Read Roman Urdu Geo marqus 4 Bible Online

marqus 4 - Roman Urdu Geo bible

marqus 4

¹phir īsā dubārā jhīl ke kināre tālīm dene lagā. aur itnī baṛī bhīṛ us ke pās jamā huī ki wuh jhīl meṅ khaṛī ek kashtī meṅ baiṭh gayā. bāqī log jhīl ke kināre par khaṛe rahe.

²us ne unheṅ bahut sī bāteṅ tamsīloṅ meṅ sikhāīṅ. un meṅ se ek yih thī:

³“suno! ek kisān bīj bone ke lie niklā.

⁴jab bīj idhar udhar bikhar gayā to kuchh dāne rāste par gire aur parindoṅ ne ā kar unheṅ chug liyā.

⁵kuchh pathrīlī zamīn par gire jahāṅ miṭṭī kī kamī thī. wuh jald ug āe kyūṅki miṭṭī gahrī nahīṅ thī.

⁶lekin jab sūraj niklā to paude jhulas gae aur chūṅki wuh jaṛ na pakaṛ sake is lie sūkh gae.

⁷kuchh dāne ḳhudrau kāṅṭedār paudoṅ ke darmiyān bhī gire. wahāṅ wuh ugne to lage, lekin ḳhudrau paudoṅ ne sāth sāth baṛh kar unheṅ phalne phūlne kī jagah na dī. chunāṅche wuh bhī ḳhatm ho gae aur phal na lā sake.

⁸lekin aise dāne bhī the jo zarḳhez zamīn meṅ gire. wahāṅ wuh phūṭ nikle aur baṛhte baṛhte tīs gunā, sāṭh gunā balki sau gunā tak phal lāe.”

⁹phir us ne kahā, “jo sun saktā hai wuh sun le!”

¹⁰jab wuh akelā thā to jo log us ke irdgird jamā the unhoṅ ne bārah shāgirdoṅ samet us se pūchhā ki is tamsīl kā kyā matlab hai?

¹¹us ne jawāb diyā, “tum ko to allāh kī bādshāhī kā bhed samajhne kī liyāqat dī gaī hai. lekin maiṅ is dāire se bāhar ke logoṅ ko har bāt samjhāne ke lie tamsīleṅ istemāl kartā hūṅ

¹²tāki pāk kalām pūrā ho jāe ki ‘wuh apnī āṅkhoṅ se dekheṅge magar kuchh nahīṅ jāneṅge, wuh apne kānoṅ se suneṅge magar kuchh nahīṅ samjheṅge, aisā na ho ki wuh merī taraf rujū kareṅ aur unheṅ muāf kar diyā jāe’.”

¹³phir īsā ne un se kahā, “kyā tum yih tamsīl nahīṅ samajhte? to phir bāqī tamām tamsīleṅ kis tarah samajh pāoge?

¹⁴bīj bone wālā allāh kā kalām bo detā hai.

¹⁵rāste par girne wāle dāne wuh log haiṅ jo kalām ko sunte to haiṅ, lekin phir iblīs fauran ā kar wuh kalām chhīn letā hai jo un meṅ boyā gayā hai.

¹⁶pathrīlī zamīn par girne wāle dāne wuh log haiṅ jo kalām sunte hī use ḳhushī se qabūl to kar lete haiṅ,

¹⁷lekin wuh jaṛ nahīṅ pakaṛte aur is lie zyādā der tak qāim nahīṅ rahte. jūṅ hī wuh kalām par īmān lāne ke bāis kisī musībat yā īzārasānī se dochār ho jāeṅ, to wuh bargashtā ho jāte haiṅ.

¹⁸ḳhudrau kāṅṭedār paudoṅ ke darmiyān gire hue dāne wuh log haiṅ jo kalām sunte to haiṅ,

¹⁹lekin phir rozmarrā kī pareshāniyāṅ, daulat kā fareb aur dīgar chīzoṅ kā lālach kalām ko phalne phūlne nahīṅ dete. natīje meṅ wuh phal lāne tak nahīṅ pahuṅchtā.

²⁰is ke muqābale meṅ zarḳhez zamīn meṅ gire hue dāne wuh log haiṅ jo kalām sun kar use qabūl karte aur baṛhte baṛhte tīs gunā, sāṭh gunā balki sau gunā tak phal lāte haiṅ.”

