Read Roman Urdu Geo marqus 3 Bible Online

marqus 3 - Roman Urdu Geo bible

marqus 3

¹kisī aur waqt jab īsā ibādatḳhāne meṅ gayā to wahāṅ ek ādmī thā jis kā hāth sūkhā huā thā.

²sabat kā din thā aur log baṛe ġhaur se dekh rahe the ki kyā īsā us ādmī ko āj bhī shifā degā. kyūṅki wuh is par ilzām lagāne kā koī bahānā talāsh kar rahe the.

³īsā ne sūkhe hāth wāle ādmī se kahā, “uṭh, darmiyān meṅ khaṛā ho.”

⁴phir īsā ne un se pūchhā, “mujhe batāo, sharīat hameṅ sabat ke din kyā karne kī ijāzat detī hai, nek kām karne kī yā ġhalat kām karne kī, kisī kī jān bachāne kī yā use tabāh karne kī?” sab ḳhāmosh rahe.

⁵wuh ġhusse se apne irdgird ke logoṅ kī taraf deḳhne lagā. un kī saḳhtdilī us ke lie baṛe dukh kā bāis ban rahī thī. phir us ne ādmī se kahā, “apnā hāth āge baṛhā.” us ne aisā kiyā to us kā hāth bahāl ho gayā.

⁶is par farīsī bāhar nikal kar sīdhe herodes kī pārṭī ke afrād ke sāth mil kar īsā ko qatl karne kī sāzisheṅ karne lage.

⁷lekin īsā wahāṅ se haṭ kar apne shāgirdoṅ ke sāth jhīl ke pās gayā. ek baṛā hujūm us ke pīchhe ho liyā. log na sirf galīl ke ilāqe se āe balki bahut sī aur jaghoṅ yānī yahūdiyā,

⁸yarūshalam, idūmayā, daryā-e-yardan ke pār aur sūr aur saidā ke ilāqe se bhī. wajah yih thī ki īsā ke kām kī ḳhabar un ilāqoṅ tak bhī pahuṅch chukī thī aur natīje meṅ bahut se log wahāṅ se bhī āe.

⁹īsā ne shāgirdoṅ se kahā, “ehtiyātan ek kashtī us waqt ke lie tayyār kar rakho jab hujūm mujhe had se zyādā dabāne lagegā.”

¹⁰kyūṅki us din us ne bahutoṅ ko shifā dī thī, is lie jise bhī koī taqlīf thī wuh dhakke de de kar us ke pās āyā tāki use chhū sake.

¹¹aur jab bhī nāpāk rūhoṅ ne īsā ko dekhā to wuh us ke sāmne gir kar chīḳheṅ mārne lagīṅ, “āp allāh ke farzand haiṅ.”

¹²lekin īsā ne unheṅ saḳhtī se ḍāṅṭ kar kahā ki wuh use zāhir na kareṅ.

¹³is ke bād īsā ne pahāṛ par chaṛh kar jinheṅ wuh chāhtā thā unheṅ apne pās bulā liyā. aur wuh us ke pās āe.

¹⁴us ne un meṅ se bārah ko chun liyā. unheṅ us ne apne rasūl muqarrar kar liyā tāki wuh us ke sāth chaleṅ aur wuh unheṅ munādī karne ke lie bhej sake.

¹⁵us ne unheṅ badrūheṅ nikālne kā iḳhtiyār bhī diyā.

¹⁶jin bārah ko us ne muqarrar kiyā un ke nām yih haiṅ: shamāūn jis kā laqab us ne patras rakhā,

¹⁷zabdī ke beṭe yāqūb aur yūhannā jin kā laqab īsā ne ‘bādal kī garaj ke beṭe’ rakhā,

¹⁸andriyās, filippus, bartulmāī, mattī, tomā, yāqūb bin halfaī, taddī, shamāūn mujāhid

¹⁹aur yahūdāh iskariyotī jis ne bād meṅ use dushman ke hawāle kar diyā.

²⁰phir īsā kisī ghar meṅ dāḳhil huā. is bār bhī itnā hujūm jamā ho gayā ki īsā ko apne shāgirdoṅ samet khānā khāne kā mauqā bhī na milā.

²¹jab us ke ḳhāndān ke afrād ne yih sunā to wuh use pakaṛ kar le jāne ke lie āe, kyūṅki unhoṅ ne kahā, “wuh hosh meṅ nahīṅ hai.”

²²lekin sharīat ke jo ālim yarūshalam se āe the unhoṅ ne kahā, “yih badrūhoṅ ke sardār bāl-zabūl ke qabze meṅ hai. usī kī madad se badrūhoṅ ko nikāl rahā hai.”

²³phir īsā ne unheṅ apne pās bulā kar tamsīloṅ meṅ jawāb diyā. “iblīs kis tarah iblīs ko nikāl saktā hai?

²⁴jis bādshāhī meṅ phūṭ paṛ jāe wuh qāim nahīṅ rah saktī.

²⁵aur jis gharāne kī aisī hālat ho wuh bhī qāim nahīṅ rah saktā.

²⁶isī tarah agar iblīs apne āp kī muḳhālafat kare aur yūṅ us meṅ phūṭ paṛ jāe to wuh qāim nahīṅ rah saktā balki ḳhatm ho chukā hai.

²⁷kisī zor-āwar ādmī ke ghar meṅ ghus kar us kā māl-o-asbāb lūṭnā us waqt tak mumkin nahīṅ hai jab tak us ādmī ko bāndhā na jāe. phir hī use lūṭā jā saktā hai.

²⁸maiṅ tum se sach kahtā hūṅ ki logoṅ ke tamām gunāh aur kufr kī bāteṅ muāf kī jā sakeṅgī, ḳhwāh wuh kitnā hī kufr kyūṅ na bakeṅ.

²⁹lekin jo rūh-ul-quds ke ḳhilāf kufr bake use abad tak muāfī nahīṅ milegī. wuh ek abadī gunāh kā qusūrwār ṭhahregā.”

³⁰īsā ne yih is lie kahā kyūṅki ālim kah rahe the ki wuh kisī badrūh kī girift meṅ hai.

³¹phir īsā kī māṅ aur bhāī pahuṅch gae. bāhar khaṛe ho kar unhoṅ ne kisī ko use bulāne ko bhej diyā.

³²us ke irdgird hujūm baiṭhā thā. unhoṅ ne kahā, “āp kī māṅ aur bhāī bāhar āp ko bulā rahe haiṅ.”

³³īsā ne pūchhā, “kaun merī māṅ aur kaun mere bhāī haiṅ?”

³⁴aur apne gird baiṭhe logoṅ par nazar ḍāl kar us ne kahā, “dekho, yih merī māṅ aur mere bhāī haiṅ.

³⁵jo bhī allāh kī marzī pūrī kartā hai wuh merā bhāī, merī bahan aur merī māṅ hai.”