Read Roman Urdu Geo mattī 8 Bible Online

mattī 8 - Roman Urdu Geo bible

mattī 8

¹īsā pahāṛ se utrā to baṛī bhīṛ us ke pīchhe chalne lagī.

²phir ek ādmī us ke pās āyā jo koṛh kā marīz thā. muṅh ke bal gir kar us ne kahā, “ḳhudāwand, agar āp chāheṅ to mujhe pāk-sāf kar sakte haiṅ.”

³īsā ne apnā hāth baṛhā kar use chhuā aur kahā, “maiṅ chāhtā hūṅ, pāk-sāf ho jā.” is par wuh fauran us bīmārī se pāk-sāf ho gayā.

⁴īsā ne us se kahā, “ḳhabardār! yih bāt kisī ko na batānā balki bait-ul-muqaddas meṅ imām ke pās jā tāki wuh terā muāinā kare. apne sāth wuh qurbānī le jā jis kā taqāzā mūsā kī sharīat un se kartī hai jinheṅ koṛh se shifā milī hai. yūṅ alāniyā tasdīq ho jāegī ki tū wāqaī pāk-sāf ho gayā hai.”

⁵jab īsā kafarnahūm meṅ dāḳhil huā to sau faujiyoṅ par muqarrar ek afsar us ke pās ā kar us kī minnat karne lagā,

⁶“ḳhudāwand, merā ġhulām maflūj hālat meṅ ghar meṅ paṛā hai, aur use shadīd dard ho rahā hai.”

⁷īsā ne us se kahā, “maiṅ ā kar use shifā dūṅgā.”

⁸afsar ne jawāb diyā, “nahīṅ ḳhudāwand, maiṅ is lāiq nahīṅ ki āp mere ghar jāeṅ. bas yihīṅ se hukm kareṅ to merā ġhulām shifā pā jāegā.

⁹kyūṅki mujhe ḳhud ālā afsaroṅ ke hukm par chalnā paṛtā hai aur mere mātaht bhī faujī haiṅ. ek ko kahtā hūṅ, ‘jā!’ to wuh jātā hai aur dūsre ko ‘ā!’ to wuh ātā hai. isī tarah maiṅ apne naukar ko hukm detā hūṅ, ‘yih kar’ to wuh kartā hai.”

¹⁰yih sun kar īsā nihāyat hairān huā. us ne muṛ kar apne pīchhe āne wāloṅ se kahā, “maiṅ tum ko sach batātā hūṅ, maiṅ ne isrāīl meṅ bhī is qism kā īmān nahīṅ pāyā.

¹¹maiṅ tumheṅ batātā hūṅ, bahut se log mashriq aur maġhrib se ā kar ibrāhīm, is'hāq aur yāqūb ke sāth āsmān kī bādshāhī kī ziyāfat meṅ sharīk hoṅge.

¹²lekin bādshāhī ke asal wārisoṅ ko nikāl kar andhere meṅ ḍāl diyā jāegā, us jagah jahāṅ log rote aur dāṅt pīste raheṅge.”

¹³phir īsā afsar se muḳhātib huā, “jā, tere sāth waisā hī ho jaisā terā īmān hai.” aur afsar ke ġhulām ko usī ghaṛī shifā mil gaī.

¹⁴īsā patras ke ghar meṅ āyā. wahāṅ us ne patras kī sās ko bistar par paṛe dekhā. use buḳhār thā.

¹⁵us ne us kā hāth chhū liyā to buḳhār utar gayā aur wuh uṭh kar us kī ḳhidmat karne lagī.

¹⁶shām huī to badrūhoṅ kī girift meṅ paṛe bahut se logoṅ ko īsā ke pās lāyā gayā. us ne badrūhoṅ ko hukm de kar nikāl diyā aur tamām marīzoṅ ko shifā dī.

¹⁷yūṅ yasāyāh nabī kī yih peshgoī pūrī huī ki “us ne hamārī kamzoriyāṅ le līṅ aur hamārī bīmāriyāṅ uṭhā līṅ.”

¹⁸jab īsā ne apne gird baṛā hujūm dekhā to us ne shāgirdoṅ ko jhīl pār karne kā hukm diyā.

¹⁹rawānā hone se pahle sharīat kā ek ālim us ke pās ā kar kahne lagā, “ustād, jahāṅ bhī āp jāeṅge maiṅ āp ke pīchhe chaltā rahūṅgā.”

²⁰īsā ne jawāb diyā, “lomṛiyāṅ apne bhaṭoṅ meṅ aur parinde apne ghoṅsloṅ meṅ ārām kar sakte haiṅ, lekin ibn-e-ādam ke pās sar rakh kar ārām karne kī koī jagah nahīṅ.”

²¹kisī aur shāgird ne us se kahā, “ḳhudāwand, mujhe pahle jā kar apne bāp ko dafn karne kī ijāzat deṅ.”

²²lekin īsā ne use batāyā, “mere pīchhe ho le aur murdoṅ ko apne murde dafn karne de.”

²³phir wuh kashtī par sawār huā aur us ke pīchhe us ke shāgird bhī.

²⁴achānak jhīl par saḳht āṅdhī chalne lagī aur kashtī lahroṅ meṅ ḍūbne lagī. lekin īsā so rahā thā.

²⁵shāgird us ke pās gae aur use jagā kar kahne lage, “ḳhudāwand, hameṅ bachā, ham tabāh ho rahe haiṅ!”

²⁶us ne jawāb diyā, “ai kam'etiqādo! ghabrāte kyūṅ ho?” khaṛe ho kar us ne āṅdhī aur maujoṅ ko ḍānṭā to lahreṅ bilkul sākit ho gaīṅ.

²⁷shāgird hairān ho kar kahne lage, “yih kis qism kā shaḳhs hai? hawā aur jhīl bhī us kā hukm māntī haiṅ.”

²⁸wuh jhīl ke pār gadarīniyoṅ ke ilāqe meṅ pahuṅche to badrūh-giriftā do ādmī qabroṅ meṅ se nikal kar īsā ko mile. wuh itne ḳhatarnāk the ki wahāṅ se koī guzar nahīṅ saktā thā.

²⁹chīḳheṅ mār mār kar unhoṅ ne kahā, “allāh ke farzand, hamārā āp ke sāth kyā wāstā? kyā āp hameṅ muqarrarā waqt se pahle azāb meṅ ḍālne āe haiṅ?”

³⁰kuchh fāsile par sūaroṅ kā baṛā ġhol char rahā thā.

³¹badrūhoṅ ne īsā se iltijā kī, “agar āp hameṅ nikālte haiṅ to sūaroṅ ke us ġhol meṅ bhej deṅ.”

³²īsā ne unheṅ hukm diyā, “jāo.” badrūheṅ nikal kar sūaroṅ meṅ jā ghusīṅ. is par pūre kā pūrā ġhol bhāg bhāg kar pahāṛī kī ḍhalān par se utrā aur jhīl meṅ jhapaṭ kar ḍūb marā.

³³yih dekh kar sūaroṅ ke gallābān bhāg gae. shahr meṅ jā kar unhoṅ ne logoṅ ko sab kuchh sunāyā aur wuh bhī jo badrūh-giriftā ādmiyoṅ ke sāth huā thā.

³⁴phir pūrā shahr nikal kar īsā ko milne āyā. use dekh kar unhoṅ ne us kī minnat kī ki hamāre ilāqe se chale jāeṅ.