Read Roman Urdu Geo marqus 14 Bible Online

marqus 14 - Roman Urdu Geo bible

marqus 14

¹fasah aur beḳhamīrī roṭī kī īd qarīb ā gaī thī. sirf do din rah gae the. rāhnumā imām aur sharīat ke ulamā īsā ko kisī chālākī se giriftār karke qatl karne kī talāsh meṅ the.

²unhoṅ ne kahā, “lekin yih īd ke daurān nahīṅ honā chāhie, aisā na ho ki awām meṅ halchal mach jāe.”

³itne meṅ īsā bait-aniyāh ā kar ek ādmī ke ghar meṅ dāḳhil huā jo kisī waqt koṛh kā marīz thā. us kā nām shamāūn thā. īsā khānā khāne ke lie baiṭh gayā to ek aurat āī. us ke pās ḳhālis jaṭāmāsī ke nihāyat qīmtī itr kā itrdān thā. us kā sar toṛ kar us ne itr īsā ke sar par unḍel diyā.

⁴hāzirīn meṅ se kuchh nārāz hue. “itnā qīmtī itr zāe karne kī kyā zarūrat thī?

⁵is kī qīmat kam az kam chāṅdī ke 300 sikke thī. agar ise bechā jātā to is ke paise ġharīboṅ ko die jā sakte the.” aisī bāteṅ karte hue unhoṅ ne use jhiṛkā.

⁶lekin īsā ne kahā, “ise chhoṛ do, tum ise kyūṅ tang kar rahe ho? is ne to mere lie ek nek kām kiyā hai.

⁷ġharīb to hameshā tumhāre pās raheṅge, aur tum jab bhī chāho un kī madad kar sakoge. lekin maiṅ hameshā tumhāre sāth nahīṅ rahūṅgā.

⁸jo kuchh wuh kar saktī thī us ne kiyā hai. mujh par itr unḍelne se wuh muqarrarā waqt se pahle mere badan ko dafnāne ke lie tayyār kar chukī hai.

⁹maiṅ tum ko sach batātā hūṅ ki tamām duniyā meṅ jahāṅ bhī allāh kī ḳhushḳhabrī kā elān kiyā jāegā wahāṅ log is ḳhātūn ko yād karke wuh kuchh sunāeṅge jo is ne kiyā hai.”

¹⁰phir yahūdāh iskariyotī jo bārah shāgirdoṅ meṅ se ek thā rāhnumā imāmoṅ ke pās gayā tāki īsā ko un ke hawāle karne kī bāt kare.

¹¹us ke āne kā maqsad sun kar wuh ḳhush hue aur use paise dene kā wādā kiyā. chunāṅche wuh īsā ko un ke hawāle karne kā mauqā ḍhūṅḍne lagā.

¹²beḳhamīrī roṭī kī īd āī jab log fasah ke lele ko qurbān karte the. īsā ke shāgirdoṅ ne us se pūchhā, “ham kahāṅ āp ke lie fasah kā khānā tayyār kareṅ?”

¹³chunāṅche īsā ne un meṅ se do ko yih hidāyat de kar yarūshalam bhej diyā ki “jab tum shahr meṅ dāḳhil hoge to tumhārī mulāqāt ek ādmī se hogī jo pānī kā ghaṛā uṭhāe chal rahā hogā. us ke pīchhe ho lenā.

¹⁴jis ghar meṅ wuh dāḳhil ho us ke mālik se kahnā, ‘ustād āp se pūchhte haiṅ ki wuh kamrā kahāṅ hai jahāṅ maiṅ apne shāgirdoṅ ke sāth fasah kā khānā khāūṅ?’

¹⁵wuh tumheṅ dūsrī manzil par ek baṛā aur sajā huā kamrā dikhāegā. wuh tayyār hogā. hamāre lie fasah kā khānā wahīṅ tayyār karnā.”

¹⁶donoṅ chale gae to shahr meṅ dāḳhil ho kar sab kuchh waisā hī pāyā jaisā īsā ne unheṅ batāyā thā. phir unhoṅ ne fasah kā khānā tayyār kiyā.

