Read Roman Urdu Geo marqus 6 Bible Online

marqus 6 - Roman Urdu Geo bible

marqus 6

¹phir īsā wahāṅ se chalā gayā aur apne watanī shahr nāsarat meṅ āyā. us ke shāgird us ke sāth the.

²sabat ke din wuh ibādatḳhāne meṅ tālīm dene lagā. beshtar log us kī bāteṅ sun kar hairatzadā hue. unhoṅ ne pūchhā, “ise yih kahāṅ se hāsil huā hai? yih hikmat jo ise milī hai, aur yih mojize jo is ke hāthoṅ se hote haiṅ, yih kyā hai?

³kyā yih wuh baṛhaī nahīṅ hai jo mariyam kā beṭā hai aur jis ke bhāī yāqūb, yūsuf, yahūdāh aur shamāūn haiṅ? aur kyā is kī bahneṅ yihīṅ nahīṅ rahtīṅ?” yūṅ unhoṅ ne us se ṭhokar khā kar use qabūl na kiyā.

⁴īsā ne un se kahā, “nabī kī har jagah izzat hotī hai siwāe us ke watanī shahr, us ke rishtedāroṅ aur us ke apne ḳhāndān ke.”

⁵wahāṅ wuh koī mojizā na kar sakā. us ne sirf chand ek marīzoṅ par hāth rakh kar un ko shifā dī.

⁶aur wuh un kī be'etiqādī ke sabab se bahut hairān thā. is ke bād īsā ne irdgird ke ilāqe meṅ gāoṅ gāoṅ jā kar logoṅ ko tālīm dī.

⁷bārah shāgirdoṅ ko bulā kar wuh unheṅ do do karke muḳhtalif jaghoṅ par bhejne lagā. is ke lie us ne unheṅ nāpāk rūhoṅ ko nikālne kā iḳhtiyār de kar

⁸yih hidāyat kī, “safar par apne sāth kuchh na lenā siwāe ek lāṭhī ke. na roṭī, na sāmān ke lie koī baig, na kamarband meṅ koī paisā,

⁹na ek se zyādā sūṭ. tum jūte pahan sakte ho.

¹⁰jis ghar meṅ bhī dāḳhil ho us meṅ us maqām se chale jāne tak ṭhahro.

¹¹aur agar koī maqām tum ko qabūl na kare yā tumhārī na sune to phir rawānā hote waqt apne pāoṅ se gard jhāṛ do. yūṅ tum un ke ḳhilāf gawāhī doge.”

¹²chunāṅche shāgird wahāṅ se nikal kar munādī karne lage ki log taubā kareṅ.

¹³unhoṅ ne bahut sī badrūheṅ nikāl dīṅ aur bahut se marīzoṅ par zaitūn kā tel mal kar unheṅ shifā dī.

¹⁴bādshāh herodes antipās ne īsā ke bāre meṅ sunā, kyūṅki us kā nām mashhūr ho gayā thā. kuchh kah rahe the, “yahyā baptismā dene wālā murdoṅ meṅ se jī uṭhā hai, is lie is qism kī mojizānā tāqateṅ us meṅ nazar ātī haiṅ.” auroṅ ne sochā, “yih ilyās nabī hai.”

¹⁵yih ḳhayāl bhī pesh kiyā jā rahā thā ki wuh qadīm zamāne ke nabiyoṅ jaisā koī nabī hai.

¹⁶lekin jab herodes ne us ke bāre meṅ sunā to us ne kahā, “yahyā jis kā maiṅ ne sar qalam karwāyā hai murdoṅ meṅ se jī uṭhā hai.”

¹⁷wajah yih thī ki herodes ke hukm par hī yahyā ko giriftār karke jel meṅ ḍālā gayā thā. yih herodiyās kī ḳhātir huā thā jo pahle herodes ke bhāī filippus kī bīwī thī, lekin jis se us ne ab ḳhud shādī kar lī thī.

¹⁸yahyā ne herodes ko batāyā thā, “apne bhāī kī bīwī se terī shādī nājāiz hai.”

