Read Roman Urdu Geo marqus 15 Bible Online

marqus 15 - Roman Urdu Geo bible

marqus 15

¹subhsawere hī rāhnumā imām buzurgoṅ, sharīat ke ulamā aur pūrī yahūdī adālat-e-āliyā ke sāth mil kar faisle tak pahuṅch gae. wuh īsā ko bāndh kar wahāṅ se le gae aur romī gawarnar pīlātus ke hawāle kar diyā.

²pīlātus ne us se pūchhā, “kyā tum yahūdiyoṅ ke bādshāh ho?” īsā ne jawāb diyā, “jī, āp ḳhud kahte haiṅ.”

³rāhnumā imāmoṅ ne us par bahut ilzām lagāe.

⁴chunāṅche pīlātus ne dubārā us se sawāl kiyā, “kyā tum koī jawāb nahīṅ doge? yih to tum par bahut se ilzāmāt lagā rahe haiṅ.”

⁵lekin īsā ne is par bhī koī jawāb na diyā, aur pīlātus baṛā hairān huā.

⁶un dinoṅ yih riwāj thā ki har sāl fasah kī īd par ek qaidī ko rihā kar diyā jātā thā. yih qaidī awām se muntaḳhab kiyā jātā thā.

⁷us waqt kuchh ādmī jel meṅ the jo hukūmat ke ḳhilāf kisī inqilābī tahrīk meṅ sharīk hue the aur jinhoṅ ne baġhāwat ke mauqe par qatl-o-ġhārat kī thī. un meṅ se ek kā nām bar-abbā thā.

⁸ab hujūm ne pīlātus ke pās ā kar us se guzārish kī ki wuh māmūl ke mutābiq ek qaidī ko āzād kar de.

⁹pīlātus ne pūchhā, “kyā tum chāhte ho ki maiṅ yahūdiyoṅ ke bādshāh ko āzād kar dūṅ?”

¹⁰wuh jāntā thā ki rāhnumā imāmoṅ ne īsā ko sirf hasad kī binā par us ke hawāle kiyā hai.

¹¹lekin rāhnumā imāmoṅ ne hujūm ko uksāyā ki wuh īsā ke bajāe bar-abbā ko māṅgeṅ.

¹²pīlātus ne sawāl kiyā, “phir maiṅ is ke sāth kyā karūṅ jis kā nām tum ne yahūdiyoṅ kā bādshāh rakhā hai?”

¹³wuh chīḳhe, “use maslūb kareṅ.”

¹⁴pīlātus ne pūchhā, “kyūṅ? us ne kyā jurm kiyā hai?” lekin log mazīd shor machā kar chīḳhte rahe, “use maslūb kareṅ!”

¹⁵chunāṅche pīlātus ne hujūm ko mutma'in karne kī ḳhātir bar-abbā ko āzād kar diyā. us ne īsā ko koṛe lagāne ko kahā, phir use maslūb karne ke lie faujiyoṅ ke hawāle kar diyā.

¹⁶faujī īsā ko gawarnar ke mahal banām praiṭoriyum ke sahan meṅ le gae aur pūrī palṭan ko ikaṭṭhā kiyā.

¹⁷unhoṅ ne use arġhawānī rang kā libās pahnāyā aur kāṅṭedār ṭahniyoṅ kā ek tāj banā kar us ke sar par rakh diyā.

¹⁸phir wuh use salām karne lage, “ai yahūdiyoṅ ke bādshāh, ādāb!”

¹⁹lāṭhī se us ke sar par mār mār kar wuh us par thūkte rahe. ghuṭne ṭek kar unhoṅ ne use sijdā kiyā.

²⁰phir us kā mazāq uṛāne se thak kar unhoṅ ne arġhawānī libās utār kar use dubārā us ke apne kapṛe pahnāe. phir wuh use maslūb karne ke lie bāhar le gae.

²¹us waqt libiyā ke shahr kuren kā rahne wālā ek ādmī banām shamāūn dehāt se shahr ko ā rahā thā. wuh sikandar aur rūfus kā bāp thā. jab wuh īsā aur faujiyoṅ ke pās se guzarne lagā to faujiyoṅ ne use salīb uṭhāne par majbūr kiyā.

²²yūṅ chalte chalte wuh īsā ko ek maqām par le gae jis kā nām gulgutā (yānī khopaṛī kā maqām) thā.

²³wahāṅ unhoṅ ne use mai pesh kī jis meṅ mur milāyā gayā thā, lekin us ne pīne se inkār kiyā.

²⁴phir faujiyoṅ ne use maslūb kiyā aur us ke kapṛe āpas meṅ bāṅṭ lie. yih faislā karne ke lie ki kis ko kyā kyā milegā unhoṅ ne qur'ā ḍālā.

