Read Roman Urdu Geo marqus 13 Bible Online

marqus 13 - Roman Urdu Geo bible

marqus 13

¹us din jab īsā bait-ul-muqaddas se nikal rahā thā to us ke shāgirdoṅ ne kahā, “ustād, dekheṅ kitne shāndār patthar aur imārateṅ haiṅ!”

²īsā ne jawāb diyā, “kyā tum ko yih baṛī baṛī imārateṅ nazar ātī haiṅ? patthar par patthar nahīṅ rahegā. sab kuchh ḍhā diyā jāegā.”

³bād meṅ īsā zaitūn ke pahāṛ par bait-ul-muqaddas ke muqābil baiṭh gayā. patras, yāqūb, yūhannā aur andriyās akele us ke pās āe. unhoṅ ne kahā,

⁴“hameṅ zarā batāeṅ, yih kab hogā? kyā kyā nazar āegā jis se mālūm hogā ki yih ab pūrā hone ko hai?”

⁵īsā ne jawāb diyā, “ḳhabardār raho ki koī tumheṅ gumrāh na kar de.

⁶bahut se log merā nām le kar āeṅge aur kaheṅge, ‘maiṅ hī masīh hūṅ.’ yūṅ wuh bahutoṅ ko gumrāh kar deṅge.

⁷jab jangoṅ kī ḳhabreṅ aur afwāheṅ tum tak pahuṅcheṅgī to mat ghabrānā. kyūṅki lāzim hai ki yih sab kuchh pesh āe. to bhī abhī āḳhirat nahīṅ hogī.

⁸ek qaum dūsrī ke ḳhilāf uṭh khaṛī hogī aur ek bādshāhī dūsrī ke ḳhilāf. jagah jagah zalzale āeṅge, kāl paṛeṅge. lekin yih sirf dard-e-zah kī ibtidā hī hogī.

⁹tum ḳhud ḳhabardār raho. tum ko maqāmī adālatoṅ ke hawāle kar diyā jāegā aur log yahūdī ibādatḳhānoṅ meṅ tumheṅ koṛe lagwāeṅge. merī ḳhātir tumheṅ hukmrānoṅ aur bādshāhoṅ ke sāmne pesh kiyā jāegā. yūṅ tum unheṅ merī gawāhī doge.

¹⁰lāzim hai ki āḳhirat se pahle allāh kī ḳhushḳhabrī tamām aqwām ko sunāī jāe.

¹¹lekin jab log tum ko giriftār karke adālat meṅ pesh kareṅge to yih sochte sochte pareshān na ho jānā ki maiṅ kyā kahūṅ. bas wuhī kuchh kahnā jo allāh tumheṅ us waqt batāegā. kyūṅki us waqt tum nahīṅ balki rūh-ul-quds bolne wālā hogā.

¹²bhāī apne bhāī ko aur bāp apne bachche ko maut ke hawāle kar degā. bachche apne wālidain ke ḳhilāf khaṛe ho kar unheṅ qatl karwāeṅge.

¹³sab tum se nafrat kareṅge, is lie ki tum mere pairokār ho. lekin jo āḳhir tak qāim rahegā use najāt milegī.

¹⁴ek din āegā jab tum wahāṅ jahāṅ use nahīṅ honā chāhie wuh kuchh khaṛā dekhoge jo behurmatī aur tabāhī kā bāis hai.” (qārī is par dhyān de!) “us waqt yahūdiyā ke rahne wāle bhāg kar pahāṛī ilāqe meṅ panāh leṅ.

¹⁵jo apne ghar kī chhat par ho wuh na utre, na kuchh sāth le jāne ke lie ghar meṅ dāḳhil ho jāe.

¹⁶jo khet meṅ ho wuh apnī chādar sāth le jāne ke lie wāpas na jāe.

¹⁷un ḳhawātīn par afsos jo un dinoṅ meṅ hāmilā hoṅ yā apne bachchoṅ ko dūdh pilātī hoṅ.

