Read Roman Urdu Geo marqus 12 Bible Online

marqus 12 - Roman Urdu Geo bible

marqus 12

¹phir wuh tamsīloṅ meṅ un se bāt karne lagā. “kisī ādmī ne angūr kā ek bāġh lagāyā. us ne us kī chārdīwārī banāī, angūroṅ kā ras nikālne ke lie ek gaṛhe kī khudāī kī aur pahredāroṅ ke lie burj tāmīr kiyā. phir wuh use muzāreoṅ ke sapurd karke bairūn-e-mulk chalā gayā.

²jab angūr pak gae to us ne apne naukar ko muzāreoṅ ke pās bhej diyā tāki wuh un se mālik kā hissā wasūl kare.

³lekin muzāreoṅ ne use pakaṛ kar us kī piṭāī kī aur use ḳhālī hāth lauṭā diyā.

⁴phir mālik ne ek aur naukar ko bhej diyā. lekin unhoṅ ne us kī bhī be'izzatī karke us kā sar phoṛ diyā.

⁵jab mālik ne tīsre naukar ko bhejā to unhoṅ ne use mār ḍālā. yūṅ us ne kaī ek ko bhejā. bāz ko unhoṅ ne mārā pīṭā, bāz ko qatl kiyā.

⁶āḳhirkār sirf ek bāqī rah gayā thā. wuh thā us kā pyārā beṭā. ab us ne use bhej kar kahā, ‘āḳhir mere beṭe kā to lihāz kareṅge.’

⁷lekin muzāre ek dūsre se kahne lage, ‘yih zamīn kā wāris hai. āo ham ise mār ḍāleṅ to phir is kī mīrās hamārī hī hogī.’

⁸unhoṅ ne use pakaṛ kar qatl kiyā aur bāġh se bāhar phaiṅk diyā.

⁹ab batāo, bāġh kā mālik kyā karegā? wuh jā kar muzāreoṅ ko halāk karegā aur bāġh ko dūsroṅ ke sapurd kar degā.

¹⁰kyā tum ne kalām-e-muqaddas kā yih hawālā nahīṅ paṛhā, ‘jis patthar ko makān banāne wāloṅ ne radd kiyā wuh kone kā bunyādī patthar ban gayā.

¹¹yih rab ne kiyā aur deḳhne meṅ kitnā hairatangez hai’.”

¹²is par dīnī rāhnumāoṅ ne īsā ko giriftār karne kī koshish kī, kyūṅki wuh samajh gae the ki tamsīl meṅ bayānshudā muzāre ham hī haiṅ. lekin wuh hujūm se ḍarte the, is lie wuh use chhoṛ kar chale gae.

¹³bād meṅ unhoṅ ne kuchh farīsiyoṅ aur herodes ke pairokāroṅ ko us ke pās bhej diyā tāki wuh use koī aisī bāt karne par ubhāreṅ jis se use pakaṛā jā sake.

¹⁴wuh us ke pās ā kar kahne lage, “ustād, ham jānte haiṅ ki āp sachche haiṅ aur kisī kī parwā nahīṅ karte. āp jānibdār nahīṅ hote balki diyānatdārī se allāh kī rāh kī tālīm dete haiṅ. ab hameṅ batāeṅ ki kyā romī shahanshāh ko ṭaiks denā jāiz hai yā nājāiz? kyā ham adā kareṅ yā na kareṅ?”

¹⁵lekin īsā ne un kī riyākārī jān kar un se kahā, “mujhe kyūṅ phaṅsānā chāhte ho? chāṅdī kā ek romī sikkā mere pās le āo.”

¹⁶wuh ek sikkā us ke pās le āe to us ne pūchhā, “kis kī sūrat aur nām is par kandā hai?” unhoṅ ne jawāb diyā, “shahanshāh kā.”

¹⁷us ne kahā, “to jo shahanshāh kā hai shahanshāh ko do aur jo allāh kā hai allāh ko.” us kā yih jawāb sun kar unhoṅ ne baṛā tājjub kiyā.

¹⁸phir kuchh sadūqī īsā ke pās āe. sadūqī nahīṅ mānte ki roz-e-qiyāmat murde jī uṭheṅge. unhoṅ ne īsā se ek sawāl kiyā,

¹⁹“ustād, mūsā ne hameṅ hukm diyā ki agar koī shādīshudā ādmī beaulād mar jāe aur us kā bhāī ho to bhāī kā farz hai ki wuh bewā se shādī karke apne bhāī ke lie aulād paidā kare.

²⁰ab farz kareṅ ki sāt bhāī the. pahle ne shādī kī, lekin beaulād faut huā.

²¹is par dūsre ne us se shādī kī, lekin wuh bhī beaulād mar gayā. phir tīsre bhāī ne us se shādī kī.

²²yih silsilā sātweṅ bhāī tak jārī rahā. yake bād dīgare har bhāī bewā se shādī karne ke bād mar gayā. āḳhir meṅ bewā bhī faut ho gaī.

²³ab batāeṅ ki qiyāmat ke din wuh kis kī bīwī hogī? kyūṅki sāt ke sāt bhāiyoṅ ne us se shādī kī thī.”