¹⁹is wajah se herodiyās us se kīnā rakhtī aur use qatl karānā chāhtī thī. lekin is meṅ wuh nākām rahī

²⁰kyūṅki herodes yahyā se ḍartā thā. wuh jāntā thā ki yih ādmī rāstbāz aur muqaddas hai, is lie wuh us kī hifāzat kartā thā. jab bhī us se bāt hotī to herodes sun sun kar baṛī uljhan meṅ paṛ jātā. to bhī wuh us kī bāteṅ sunanā pasand kartā thā.

²¹āḳhirkār herodiyās ko herodes kī sālgirah par achchhā mauqā mil gayā. sālgirah ko manāne ke lie herodes ne apne baṛe sarkārī afsaroṅ, milṭrī kamānḍaroṅ aur galīl ke awwal darje ke shahriyoṅ kī ziyāfat kī.

²²ziyāfat ke daurān herodiyās kī beṭī andar ā kar nāchne lagī. herodes aur us ke mehmānoṅ ko yih bahut pasand āyā aur us ne laṛkī se kahā, “jo jī chāhe mujh se māṅg to maiṅ wuh tujhe dūṅgā.”

²³balki us ne qasam khā kar kahā, “jo bhī tū māṅgegī maiṅ tujhe dūṅgā, ḳhwāh bādshāhī kā ādhā hissā hī kyūṅ na ho.”

²⁴laṛkī ne nikal kar apnī māṅ se pūchhā, “maiṅ kyā māṅgūṅ?” māṅ ne jawāb diyā, “yahyā baptismā dene wāle kā sar.”

²⁵laṛkī phurtī se andar jā kar bādshāh ke pās wāpas āī aur kahā, “maiṅ chāhtī hūṅ ki āp mujhe abhī abhī yahyā baptismā dene wāle kā sar ṭre meṅ mangwā deṅ.”

²⁶yih sun kar bādshāh ko bahut dukh huā. lekin apnī qasmoṅ aur mehmānoṅ kī maujūdagī kī wajah se wuh inkār karne ke lie bhī tayyār nahīṅ thā.

²⁷chunāṅche us ne fauran jallād ko bhej kar hukm diyā ki wuh yahyā kā sar le āe. jallād ne jel meṅ jā kar yahyā kā sar qalam kar diyā.

²⁸phir wuh use ṭre meṅ rakh kar le āyā aur laṛkī ko de diyā. laṛkī ne use apnī māṅ ke sapurd kiyā.

²⁹jab yahyā ke shāgirdoṅ ko yih ḳhabar pahuṅchī to wuh āe aur us kī lāsh le kar use qabr meṅ rakh diyā.

³⁰rasūl wāpas ā kar īsā ke pās jamā hue aur use sab kuchh sunāne lage jo unhoṅ ne kiyā aur sikhāyā thā.

³¹is daurān itne log ā aur jā rahe the ki unheṅ khānā khāne kā mauqā bhī na milā. is lie īsā ne bārah shāgirdoṅ se kahā, “āo, ham logoṅ se alag ho kar kisī ġhairābād jagah jāeṅ aur ārām kareṅ.”

³²chunāṅche wuh kashtī par sawār ho kar kisī wīrān jagah chale gae.

³³lekin bahut se logoṅ ne unheṅ jāte waqt pahchān liyā. wuh paidal chal kar tamām shahroṅ se nikal āe aur dauṛ dauṛ kar un se pahle manzil-e-maqsūd tak pahuṅch gae.

³⁴jab īsā ne kashtī par se utar kar baṛe hujūm ko dekhā to use logoṅ par tars āyā, kyūṅki wuh un bheṛoṅ kī mānind the jin kā koī charwāhā na ho. wahīṅ wuh unheṅ bahut sī bāteṅ sikhāne lagā.

³⁵jab din ḍhalne lagā to us ke shāgird us ke pās āe aur kahā, “yih jagah wīrān hai aur din ḍhalne lagā hai.

³⁶in ko ruḳhsat kar deṅ tāki yih irdgird kī bastiyoṅ aur dehātoṅ meṅ jā kar khāne ke lie kuchh ḳharīd leṅ.”

³⁷lekin īsā ne unheṅ kahā, “tum ḳhud inheṅ kuchh khāne ko do.” unhoṅ ne pūchhā, “ham is ke lie darkār chāṅdī ke 200 sikke kahāṅ se le kar roṭī ḳharīdne jāeṅ aur inheṅ khilāeṅ?”