¹⁸duā karo ki yih wāqiā sardiyoṅ ke mausam meṅ pesh na āe.

¹⁹kyūṅki un dinoṅ meṅ aisī musībat hogī ki duniyā kī taḳhlīq se āj tak deḳhne meṅ na āī hogī. is qism kī musībat bād meṅ bhī kabhī nahīṅ āegī.

²⁰aur agar ḳhudāwand is musībat kā daurāniyā muḳhtasar na kartā to koī na bachtā. lekin us ne apne chune huoṅ kī ḳhātir us kā daurāniyā muḳhtasar kar diyā hai.

²¹us waqt agar koī tum ko batāe, ‘dekho, masīh yahāṅ hai,’ yā ‘wuh wahāṅ hai’ to us kī bāt na mānanā.

²²kyūṅki jhūṭe masīh aur jhūṭe nabī uṭh khaṛe hoṅge jo ajīb-o-ġharīb nishān aur mojize dikhāeṅge tāki allāh ke chune hue logoṅ ko ġhalat rāste par ḍāl deṅ - agar yih mumkin hotā.

²³is lie ḳhabardār! maiṅ ne tum ko pahle hī in sab bātoṅ se āgāh kar diyā hai.

²⁴musībat ke un dinoṅ ke bād sūraj tārīk ho jāegā aur chāṅd kī raushnī ḳhatm ho jāegī.

²⁵sitāre āsmān par se gir paṛeṅge aur āsmān kī quwwateṅ hilāī jāeṅgī.

²⁶us waqt log ibn-e-ādam ko baṛī qudrat aur jalāl ke sāth bādaloṅ meṅ āte hue dekheṅge.

²⁷aur wuh apne farishtoṅ ko bhej degā tāki us ke chune huoṅ ko chāroṅ taraf se jamā kareṅ, duniyā ke kone kone se āsmān kī intihā tak ikaṭṭhā kareṅ.

²⁸anjīr ke daraḳht se sabaq sīkho. jūṅ hī us kī shāḳheṅ narm aur lachakdār ho jātī haiṅ aur un se koṅpleṅ phūṭ nikaltī haiṅ to tum ko mālūm ho jātā hai ki garmiyoṅ kā mausam qarīb ā gayā hai.

²⁹isī tarah jab tum yih wāqiāt dekhoge to jān loge ki ibn-e-ādam kī āmad qarīb balki darwāze par hai.

³⁰maiṅ tum ko sach batātā hūṅ, is nasl ke ḳhatm hone se pahle pahle yih sab kuchh wāqe hogā.

³¹āsmān-o-zamīn to jāte raheṅge, lekin merī bāteṅ hameshā tak qāim raheṅgī.

³²lekin kisī ko bhī ilm nahīṅ ki yih kis din yā kaun sī ghaṛī rūnumā hogā. āsmān ke farishtoṅ aur farzand ko bhī ilm nahīṅ balki sirf bāp ko.

³³chunāṅche ḳhabardār aur chaukanne raho! kyūṅki tum ko nahīṅ mālūm ki yih waqt kab āegā.

³⁴ibn-e-ādam kī āmad us ādmī se mutābiqat rakhtī hai jise kisī safar par jānā thā. ghar chhoṛte waqt us ne apne naukaroṅ ko intizām chalāne kā iḳhtiyār de kar har ek ko us kī apnī zimmādārī sauṅp dī. darbān ko us ne hukm diyā ki wuh chaukas rahe.

³⁵tum bhī isī tarah chaukas raho, kyūṅki tum nahīṅ jānte ki ghar kā mālik kab wāpas āegā, shām ko, ādhī rāt ko, murġh ke bāṅg dete yā pau phaṭte waqt.

³⁶aisā na ho ki wuh achānak ā kar tum ko sote pāe.

³⁷yih bāt maiṅ na sirf tum ko balki sab ko batātā hūṅ, chaukas raho!”