Read Roman Urdu Geo marqus 1 Bible Online

marqus 1 - Roman Urdu Geo bible

marqus 1

¹yih allāh ke farzand īsā masīh ke bāre meṅ ḳhushḳhabrī hai,

²jo yasāyāh nabī kī peshgoī ke mutābiq yūṅ shurū huī: ‘dekh, maiṅ apne paiġhambar ko tere āge āge bhej detā hūṅ jo tere lie rāstā tayyār karegā.

³registān meṅ ek āwāz pukār rahī hai, rab kī rāh tayyār karo! us ke rāste sīdhe banāo.’

⁴yih paiġhambar yahyā baptismā dene wālā thā. registān meṅ rah kar us ne elān kiyā ki log taubā karke baptismā leṅ tāki unheṅ apne gunāhoṅ kī muāfī mil jāe.

⁵yahūdiyā ke pūre ilāqe ke log yarūshalam ke tamām bāshindoṅ samet nikal kar us ke pās āe. aur apne gunāhoṅ ko taslīm karke unhoṅ ne daryā-e-yardan meṅ yahyā se baptismā liyā.

⁶yahyā ūṅṭoṅ ke bāloṅ kā libās pahne aur kamr par chamṛe kā paṭkā bāndhe rahtā thā. ḳhurāk ke taur par wuh ṭiḍḍiyāṅ aur janglī shahd khātā thā.

⁷us ne elān kiyā, “mere bād ek āne wālā hai jo mujh se baṛā hai. maiṅ jhuk kar us ke jūtoṅ ke tasme kholne ke bhī lāiq nahīṅ.

⁸maiṅ tum ko pānī se baptismā detā hūṅ, lekin wuh tumheṅ rūh-ul-quds se baptismā degā.”

⁹un dinoṅ meṅ īsā nāsarat se āyā aur yahyā ne use daryā-e-yardan meṅ baptismā diyā.

¹⁰pānī se nikalte hī īsā ne dekhā ki āsmān phaṭ rahā hai aur rūh-ul-quds kabūtar kī tarah mujh par utar rahā hai.

¹¹sāth sāth āsmān se ek āwāz sunāī dī, “tū merā pyārā farzand hai, tujh se maiṅ ḳhush hūṅ.”

¹²is ke fauran bād rūh-ul-quds ne use registān meṅ bhej diyā.

¹³wahāṅ wuh chālīs din rahā jis ke daurān iblīs us kī āzmāish kartā rahā. wuh janglī jānwaroṅ ke darmiyān rahtā aur farishte us kī ḳhidmat karte the.

¹⁴jab yahyā ko jel meṅ ḍāl diyā gayā to īsā galīl ke ilāqe meṅ āyā aur allāh kī ḳhushḳhabrī kā elān karne lagā.

¹⁵wuh bolā, “muqarrarā waqt ā gayā hai, allāh kī bādshāhī qarīb ā gaī hai. taubā karo aur allāh kī ḳhushḳhabrī par īmān lāo.”

¹⁶ek din jab īsā galīl kī jhīl ke kināre kināre chal rahā thā to us ne shamāūn aur us ke bhāī andriyās ko dekhā. wuh jhīl meṅ jāl ḍāl rahe the kyūṅki wuh māhīgīr the.

¹⁷us ne kahā, “āo, mere pīchhe ho lo, maiṅ tum ko ādamgīr banāūṅgā.”

¹⁸yih sunte hī wuh apne jāloṅ ko chhoṛ kar us ke pīchhe ho lie.

¹⁹thoṛā sā āge jā kar īsā ne zabdī ke beṭoṅ yāqūb aur yūhannā ko dekhā. wuh kashtī meṅ baiṭhe apne jāloṅ kī marammat kar rahe the.

²⁰us ne unheṅ fauran bulāyā to wuh apne bāp ko mazdūroṅ samet kashtī meṅ chhoṛ kar us ke pīchhe ho lie.

²¹wuh kafarnahūm shahr meṅ dāḳhil hue. aur sabat ke din īsā ibādatḳhāne meṅ jā kar logoṅ ko sikhāne lagā.

²²wuh us kī tālīm sun kar hakkā-bakkā rah gae kyūṅki wuh unheṅ sharīat ke ālimoṅ kī tarah nahīṅ balki iḳhtiyār ke sāth sikhātā thā.