²¹īsā ne bāt jārī rakhī aur kahā, “kyā charāġh ko is lie jalā kar lāyā jātā hai ki wuh kisī bartan yā chārpāī ke nīche rakhā jāe? hargiz nahīṅ! use shamādān par rakhā jātā hai.

²²kyūṅki jo kuchh bhī is waqt poshīdā hai use āḳhirkār zāhir ho jānā hai aur tamām bhedoṅ ko ek din khul jānā hai.

²³agar koī sun sake to sun le.”

²⁴us ne un se yih bhī kahā, “is par dhyān do ki tum kyā sunte ho. jis hisāb se tum dūsroṅ ko dete ho usī hisāb se tum ko bhī diyā jāegā balki tum ko us se baṛh kar milegā.

²⁵kyūṅki jise kuchh hāsil huā hai use aur bhī diyā jāegā, jabki jise kuchh hāsil nahīṅ huā us se wuh thoṛā bahut bhī chhīn liyā jāegā jo use hāsil hai.”

²⁶phir īsā ne kahā, “allāh kī bādshāhī yūṅ samajh lo: ek kisān zamīn meṅ bīj bikher detā hai.

²⁷yih bīj phūṭ kar din rāt ugtā rahtā hai, ḳhwāh kisān so rahā yā jāg rahā ho. use mālūm nahīṅ ki yih kyūṅkar hotā hai.

²⁸zamīn ḳhud-ba-ḳhud anāj kī fasal paidā kartī hai. pahle patte nikalte haiṅ, phir bāleṅ nazar āne lagtī haiṅ aur āḳhir meṅ dāne paidā ho jāte haiṅ.

²⁹aur jūṅ hī anāj kī fasal pak jātī hai kisān ā kar darāntī se use kāṭ letā hai, kyūṅki fasal kī kaṭāī kā waqt ā chukā hotā hai.”

³⁰phir īsā ne kahā, “ham allāh kī bādshāhī kā muwāzanā kis chīz se kareṅ? yā ham kaun sī tamsīl se ise bayān kareṅ?

³¹wuh rāī ke dāne kī mānind hai jo zamīn meṅ ḍālā gayā ho. rāī bījoṅ meṅ sab se chhoṭā dānā hai

³²lekin baṛhte baṛhte sabziyoṅ meṅ sab se baṛā ho jātā hai. us kī shāḳheṅ itnī lambī ho jātī haiṅ ki parinde us ke sāy meṅ apne ghoṅsle banā sakte haiṅ.”

³³īsā isī qism kī bahut sī tamsīloṅ kī madad se unheṅ kalām yūṅ sunātā thā ki wuh ise samajh sakte the.

³⁴hāṅ, awām ko wuh sirf tamsīloṅ ke zarī'e sikhātā thā. lekin jab wuh apne shāgirdoṅ ke sāth akelā hotā to wuh har bāt kī tashrīh kartā thā.

³⁵us din jab shām huī to īsā ne apne shāgirdoṅ se kahā, “āo, ham jhīl ke pār chaleṅ.”

³⁶chunāṅche wuh bhīṛ ko ruḳhsat karke use le kar chal paṛe. bāz aur kashtiyāṅ bhī sāth gaīṅ.

³⁷achānak saḳht āṅdhī āī. lahreṅ kashtī se ṭakrā kar use pānī se bharne lagīṅ,

³⁸lekin īsā abhī tak kashtī ke pichhle hisse meṅ apnā sar gaddī par rakhe so rahā thā. shāgirdoṅ ne use jagā kar kahā, “ustād, kyā āp ko parwā nahīṅ ki ham tabāh ho rahe haiṅ?”

³⁹wuh jāg uṭhā, āṅdhī ko ḍānṭā aur jhīl se kahā, “ḳhāmosh! chup kar!” is par āṅdhī tham gaī aur lahreṅ bilkul sākit ho gaīṅ.

⁴⁰phir īsā ne shāgirdoṅ se pūchhā, “tum kyūṅ ghabrāte ho? kyā tum abhī tak īmān nahīṅ rakhte?”

⁴¹un par saḳht ḳhauf tārī ho gayā aur wuh ek dūsre se kahne lage, “āḳhir yih kaun hai? hawā aur jhīl bhī us kā hukm māntī haiṅ.”