Read Roman Urdu Geo marqus 5 Bible Online

marqus 5 - Roman Urdu Geo bible

marqus 5

¹phir wuh jhīl ke pār garāsā ke ilāqe meṅ pahuṅche.

²jab īsā kashtī se utrā to ek ādmī jo nāpāk rūh kī girift meṅ thā qabroṅ meṅ se nikal kar īsā ko milā.

³yih ādmī qabroṅ meṅ rahtā aur is naubat tak pahuṅch gayā thā ki koī bhī use bāndh na saktā thā, chāhe use zanjīroṅ se bhī bāndhā jātā.

⁴use bahut dafā beṛiyoṅ aur zanjīroṅ se bāndhā gayā thā, lekin jab bhī aisā huā to us ne zanjīroṅ ko toṛ kar beṛiyoṅ ko ṭukṛe ṭukṛe kar diyā thā. koī bhī use kanṭrol nahīṅ kar saktā thā.

⁵din rāt wuh chīḳheṅ mār mār kar qabroṅ aur pahāṛī ilāqe meṅ ghūmtā phirtā aur apne āp ko pattharoṅ se zaḳhmī kar letā thā.

⁶īsā ko dūr se dekh kar wuh dauṛā aur us ke sāmne muṅh ke bal girā.

⁷wuh zor se chīḳhā, “ai īsā allāh t'ālā ke farzand, merā āp ke sāth kyā wāstā hai? allāh ke nām meṅ āp ko qasam detā hūṅ ki mujhe azāb meṅ na ḍāleṅ.”

⁸kyūṅki īsā ne use kahā thā, “ai nāpāk rūh, ādmī meṅ se nikal jā!”

⁹phir īsā ne pūchhā, “terā nām kyā hai?” us ne jawāb diyā, “lashkar, kyūṅki ham bahut se haiṅ.”

¹⁰aur wuh bār bār minnat kartā rahā ki īsā unheṅ is ilāqe se na nikāle.

¹¹us waqt qarīb kī pahāṛī par sūaroṅ kā baṛā ġhol char rahā thā.

¹²badrūhoṅ ne īsā se iltimās kī, “hameṅ sūaroṅ meṅ bhej deṅ, hameṅ un meṅ dāḳhil hone deṅ.”

¹³us ne unheṅ ijāzat dī to badrūheṅ us ādmī meṅ se nikal kar sūaroṅ meṅ jā ghusīṅ. is par pūre ġhol ke taqrīban 2,000 sūar bhāg bhāg kar pahāṛī kī ḍhalān par se utre aur jhīl meṅ jhapaṭ kar ḍūb mare.

¹⁴yih dekh kar sūaroṅ ke gallābān bhāg gae. unhoṅ ne shahr aur dehāt meṅ is bāt kā charchā kiyā to log yih mālūm karne ke lie ki kyā huā hai apnī jaghoṅ se nikal kar īsā ke pās āe.

¹⁵us ke pās pahuṅche to wuh ādmī milā jis meṅ pahle badrūhoṅ kā lashkar thā. ab wuh kapṛe pahne wahāṅ baiṭhā thā aur us kī zahnī hālat ṭhīk thī. yih dekh kar wuh ḍar gae.

¹⁶jinhoṅ ne sab kuchh dekhā thā unhoṅ ne logoṅ ko batāyā ki badrūh-giriftā ādmī aur sūaroṅ ke sāth kyā huā hai.

¹⁷phir log īsā kī minnat karne lage ki wuh un ke ilāqe se chalā jāe.

¹⁸īsā kashtī par sawār hone lagā to badrūhoṅ se āzād kie gae ādmī ne us se iltimās kī, “mujhe bhī apne sāth jāne deṅ.”

¹⁹lekin īsā ne use sāth jāne na diyā balki kahā, “apne ghar wāpas chalā jā aur apne azīzoṅ ko sab kuchh batā jo rab ne tere lie kiyā hai, ki us ne tujh par kitnā rahm kiyā hai.”

²⁰chunāṅche ādmī chalā gayā aur dikapulis ke ilāqe meṅ logoṅ ko batāne lagā ki īsā ne mere lie kyā kuchh kiyā hai. aur sab hairatzadā hue.

