phir terā bāp jo poshīdā bāteṅ deḳhtā hai tujhe is kā muāwazā degā.

⁷duā karte waqt ġhairyahūdiyoṅ kī tarah tawīl aur bemānī bāteṅ na dohrāte raho. wuh samajhte haiṅ ki hamārī bahut sī bātoṅ ke sabab se hamārī sunī jāegī.

⁸un kī mānind na bano, kyūṅki tumhārā bāp pahle se tumhārī zarūriyāt se wāqif hai,

⁹balki yūṅ duā kiyā karo, ai hamāre āsmānī bāp, terā nām muqaddas mānā jāe.

¹⁰terī bādshāhī āe. terī marzī jis tarah āsmān meṅ pūrī hotī hai zamīn par bhī pūrī ho.

¹¹hamārī roz kī roṭī āj hameṅ de.

¹²hamāre gunāhoṅ ko muāf kar jis tarah ham ne unheṅ muāf kiyā [4] jinhoṅ ne hamārā gunāh kiyā hai.

¹³aur hameṅ āzmāish meṅ na paṛne de balki hameṅ iblīs se bachāe rakh. [kyūṅki bādshāhī, qudrat aur jalāl abad tak tere hī haiṅ.]

¹⁴kyūṅki jab tum logoṅ ke gunāh muāf karoge to tumhārā āsmānī bāp bhī tum ko muāf karegā.

¹⁵lekin agar tum unheṅ muāf na karo to tumhārā bāp bhī tumhāre gunāh muāf nahīṅ karegā.

¹⁶rozā rakhte waqt riyākāroṅ kī tarah muṅh laṭkāe na phiro, kyūṅki wuh aisā rūp bharte haiṅ tāki logoṅ ko mālūm ho jāe ki wuh rozā se haiṅ. maiṅ tum ko sach batātā hūṅ, jitnā ajr unheṅ milnā thā unheṅ mil chukā hai.

¹⁷aisā mat karnā balki roze ke waqt apne bāloṅ meṅ tel ḍāl aur apnā muṅh dho.

¹⁸phir logoṅ ko mālūm nahīṅ hogā ki tū rozā se hai balki sirf tere bāp ko jo poshīdagī meṅ hai. aur terā bāp jo poshīdā bāteṅ deḳhtā hai tujhe is kā muāwazā degā.

¹⁹is duniyā meṅ apne lie ḳhazāne jamā na karo, jahāṅ kīṛā aur zang unheṅ khā jāte aur chor naqb lagā kar churā lete haiṅ.

²⁰is ke bajāe apne ḳhazāne āsmān par jamā karo jahāṅ kīṛā aur zang unheṅ tabāh nahīṅ kar sakte, na chor naqb lagā kar churā sakte haiṅ.

²¹kyūṅki jahāṅ terā ḳhazānā hai wahīṅ terā dil bhī lagā rahegā.

²²badan kā charāġh āṅkh hai. agar terī āṅkh ṭhīk ho to phir terā pūrā badan raushan hogā.

²³lekin agar terī āṅkh ḳharāb ho to terā pūrā badan andherā hī andherā hogā. aur agar tere andar kī raushnī tārīkī ho to yih tārīkī kitnī shadīd hogī!

²⁴koī bhī do mālikoṅ kī ḳhidmat nahīṅ kar saktā. yā to wuh ek se nafrat karke dūsre se muhabbat rakhegā yā ek se lipaṭ kar dūsre ko haqīr jānegā. tum ek hī waqt meṅ allāh aur daulat kī ḳhidmat nahīṅ kar sakte.

²⁵is lie maiṅ tumheṅ batātā hūṅ, apnī zindagī kī zarūriyāt pūrī karne ke lie pareshān na raho ki hāy, maiṅ kyā khāūṅ aur kyā piyūṅ. aur jism ke lie fikrmand na raho ki hāy, maiṅ kyā pahnūṅ. kyā zindagī khāne-pīne se aham nahīṅ hai? aur kyā jism poshāk se zyādā ahmiyat nahīṅ rakhtā?

²⁶parindoṅ par ġhaur karo. na wuh bīj bote, na fasleṅ kāṭ kar unheṅ godām meṅ jamā karte haiṅ. tumhārā āsmānī bāp ḳhud unheṅ khānā khilātā hai. kyā tumhārī un kī nisbat zyādā qadar-o-qīmat nahīṅ hai?

²⁷kyā tum meṅ se koī fikr karte karte apnī zindagī meṅ ek lamhe kā bhī izāfā kar saktā hai?

²⁸aur tum apne kapṛoṅ ke lie kyūṅ fikrmand hote ho? ġhaur karo ki sosan ke phūl kis tarah ugte haiṅ. na wuh mehnat karte, na kātte haiṅ.

²⁹lekin maiṅ tumheṅ batātā hūṅ ki sulaimān bādshāh apnī pūrī shān-o-shaukat ke bāwujūd aise shāndār kapṛoṅ se mulabbas nahīṅ thā jaise un meṅ se ek.

³⁰agar allāh us ghās ko jo āj maidān meṅ hai aur kal āg meṅ jhoṅkī jāegī aisā shāndār libās pahnātā hai to ai kam'etiqādo, wuh tum ko pahnāne ke lie kyā kuchh nahīṅ karegā?

³¹chunāṅche pareshānī ke ālam meṅ fikr karte karte yih na kahte raho, ‘ham kyā khāeṅ? ham kyā pieṅ? ham kyā pahneṅ?’

³²kyūṅki jo īmān nahīṅ rakhte wuhī in tamām chīzoṅ ke pīchhe bhāgte rahte haiṅ jabki tumhāre āsmānī bāp ko pahle se mālūm hai ki tum ko in tamām chīzoṅ kī zarūrat hai.

³³pahle allāh kī bādshāhī aur us kī rāstbāzī kī talāsh meṅ raho. phir yih tamām chīzeṅ bhī tum ko mil jāeṅgī.

³⁴is lie kal ke bāre meṅ fikr karte karte pareshān na ho kyūṅki kal kā din apne lie āp fikr kar legā. har din kī apnī musībateṅ kāfī haiṅ.