¹⁷shām ke waqt īsā bārah shāgirdoṅ samet wahāṅ pahuṅch gayā.

¹⁸jab wuh mez par baiṭhe khānā khā rahe the to us ne kahā, “maiṅ tum ko sach batātā hūṅ, tum meṅ se ek jo mere sāth khānā khā rahā hai mujhe dushman ke hawāle kar degā.”

¹⁹shāgird yih sun kar ġhamgīn hue. bārī bārī unhoṅ ne us se pūchhā, “maiṅ to nahīṅ hūṅ?”

²⁰īsā ne jawāb diyā, “tum bārah meṅ se ek hai. wuh mere sāth apnī roṭī sālan ke bartan meṅ ḍāl rahā hai.

²¹ibn-e-ādam to kūch kar jāegā jis tarah kalām-e-muqaddas meṅ likhā hai, lekin us shaḳhs par afsos jis ke wasīle se use dushman ke hawāle kar diyā jāegā. us ke lie behtar yih hotā ki wuh kabhī paidā hī na hotā.”

²²khāne ke daurān īsā ne roṭī le kar shukrguzārī kī duā kī aur use ṭukṛe karke shāgirdoṅ ko de diyā. us ne kahā, “yih lo, yih merā badan hai.”

²³phir us ne mai kā pyālā le kar shukrguzārī kī duā kī aur use unheṅ de diyā. sab ne us meṅ se pī liyā.

²⁴us ne un se kahā, “yih merā ḳhūn hai, nae ahd kā wuh ḳhūn jo bahutoṅ ke lie bahāyā jātā hai.

²⁵maiṅ tum ko sach batātā hūṅ ki ab se maiṅ angūr kā ras nahīṅ piyūṅgā, kyūṅki aglī dafā ise nae sire se allāh kī bādshāhī meṅ hī piyūṅgā.”

²⁶phir wuh ek zabūr gā kar nikle aur zaitūn ke pahāṛ ke pās pahuṅche.

²⁷īsā ne unheṅ batāyā, “tum sab bargashtā ho jāoge, kyūṅki kalām-e-muqaddas meṅ allāh farmātā hai, ‘maiṅ charwāhe ko mār ḍālūṅgā aur bheṛeṅ titar-bitar ho jāeṅgī.’

²⁸lekin apne jī uṭhne ke bād meṅ tumhāre āge āge galīl pahuṅchūṅgā.”

²⁹patras ne etirāz kiyā, “dūsre beshak sab bargashtā ho jāeṅ, lekin meṅ kabhī nahīṅ hūṅgā.”

³⁰īsā ne jawāb diyā, “maiṅ tujhe sach batātā hūṅ, isī rāt murġh ke dūsrī dafā bāṅg dene se pahle pahle tū tīn bār mujhe jānane se inkār kar chukā hogā.”

³¹patras ne isrār kiyā, “hargiz nahīṅ! maiṅ āp ko jānane se kabhī inkār nahīṅ karūṅga, chāhe mujhe āp ke sāth marnā bhī paṛe.” dūsroṅ ne bhī yihī kuchh kahā.

³²wuh ek bāġh meṅ pahuṅche jis kā nām gatsamanī thā. īsā ne apne shāgirdoṅ se kahā, “yahāṅ baiṭh kar merā intizār karo. maiṅ duā karne ke lie āge jātā hūṅ.”

³³us ne patras, yāqūb aur yūhannā ko sāth liyā. wahāṅ wuh ghabrā kar beqarār hone lagā.

³⁴us ne un se kahā, “maiṅ dukh se itnā dabā huā hūṅ ki marne ko hūṅ. yahāṅ ṭhahar kar jāgte raho.”

³⁵kuchh āge jā kar wuh zamīn par gir gayā aur duā karne lagā ki agar mumkin ho to mujhe āne wālī ghaṛiyoṅ kī taqlīf se guzarnā na paṛe.

