Read Roman Urdu Geo mattī 7 Bible Online

mattī 7 - Roman Urdu Geo bible

mattī 7

¹dūsroṅ kī adālat mat karnā, warnā tumhārī adālat bhī kī jāegī.

²kyūṅki jitnī saḳhtī se tum dūsroṅ kā faislā karte ho utnī saḳhtī se tumhārā bhī faislā kiyā jāegā. aur jis paimāne se tum nāpte ho usī paimāne se tum bhī nāpe jāoge.

³tū kyūṅ ġhaur se apne bhāī kī āṅkh meṅ paṛe tinke par nazar kartā hai jabki tujhe wuh shahtīr nazar nahīṅ ātā jo terī apnī āṅkh meṅ hai?

⁴tū kyūṅkar apne bhāī se kah saktā hai, ‘ṭhahro, mujhe tumhārī āṅkh meṅ paṛā tinkā nikālne do,’ jabki terī apnī āṅkh meṅ shahtīr hai.

⁵riyākār! pahle apnī āṅkh ke shahtīr ko nikāl. tab hī tujhe bhāī kā tinkā sāf nazar āegā aur tū use achchhī tarah se dekh kar nikāl sakegā.

⁶kuttoṅ ko muqaddas ḳhurāk mat khilānā aur sūaroṅ ke āge apne motī na phaiṅknā. aisā na ho ki wuh unheṅ pāoṅ tale raundeṅ aur muṛ kar tum ko phāṛ ḍāleṅ.

⁷māṅgte raho to tum ko diyā jāegā. ḍhūṅḍte raho to tum ko mil jāegā. khaṭkhaṭāte raho to tumhāre lie darwāzā khol diyā jāegā.

⁸kyūṅki jo bhī māṅgtā hai wuh pātā hai, jo ḍhūṅḍtā hai use miltā hai, aur jo khaṭkhaṭātā hai us ke lie darwāzā khol diyā jātā hai.

⁹tum meṅ se kaun apne beṭe ko patthar degā agar wuh roṭī māṅge?

¹⁰yā kaun use sāṅp degā agar wuh machhlī māṅge? koī nahīṅ!

¹¹jab tum bure hone ke bāwujūd itne samajhdār ho ki apne bachchoṅ ko achchhī chīzeṅ de sakte ho to phir kitnī zyādā yaqīnī bāt hai ki tumhārā āsmānī bāp māṅgne wāloṅ ko achchhī chīzeṅ degā.

¹²har bāt meṅ dūsroṅ ke sāth wuhī sulūk karo jo tum chāhte ho ki wuh tumhāre sāth kareṅ. kyūṅki yihī sharīat aur nabiyoṅ kī tālīmāt kā lubb-e-lubāb hai.

¹³tang darwāze se dāḳhil ho, kyūṅki halākat kī taraf le jāne wālā rāstā kushādā aur us kā darwāzā chauṛā hai. bahut se log us meṅ dāḳhil ho jāte haiṅ.

¹⁴lekin zindagī kī taraf le jāne wālā rāstā tang hai aur us kā darwāzā chhoṭā. kam hī log use pāte haiṅ.

¹⁵jhūṭe nabiyoṅ se ḳhabardār raho! go wuh bheṛoṅ kā bhes badal kar tumhāre pās āte haiṅ, lekin andar se wuh ġhāratgar bheṛie hote haiṅ.

¹⁶un kā phal dekh kar tum unheṅ pahchān loge. kyā ḳhārdār jhāṛiyoṅ se angūr toṛe jāte haiṅ yā ūṅṭkaṭāroṅ se anjīr? hargiz nahīṅ.

¹⁷isī tarah achchhā daraḳht achchhā phal lātā hai aur ḳharāb daraḳht ḳharāb phal.

¹⁸na achchhā daraḳht ḳharāb phal lā saktā hai, na ḳharāb daraḳht achchhā phal.

¹⁹jo bhī daraḳht achchhā phal nahīṅ lātā use kāṭ kar āg meṅ jhoṅkā jātā hai.

²⁰yūṅ tum un kā phal dekh kar unheṅ pahchān loge.

²¹har ek jo mujhe ‘ḳhudāwand, ḳhudāwand’ kah kar pukārtā hai āsmān kī bādshāhī meṅ dāḳhil na hogā. sirf wuhī dāḳhil hogā jo mere āsmānī bāp kī marzī par amal kartā hai.

²²adālat ke din bahut se log mujh se kaheṅge, ‘ai ḳhudāwand, ḳhudāwand! kyā ham ne tere hī nām meṅ nabuwwat nahīṅ kī, tere hī nām se badrūheṅ nahīṅ nikālīṅ, tere hī nām se mojize nahīṅ kie?’

²³us waqt maiṅ un se sāf sāf kah dūṅgā, ‘merī kabhī tum se jān pahchān na thī. ai badkāro! mere sāmne se chale jāo.’

²⁴lihāzā jo bhī merī yih bāteṅ sun kar un par amal kartā hai wuh us samajhdār ādmī kī mānind hai jis ne apne makān kī bunyād chaṭān par rakhī.

²⁵bārish hone lagī, sailāb āyā aur āṅdhī makān ko jhanjhoṛne lagī. lekin wuh na girā, kyūṅki us kī bunyād chaṭān par rakhī gaī thī.

²⁶lekin jo bhī merī yih bāteṅ sun kar un par amal nahīṅ kartā wuh us ahmaq kī mānind hai jis ne apnā makān sahīh bunyād ḍāle baġhair ret par tāmīr kiyā.

²⁷jab bārish hone lagī, sailāb āyā aur āṅdhī makān ko jhanjhoṛne lagī to yih makān dhaṛām se gir gayā.”

²⁸jab īsā ne yih bāteṅ ḳhatm kar līṅ to log us kī tālīm sun kar hakkā-bakkā rah gae.

²⁹kyūṅki wuh un ke ulamā kī tarah nahīṅ balki iḳhtiyār ke sāth sikhātā thā.