Read Roman Urdu Geo mattī 9 Bible Online

mattī 9 - Roman Urdu Geo bible

mattī 9

¹kashtī meṅ baiṭh kar īsā ne jhīl ko pār kiyā aur apne shahr pahuṅch gayā.

²wahāṅ ek maflūj ādmī ko chārpāī par ḍāl kar us ke pās lāyā gayā. un kā īmān dekh kar īsā ne kahā, “beṭā, hauslā rakh. tere gunāh muāf kar die gae haiṅ.”

³yih sun kar sharīat ke kuchh ulamā dil meṅ kahne lage, “yih kufr bak rahā hai!”

⁴īsā ne jān liyā ki yih kyā soch rahe haiṅ, is lie us ne un se pūchhā,

⁵“tum dil meṅ burī bāteṅ kyūṅ soch rahe ho? kyā maflūj se yih kahnā zyādā āsān hai ki ‘tere gunāh muāf kar die gae haiṅ’ yā yih ki ‘uṭh aur chal phir?’

⁶lekin maiṅ tum ko dikhātā hūṅ ki ibn-e-ādam ko wāqaī duniyā meṅ gunāh muāf karne kā iḳhtiyār hai.” yih kah kar wuh maflūj se muḳhātib huā, “uṭh, apnī chārpāī uṭhā kar ghar chalā jā.”

⁷wuh ādmī khaṛā huā aur apne ghar chalā gayā.

⁸yih dekh kar hujūm par allāh kā ḳhauf tārī ho gayā aur wuh allāh kī tamjīd karne lage ki us ne insān ko is qism kā iḳhtiyār diyā hai.

⁹āge jā kar īsā ne ek ādmī ko dekhā jo ṭaiks lene wāloṅ kī chaukī par baiṭhā thā. us kā nām mattī thā. īsā ne us se kahā, “mere pīchhe ho le.” aur mattī uṭh kar us ke pīchhe ho liyā.

¹⁰bād meṅ īsā mattī ke ghar meṅ khānā khā rahā thā. bahut se ṭaiks lene wāle aur gunāhgār bhī ā kar īsā aur us ke shāgirdoṅ ke sāth khāne meṅ sharīk hue.

¹¹yih dekh kar farīsiyoṅ ne us ke shāgirdoṅ se pūchhā, “āp kā ustād ṭaiks lene wāloṅ aur gunāhgāroṅ ke sāth kyūṅ khātā hai?”

¹²yih sun kar īsā ne kahā, “sehhatmandoṅ ko ḍākṭar kī zarūrat nahīṅ hotī balki marīzoṅ ko.

¹³pahle jāo aur kalām-e-muqaddas kī is bāt kā matlab jān lo ki ‘maiṅ qurbānī nahīṅ balki rahm pasand kartā hūṅ.’ kyūṅki maiṅ rāstbāzoṅ ko nahīṅ balki gunāhgāroṅ ko bulāne āyā hūṅ.”

¹⁴phir yahyā ke shāgird us ke pās āe aur pūchhā, “āp ke shāgird rozā kyūṅ nahīṅ rakhte jabki ham aur farīsī rozā rakhte haiṅ?”

¹⁵īsā ne jawāb diyā, “shādī ke mehmān kis tarah mātam kar sakte haiṅ jab tak dūlhā un ke darmiyān hai? lekin ek din āegā jab dūlhā un se le liyā jāegā. us waqt wuh zarūr rozā rakheṅge.

¹⁶koī bhī nae kapṛe kā ṭukṛā kisī purāne libās meṅ nahīṅ lagātā. agar wuh aisā kare to nayā ṭukṛā bād meṅ sukaṛ kar purāne libās se alag ho jāegā. yūṅ purāne libās kī phaṭī huī jagah pahle kī nisbat zyādā ḳharāb ho jāegī.

¹⁷isī tarah angūr kā tāzā ras purānī aur belchak mashkoṅ meṅ nahīṅ ḍālā jātā. agar aisā kiyā jāe to purānī mashkeṅ paidā hone wālī gais ke bāis phaṭ jāeṅgī. natīje meṅ mai aur mashkeṅ donoṅ zāe ho jāeṅgī. is lie angūr kā tāzā ras naī mashkoṅ meṅ ḍālā jātā hai jo lachakdār hotī haiṅ. yūṅ ras aur mashkeṅ donoṅ hī mahfūz rahte haiṅ.”