²³un ke ibādatḳhāne meṅ ek ādmī thā jo kisī nāpāk rūh ke qabze meṅ thā. īsā ko deḳhte hī wuh chīḳh chīḳh kar bolne lagā,

²⁴“ai nāsarat ke īsā, hamārā āp ke sāth kyā wāstā hai? kyā āp hameṅ halāk karne āe haiṅ? maiṅ to jāntā hūṅ ki āp kaun haiṅ, āp allāh ke quddūs haiṅ.”

²⁵īsā ne use ḍāṅṭ kar kahā, “ḳhāmosh! ādmī se nikal jā!”

²⁶is par badrūh ādmī ko jhanjhoṛ kar aur chīḳheṅ mār mār kar us meṅ se nikal gaī.

²⁷tamām log ghabrā gae aur ek dūsre se kahne lage, “yih kyā hai? ek naī tālīm jo iḳhtiyār ke sāth dī jā rahī hai. aur wuh badrūhoṅ ko hukm detā hai to wuh us kī māntī haiṅ.”

²⁸aur īsā ke bāre meṅ charchā jaldī se galīl ke pūre ilāqe meṅ phail gayā.

²⁹ibādatḳhāne se nikalne ke ain bād wuh yāqūb aur yūhannā ke sāth shamāūn aur andriyās ke ghar gae.

³⁰wahāṅ shamāūn kī sās bistar par paṛī thī, kyūṅki use buḳhār thā. unhoṅ ne īsā ko batā diyā

³¹to wuh us ke nazdīk gayā. us kā hāth pakaṛ kar us ne uṭhne meṅ us kī madad kī. is par buḳhār utar gayā aur wuh un kī ḳhidmat karne lagī.

³²jab shām huī aur sūraj ġhurūb huā to log tamām marīzoṅ aur badrūh-giriftā ashḳhās ko īsā ke pās lāe.

³³pūrā shahr darwāze par jamā ho gayā

³⁴aur īsā ne bahut se marīzoṅ ko muḳhtalif qism kī bīmāriyoṅ se shifā dī. us ne bahut sī badrūheṅ bhī nikāl dīṅ, lekin us ne unheṅ bolne na diyā, kyūṅki wuh jāntī thīṅ ki wuh kaun hai.

³⁵agle din subhsawere jab abhī andherā hī thā to īsā uṭh kar duā karne ke lie kisī wīrān jagah chalā gayā.

³⁶bād meṅ shamāūn aur us ke sāthī use ḍhūṅḍne nikle.

³⁷jab mālūm huā ki wuh kahāṅ hai to unhoṅ ne us se kahā, “tamām log āp ko talāsh kar rahe haiṅ!”

³⁸lekin īsā ne jawāb diyā, “āo, ham sāth wālī ābādiyoṅ meṅ jāeṅ tāki maiṅ wahāṅ bhī munādī karūṅ. kyūṅki maiṅ isī maqsad se nikal āyā hūṅ.”

³⁹chunāṅche wuh pūre galīl meṅ se guzartā huā ibādatḳhānoṅ meṅ munādī kartā aur badrūhoṅ ko nikāltā rahā.

⁴⁰ek ādmī īsā ke pās āyā jo koṛh kā marīz thā. ghuṭnoṅ ke bal jhuk kar us ne minnat kī, “agar āp chāheṅ to mujhe pāk-sāf kar sakte haiṅ.”

⁴¹īsā ko tars āyā. us ne apnā hāth baṛhā kar use chhuā aur kahā, “maiṅ chāhtā hūṅ, pāk-sāf ho jā.”

⁴²is par bīmārī fauran dūr ho gaī aur wuh pāk-sāf ho gayā.

⁴³īsā ne use fauran ruḳhsat karke saḳhtī se samjhāyā,

⁴⁴“ḳhabardār! yih bāt kisī ko na batānā balki bait-ul-muqaddas meṅ imām ke pās jā tāki wuh terā muāinā kare. apne sāth wuh qurbānī le jā jis kā taqāzā mūsā kī sharīat un se kartī hai jinheṅ koṛh se shifā milī ho. yūṅ alāniyā tasdīq ho jāegī ki tū wāqaī pāk-sāf ho gayā hai.”

⁴⁵ādmī chalā gayā, lekin wuh har jagah apnī kahānī sunāne lagā. us ne yih ḳhabar itnī phailāī ki īsā khule taur par kisī bhī shahr meṅ dāḳhil na ho sakā balki use wīrān jaghoṅ meṅ rahnā paṛā. lekin wahāṅ bhī log har jagah se us ke pās pahuṅch gae.