³⁶us ne kahā, “ai abbā, ai bāp! tere lie sab kuchh mumkin hai. dukh kā yih pyālā mujh se haṭā le. lekin merī nahīṅ balki terī marzī pūrī ho.”

³⁷wuh apne shāgirdoṅ ke pās wāpas āyā to dekhā ki wuh so rahe haiṅ. us ne patras se kahā, “shamāūn, kyā tū so rahā hai? kyā tū ek ghanṭā bhī nahīṅ jāg sakā?

³⁸jāgte aur duā karte raho tāki tum āzmāish meṅ na paṛo. kyūṅki rūh to tayyār hai, lekin jism kamzor.”

³⁹ek bār phir us ne jā kar wuhī duā kī jo pahle kī thī.

⁴⁰jab wāpas āyā to dubārā dekhā ki wuh so rahe haiṅ, kyūṅki nīnd kī badaulat un kī āṅkheṅ bojhal thīṅ. wuh nahīṅ jānte the ki kyā jawāb deṅ.

⁴¹jab īsā tīsrī bār wāpas āyā to us ne un se kahā, “tum abhī tak so aur ārām kar rahe ho? bas kāfī hai. waqt ā gayā hai. dekho, ibn-e-ādam ko gunāhgāroṅ ke hawāle kiyā jā rahā hai.

⁴²uṭho. āo, chaleṅ. dekho, mujhe dushman ke hawāle karne wālā qarīb ā chukā hai.”

⁴³wuh abhī yih bāt kar hī rahā thā ki yahūdāh pahuṅch gayā, jo bārah shāgirdoṅ meṅ se ek thā. us ke sāth talwāroṅ aur lāṭhiyoṅ se les ādmiyoṅ kā hujūm thā. unheṅ rāhnumā imāmoṅ, sharīat ke ulamā aur buzurgoṅ ne bhejā thā.

⁴⁴is ġhaddār yahūdāh ne unheṅ ek imtiyāzī nishān diyā thā ki jis ko maiṅ bosā dūṅ wuhī īsā hai. use giriftār karke le jāeṅ.

⁴⁵jūṅ hī wuh pahuṅche yahūdāh īsā ke pās gayā aur “ustād!” kah kar use bosā diyā.

⁴⁶is par unhoṅ ne use pakaṛ kar giriftār kar liyā.

⁴⁷lekin īsā ke pās khaṛe ek shaḳhs ne apnī talwār miyān se nikālī aur imām-e-āzam ke ġhulām ko mār kar us kā kān uṛā diyā.

⁴⁸īsā ne un se pūchhā, “kyā maiṅ ḍākū hūṅ ki tum talwāreṅ aur lāṭhiyāṅ lie mujhe giriftār karne nikle ho?

⁴⁹maiṅ to rozānā bait-ul-muqaddas meṅ tumhāre pās thā aur tālīm detā rahā, magar tum ne mujhe giriftār nahīṅ kiyā. lekin yih is lie ho rahā hai tāki kalām-e-muqaddas kī bāteṅ pūrī ho jāeṅ.”

⁵⁰phir sab ke sab use chhoṛ kar bhāg gae.

⁵¹lekin ek naujawān īsā ke pīchhe pīchhe chaltā rahā jo sirf chādar oṛhe hue thā. logoṅ ne use pakaṛne kī koshish kī,

⁵²lekin wuh chādar chhoṛ kar nangī hālat meṅ bhāg gayā.

⁵³wuh īsā ko imām-e-āzam ke pās le gae jahāṅ tamām rāhnumā imām, buzurg aur sharīat ke ulamā bhī jamā the.

⁵⁴itne meṅ patras kuchh fāsile par īsā ke pīchhe pīchhe imām-e-āzam ke sahan tak pahuṅch gayā. wahāṅ wuh mulāzimoṅ ke sāth baiṭh kar āg tāpne lagā.