²⁴īsā ne jawāb diyā, “tum is lie ġhaltī par ho ki na tum kalām-e-muqaddas se wāqif ho, na allāh kī qudrat se.

²⁵kyūṅki jab murde jī uṭheṅge to na wuh shādī kareṅge na un kī shādī karāī jāegī balki wuh āsmān par farishtoṅ kī mānind hoṅge.

²⁶rahī yih bāt ki murde jī uṭheṅge. kyā tum ne mūsā kī kitāb meṅ nahīṅ paṛhā ki allāh jaltī huī jhāṛī meṅ se kis tarah mūsā se hamkalām huā? us ne farmāyā, ‘maiṅ ibrāhīm kā ḳhudā, is'hāq kā ḳhudā aur yāqūb kā ḳhudā hūṅ,’ hālāṅki us waqt tīnoṅ kāfī arse se mar chuke the.

²⁷is kā matlab hai ki yih haqīqat meṅ zindā haiṅ, kyūṅki allāh murdoṅ kā nahīṅ, balki zindoṅ kā ḳhudā hai. tum se baṛī ġhaltī huī hai.”

²⁸itne meṅ sharīat kā ek ālim un ke pās āyā. us ne unheṅ bahs karte hue sunā thā aur jān liyā ki īsā ne achchhā jawāb diyā, is lie us ne pūchhā, “tamām ahkām meṅ se kaun sā hukm sab se aham hai?”

²⁹īsā ne jawāb diyā, “awwal hukm yih hai: ‘sun ai isrāīl! rab hamārā ḳhudā ek hī rab hai.

³⁰rab apne ḳhudā se apne pūre dil, apnī pūrī jān, apne pūre zahan aur apnī pūrī tāqat se pyār karnā.’

³¹dūsrā hukm yih hai: ‘apne paṛosī se waisī muhabbat rakhnā jaisī tū apne āp se rakhtā hai.’ dīgar koī bhī hukm in do ahkām se aham nahīṅ hai.”

³²us ālim ne kahā, “shābāsh, ustād! āp ne sach kahā hai ki allāh sirf ek hī hai aur us ke siwā koī aur nahīṅ hai.

³³hameṅ use apne pūre dil, apne pūre zahan aur apnī pūrī tāqat se pyār karnā chāhie aur sāth sāth apne paṛosī se waisī muhabbat rakhnī chāhie jaisī apne āp se rakhte haiṅ. yih do ahkām bhasm hone wālī tamām qurbāniyoṅ aur dīgar nazaroṅ se zyādā ahmiyat rakhte haiṅ.”

³⁴jab īsā ne us kā yih jawāb sunā to us se kahā, “tū allāh kī bādshāhī se dūr nahīṅ hai.” is ke bād kisī ne bhī us se sawāl pūchhne kī jur'at na kī.

³⁵jab īsā bait-ul-muqaddas meṅ tālīm de rahā thā to us ne pūchhā, “sharīat ke ulamā kyūṅ dāwā karte haiṅ ki masīh dāūd kā farzand hai?

³⁶kyūṅki dāūd ne to ḳhud rūh-ul-quds kī mārifat yih farmāyā, ‘rab ne mere rab se kahā, mere dahne hāth baiṭh, jab tak maiṅ tere dushmanoṅ ko tere pāoṅ ke nīche na kar dūṅ.’

³⁷dāūd to ḳhud masīh ko rab kahtā hai. to phir wuh kis tarah dāūd kā farzand ho saktā hai?” ek baṛā hujūm maze se īsā kī bāteṅ sun rahā thā.

³⁸unheṅ tālīm dete waqt us ne kahā, “ulamā se ḳhabardār raho! kyūṅki wuh shāndār choġhe pahan kar idhar udhar phirnā pasand karte haiṅ. jab log bāzāroṅ meṅ salām karke un kī izzat karte haiṅ to phir wuh ḳhush ho jāte haiṅ.

³⁹un kī bas ek hī ḳhwāhish hotī hai ki ibādatḳhānoṅ aur ziyāfatoṅ meṅ izzat kī kursiyoṅ par baiṭh jāeṅ.

⁴⁰yih log bewāoṅ ke ghar haṛap kar jāte aur sāth sāth dikhāwe ke lie lambī lambī duāeṅ māṅgte haiṅ. aise logoṅ ko nihāyat saḳht sazā milegī.”

⁴¹īsā bait-ul-muqaddas ke chande ke baks ke muqābil baiṭh gayā aur hujūm ko hadie ḍālte hue deḳhne lagā. kaī amīr baṛī baṛī raqmeṅ ḍāl rahe the.

⁴²phir ek ġharīb bewā bhī wahāṅ se guzarī jis ne us meṅ tāṅbe ke do māmūlī se sikke ḍāl die.

⁴³īsā ne shāgirdoṅ ko apne pās bulā kar kahā, “maiṅ tum ko sach batātā hūṅ ki is ġharīb bewā ne tamām logoṅ kī nisbat zyādā ḍālā hai.

⁴⁴kyūṅki in sab ne apnī daulat kī kasrat se de diyā jabki us ne zarūratmand hone ke bāwujūd bhī apne guzāre ke sāre paise de die haiṅ.”