²⁵nau baje subh kā waqt thā jab unhoṅ ne use maslūb kiyā.

²⁶ek taḳhtī salīb par lagā dī gaī jis par yih ilzām likhā thā, “yahūdiyoṅ kā bādshāh.”

²⁷do ḍākuoṅ ko bhī īsā ke sāth maslūb kiyā gayā, ek ko us ke dahne hāth aur dūsre ko us ke bāeṅ hāth.

²⁸[yūṅ muqaddas kalām kā wuh hawālā pūrā huā jis meṅ likhā hai, ‘use mujrimoṅ meṅ shumār kiyā gayā.’]

²⁹jo wahāṅ se guzare unhoṅ ne kufr bak kar us kī tazlīl kī aur sar hilā hilā kar apnī hiqārat kā izhār kiyā. unhoṅ ne kahā, “tū ne to kahā thā ki maiṅ bait-ul-muqaddas ko ḍhā kar use tīn din ke andar andar dubārā tāmīr kar dūṅgā.

³⁰ab salīb par se utar kar apne āp ko bachā!”

³¹rāhnumā imāmoṅ aur sharīat ke ulamā ne bhī īsā kā mazāq uṛā kar kahā, “is ne auroṅ ko bachāyā, lekin apne āp ko nahīṅ bachā saktā.

³²isrāīl kā yih bādshāh masīh ab salīb par se utar āe tāki ham yih dekh kar īmān lāeṅ.” aur jin ādmiyoṅ ko us ke sāth maslūb kiyā gayā thā unhoṅ ne bhī use lān-tān kī.

³³dopahar bārah baje pūrā mulk andhere meṅ ḍūb gayā. yih tārīkī tīn ghanṭoṅ tak rahī.

³⁴phir tīn baje īsā ūṅchī āwāz se pukār uṭhā, “elī, elī, lamā shabaqtanī?” jis kā matlab hai, “ai mere ḳhudā, ai mere ḳhudā, tū ne mujhe kyūṅ tark kar diyā hai?”

³⁵yih sun kar pās khaṛe kuchh log kahne lage, “wuh ilyās nabī ko bulā rahā hai.”

³⁶kisī ne dauṛ kar mai ke sirke meṅ ek isfanj ḍuboyā aur use ḍanḍe par lagā kar īsā ko chusāne kī koshish kī. wuh bolā, “āo ham dekheṅ, shāyad ilyās ā kar use salīb par se utār le.”

³⁷lekin īsā ne baṛe zor se chillā kar dam chhoṛ diyā.

³⁸usī waqt bait-ul-muqaddas ke muqaddastarīn kamre ke sāmne laṭkā huā pardā ūpar se le kar nīche tak do hissoṅ meṅ phaṭ gayā.

³⁹jab īsā ke muqābil khaṛe romī afsar [3] ne dekhā ki wuh kis tarah marā to us ne kahā, “yih ādmī wāqaī allāh kā farzand thā!”

⁴⁰kuchh ḳhawātīn bhī wahāṅ thīṅ jo kuchh fāsile par us kā mushāhadā kar rahī thīṅ. un meṅ mariyam magdalīnī, chhoṭe yāqūb aur yoses kī māṅ mariyam aur salomī bhī thīṅ.

⁴¹galīl meṅ yih aurateṅ īsā ke pīchhe chal kar is kī ḳhidmat kartī rahī thīṅ. kaī aur ḳhawātīn bhī wahāṅ thīṅ jo us ke sāth yarūshalam ā gaī thīṅ.

⁴²yih sab kuchh jum'e ko huā jo agle din ke sabat ke lie tayyārī kā din thā. jab shām hone ko thī

⁴³to arimatiyāh kā ek ādmī banām yūsuf himmat karke pīlātus ke pās gayā aur us se īsā kī lāsh māṅgī. (yūsuf yahūdī adālat-e-āliyā kā nāmwar maimbar thā aur allāh kī bādshāhī ke āne ke intizār meṅ thā.)

⁴⁴pīlātus yih sun kar hairān huā ki īsā mar chukā hai. us ne romī afsar ko bulā kar us se pūchhā ki kyā īsā wāqaī mar chukā hai?

⁴⁵jab afsar ne is kī tasdīq kī to pīlātus ne yūsuf ko lāsh de dī.

⁴⁶yūsuf ne kafan ḳharīd liyā, phir īsā kī lāsh utār kar use katān ke kafan meṅ lapeṭā aur ek qabr meṅ rakh diyā jo chaṭān meṅ tarāshī gaī thī. āḳhir meṅ us ne ek baṛā patthar luṛhkā kar qabr kā muṅh band kar diyā.

⁴⁷mariyam magdalīnī aur yoses kī māṅ mariyam ne dekh liyā ki īsā kī lāsh kahāṅ rakhī gaī hai.