⁵⁵makān ke andar rāhnumā imām aur yahūdī adālat-e-āliyā ke tamām afrād īsā ke ḳhilāf gawāhiyāṅ ḍhūnḍ rahe the tāki use sazā-e-maut dilwā sakeṅ. lekin koī gawāhī na milī.

⁵⁶kāfī logoṅ ne us ke ḳhilāf jhūṭī gawāhī to dī, lekin un ke bayān ek dūsre ke mutazād the.

⁵⁷āḳhirkār bāz ne khaṛe ho kar yih jhūṭī gawāhī dī,

⁵⁸“ham ne ise yih kahte sunā hai ki maiṅ insān ke hāthoṅ ke bane is bait-ul-muqaddas ko ḍhā kar tīn din ke andar andar nayā maqdis tāmīr kar dūṅgā, ek aisā maqdis jo insān ke hāth nahīṅ banāeṅge.”

⁵⁹lekin un kī gawāhiyāṅ bhī ek dūsrī se mutazād thīṅ.

⁶⁰phir imām-e-āzam ne hāzirīn ke sāmne khaṛe ho kar īsā se pūchhā, “kyā tū koī jawāb nahīṅ degā? yih kyā gawāhiyāṅ haiṅ jo yih log tere ḳhilāf de rahe haiṅ?”

⁶¹lekin īslā ḳhāmosh rahā. us ne koī jawāb na diyā. imām-e-āzam ne us se ek aur sawāl kiyā, “kyā tū al-hamīd kā farzand masīh hai?”

⁶²īsā ne kahā, “jī, maiṅ hūṅ. aur āindā tum ibn-e-ādam ko qādir-e-mutlaq ke dahne hāth baiṭhe aur āsmān ke bādaloṅ par āte hue dekhoge.”

⁶³imām-e-āzam ne ranjish kā izhār karke apne kapṛe phāṛ lie aur kahā, “hameṅ mazīd gawāhoṅ kī kyā zarūrat rahī!

⁶⁴āp ne ḳhud sun liyā hai ki is ne kufr bakā hai. āp kā kyā faislā hai?” sab ne use sazā-e-maut ke lāiq qarār diyā.

⁶⁵phir kuchh us par thūkne lage. unhoṅ ne us kī āṅkhoṅ par paṭṭī bāndhī aur use mukke mār mār kar kahne lage, “nabuwwat kar!” mulāzimoṅ ne bhī use thappaṛ māre.

⁶⁶is daurān patras nīche sahan meṅ thā. imām-e-āzam kī ek naukarānī wahāṅ se guzarī

⁶⁷aur dekhā ki patras wahāṅ āg tāp rahā hai. us ne ġhaur se us par nazar kī aur kahā, “tum bhī nāsarat ke us ādmī īsā ke sāth the.”

⁶⁸lekin us ne inkār kiyā, “maiṅ nahīṅ jāntā yā samajhtā ki tū kyā bāt kar rahī hai.” yih kah kar wuh geṭ ke qarīb chalā gayā. [usī lamhe murġh ne bāṅg dī.]

⁶⁹jab naukarānī ne use wahāṅ dekhā to us ne dubārā pās khaṛe logoṅ se kahā, “yih bandā un meṅ se hai.”

⁷⁰dubārā patras ne inkār kiyā. thoṛī der ke bād patras ke sāth khaṛe logoṅ ne bhī us se kahā, “tum zarūr un meṅ se ho kyūṅki tum galīl ke rahne wāle ho.”

⁷¹is par patras ne qasam khā kar kahā, “mujh par lānat agar maiṅ jhūṭ bol rahā hūṅ. maiṅ us ādmī ko nahīṅ jāntā jis kā zikr tum kar rahe ho.”

⁷²fauran murġh kī bāṅg dūsrī martabā sunāī dī. phir patras ko wuh bāt yād āī jo īsā ne us se kahī thī, “murġh ke dūsrī dafā bāṅg dene se pahle pahle tū tīn bār mujhe jānane se inkār kar chukā hogā.” is par wuh ro paṛā.