¹⁸īsā abhī yih bayān kar rahā thā ki ek yahūdī rāhnumā ne gir kar use sijdā kiyā aur kahā, “merī beṭī abhī abhī marī hai. lekin ā kar apnā hāth us par rakheṅ to wuh dubārā zindā ho jāegī.”

¹⁹īsā uṭh kar apne shāgirdoṅ samet us ke sāth ho liyā.

²⁰chalte chalte ek aurat ne pīchhe se ā kar īsā ke libās kā kinārā chhuā. yih aurat bārah sāl se ḳhūn bahne kī marīzā thī

²¹aur wuh soch rahī thī, “agar maiṅ sirf us ke libās ko hī chhū lūṅ to shifā pā lūṅgī.”

²²īsā ne muṛ kar use dekhā aur kahā, “beṭī, hauslā raḳh! tere īmān ne tujhe bachā liyā hai.” aur aurat ko usī waqt shifā mil gaī.

²³phir īsā rāhnumā ke ghar meṅ dāḳhil huā. bāṅsrī bajāne wāle aur bahut se log pahuṅch chuke the aur bahut shor-sharābā thā. yih dekh kar

²⁴īsā ne kahā, “nikal jāo! laṛkī mar nahīṅ gaī balki so rahī hai.” log haṅs kar us kā mazāq uṛāne lage.

²⁵lekin jab sab ko nikāl diyā gayā to wuh andar gayā. us ne laṛkī kā hāth pakaṛā to wuh uṭh khaṛī huī.

²⁶is mojize kī ḳhabar us pūre ilāqe meṅ phail gaī.

²⁷jab īsā wahāṅ se rawānā huā to do andhe us ke pīchhe chal kar chillāne lage, “ibn-e-dāūd, ham par rahm kareṅ.”

²⁸jab īsā kisī ke ghar meṅ dāḳhil huā to wuh us ke pās āe. īsā ne un se pūchhā, “kyā tumhārā īmān hai ki maiṅ yih kar saktā hūṅ?” unhoṅ ne jawāb diyā, “jī, ḳhudāwand.”

²⁹phir us ne un kī āṅkheṅ chhū kar kahā, “tumhāre sāth tumhāre īmān ke mutābiq ho jāe.”

³⁰un kī āṅkheṅ bahāl ho gaīṅ aur īsā ne saḳhtī se unheṅ kahā, “ḳhabardār, kisī ko bhī is kā patā na chale!”

³¹lekin wuh nikal kar pūre ilāqe meṅ us kī ḳhabar phailāne lage.

³²jab wuh nikal rahe the to ek gūṅgā ādmī īsā ke pās lāyā gayā jo kisī badrūh ke qabze meṅ thā.

³³jab badrūh ko nikālā gayā to gūṅgā bolne lagā. hujūm hairān rah gayā. unhoṅ ne kahā, “aisā kām isrāīl meṅ kabhī nahīṅ dekhā gayā.”

³⁴lekin farīsiyoṅ ne kahā, “wuh badrūhoṅ ke sardār hī kī madad se badrūhoṅ ko nikāltā hai.”

³⁵aur īsā safar karte karte tamām shahroṅ aur gāoṅ meṅ se guzarā. jahāṅ bhī wuh pahuṅchā wahāṅ us ne un ke ibādatḳhānoṅ meṅ tālīm dī, bādshāhī kī ḳhushḳhabrī sunāī aur har qism ke marz aur alālat se shifā dī.

³⁶hujūm ko dekh kar use un par baṛā tars āyā, kyūṅki wuh pise hue aur bebas the, aisī bheṛoṅ kī tarah jin kā charwāhā na ho.

³⁷us ne apne shāgirdoṅ se kahā, “fasal bahut hai, lekin mazdūr kam.

³⁸is lie fasal ke mālik se guzārish karo ki wuh apnī fasal kāṭne ke lie mazīd mazdūr bhej de.”