³⁸us ne kahā, “tumhāre pās kitnī roṭiyāṅ haiṅ? jā kar patā karo!” unhoṅ ne mālūm kiyā. phir dubārā us ke pās ā kar kahne lage, “hamāre pās pāṅch roṭiyāṅ aur do machhliyāṅ haiṅ.”

³⁹is par īsā ne unheṅ hidāyat dī, “tamām logoṅ ko gurohoṅ meṅ harī ghās par biṭhā do.”

⁴⁰chunāṅche log sau sau aur pachās pachās kī sūrat meṅ baiṭh gae.

⁴¹phir īsā ne un pāṅch roṭiyoṅ aur do machhliyoṅ ko le kar āsmān kī taraf dekhā aur shukrguzārī kī duā kī. phir us ne roṭiyoṅ ko toṛ toṛ kar shāgirdoṅ ko diyā tāki wuh logoṅ meṅ taqsīm kareṅ. us ne do machhliyoṅ ko bhī ṭukṛe ṭukṛe karke shāgirdoṅ ke zarī'e un meṅ taqsīm karwāyā.

⁴²aur sab ne jī bhar kar khāyā.

⁴³jab shāgirdoṅ ne roṭiyoṅ aur machhliyoṅ ke bache hue ṭukṛe jamā kie to bārah ṭokre bhar gae.

⁴⁴khāne wāle mardoṅ kī kul tādād 5,000 thī.

⁴⁵is ke ain bād īsā ne apne shāgirdoṅ ko majbūr kiyā ki wuh kashtī par sawār ho kar āge nikleṅ aur jhīl ke pār ke shahr bait-saidā jāeṅ. itne meṅ wuh hujūm ko ruḳhsat karnā chāhtā thā.

⁴⁶unheṅ ḳhairbād kahne ke bād wuh duā karne ke lie pahāṛ par chaṛh gayā.

⁴⁷shām ke waqt shāgirdoṅ kī kashtī jhīl ke bīch tak pahuṅch gaī thī jabki īsā ḳhud ḳhushkī par akelā rah gayā thā.

⁴⁸wahāṅ se us ne dekhā ki shāgird kashtī ko khene meṅ baṛī jidd-o-jahd kar rahe haiṅ, kyūṅki hawā un ke ḳhilāf chal rahī thī. taqrīban tīn baje rāt ke waqt īsā pānī par chalte hue un ke pās āyā. wuh un se āge nikalnā chāhtā thā,

⁴⁹lekin jab unhoṅ ne use jhīl kī satah par chalte hue dekhā to sochne lage, “yih koī bhūt hai” aur chīḳheṅ mārne lage.

⁵⁰kyūṅki sab ne use dekh kar dahshat khāī. lekin īsā fauran un se muḳhātib ho kar bolā, “hauslā rakho! maiṅ hī hūṅ. mat ghabrāo.”

⁵¹phir wuh un ke pās āyā aur kashtī meṅ baiṭh gayā. usī waqt hawā tham gaī. shāgird nihāyat hī hairatzadā hue.

⁵²kyūṅki jab roṭiyoṅ kā mojizā kiyā gayā thā to wuh is kā matlab nahīṅ samjhe the balki un ke dil behiss ho gae the.

⁵³jhīl ko pār karke wuh gannesarat shahr ke pās pahuṅch gae aur langar ḍāl diyā.

⁵⁴jūṅ hī wuh kashtī se utre logoṅ ne īsā ko pahchān liyā.

⁵⁵wuh bhāg bhāg kar us pūre ilāqe meṅ se guzare aur marīzoṅ ko chārpāiyoṅ par uṭhā uṭhā kar wahāṅ le āe jahāṅ kahīṅ unheṅ ḳhabar milī ki wuh ṭhahrā huā hai.

⁵⁶jahāṅ bhī wuh gayā chāhe gāoṅ, shahr yā bastī meṅ, wahāṅ logoṅ ne bīmāroṅ ko chaukoṅ meṅ rakh kar us se minnat kī ki wuh kam az kam unheṅ apne libās ke dāman ko chhūne de. aur jis ne bhī use chhuā use shifā milī.