²¹īsā ne kashtī meṅ baiṭhe jhīl ko dubārā pār kiyā. jab dūsre kināre pahuṅchā to ek hujūm us ke gird jamā ho gayā. wuh abhī jhīl ke pās hī thā

²²ki maqāmī ibādatḳhāne kā ek rāhnumā us ke pās āyā. us kā nām yāīr thā. īsā ko dekh kar wuh us ke pāoṅ meṅ gir gayā

²³aur bahut minnat karne lagā, “merī chhoṭī beṭī marne wālī hai, barāh-e-karm ā kar us par apne hāth rakheṅ tāki wuh shifā pā kar zindā rahe.”

²⁴chunāṅche īsā us ke sāth chal paṛā. ek baṛī bhīṛ us ke pīchhe lag gaī aur log use gher kar har taraf se dabāne lage.

²⁵hujūm meṅ ek aurat thī jo bārah sāl se ḳhūn bahne ke marz se rihāī na pā sakī thī.

²⁶bahut ḍākṭaroṅ se apnā ilāj karwā karwā kar use kaī tarah kī musībat jhelnī paṛī thī aur itne meṅ us ke tamām paise bhī ḳharch ho gae the. to bhī koī fāidā na huā thā balki us kī hālat mazīd ḳharāb hotī gaī.

²⁷īsā ke bāre meṅ sun kar wuh bhīṛ meṅ shāmil ho gaī thī. ab pīchhe se ā kar us ne us ke libās ko chhuā,

²⁸kyūṅki us ne sochā, “agar maiṅ sirf us ke libās ko hī chhū lūṅ to maiṅ shifā pā lūṅgī.”

²⁹ḳhūn bahnā fauran band ho gayā aur us ne apne jism meṅ mahsūs kiyā ki mujhe is aziyatnāk hālat se rihāī mil gaī hai.

³⁰lekin usī lamhe īsā ko ḳhud mahsūs huā ki mujh meṅ se tawānāī niklī hai. us ne muṛ kar pūchhā, “kis ne mere kapṛoṅ ko chhuā hai?”

³¹us ke shāgirdoṅ ne jawāb diyā, “āp ḳhud dekh rahe haiṅ ki hujūm āp ko gher kar dabā rahā hai. to phir āp kis tarah pūchh sakte haiṅ ki kis ne mujhe chhuā?”

³²lekin īsā apne chāroṅ taraf deḳhtā rahā ki kis ne yih kiyā hai.

³³is par wuh aurat yih jān kar ki mere sāth kyā huā hai ḳhauf ke māre laraztī huī us ke pās āī. wuh us ke sāmne gir paṛī aur use pūrī haqīqat khol kar bayān kī.

³⁴īsā ne us se kahā, “beṭī, tere īmān ne tujhe bachā liyā hai. salāmatī se jā aur apnī aziyatnāk hālat se bachī rah.”

³⁵īsā ne yih bāt abhī ḳhatm nahīṅ kī thī ki ibādatḳhāne ke rāhnumā yāīr ke ghar kī taraf se kuchh log pahuṅche aur kahā, “āp kī beṭī faut ho chukī hai, ab ustād ko mazīd taqlīf dene kī kyā zarūrat?”

³⁶un kī yih bāt nazarandāz karke īsā ne yāīr se kahā, “mat ghabrāo, faqt īmān rakho.”

³⁷phir īsā ne hujūm ko rok liyā aur sirf patras, yāqūb aur us ke bhāī yūhannā ko apne sāth jāne kī ijāzat dī.

³⁸jab ibādatḳhāne ke rāhnumā ke ghar pahuṅche to wahāṅ baṛī afrā-tafrī nazar āī. log ḳhūb giryā-o-zārī kar rahe the.

³⁹andar jā kar īsā ne un se kahā, “yih kaisā shor-sharābā hai? kyūṅ ro rahe ho? laṛkī mar nahīṅ gaī balki so rahī hai.”

⁴⁰log haṅs kar us kā mazāq uṛāne lage. lekin us ne sab ko bāhar nikāl diyā. phir sirf laṛkī ke wālidain aur apne tīn shāgirdoṅ ko sāth le kar wuh us kamre meṅ dāḳhil huā jis meṅ laṛkī paṛī thī.

⁴¹us ne us kā hāth pakaṛ kar kahā, “talithā qūm!” is kā matlab hai, “chhoṭī laṛkī, maiṅ tujhe hukm detā hūṅ ki jāg uṭh.”

⁴²laṛkī fauran uṭh kar chalne phirne lagī. us kī umr bārah sāl thī. yih dekh kar log ghabrā kar hairān rah gae.

⁴³īsā ne unheṅ sanjīdagī se samjhāyā ki wuh kisī ko bhī is ke bāre meṅ na batāeṅ. phir us ne unheṅ kahā ki use khāne ko kuchh do.